Sekaria 8 - ICIGHAN BIBILO

¹ Kwaghôron u TER u akum a Sha shi va her a mo, er:

² TER u akum a Sha ngu kaan nahan er: M gba iwuhe sha ci u Shion, ka iwuhe i vesen je, man m gba iwuhe sha ci na, sha ishima i vihin tsung.

³ TER ngu kaan nahan er: Me shi Me hide hen Shion Me tema ken atô u Yerusalem; man á yila Yerusalem er Gar u mimi, man uwo u TER u akum a Sha er Icighanwo.

⁴ TER u akum a Sha ngu kaan nahan er: Utamenmbaiorov man ungômbakasev, shi vea tema sha igbenda i Yerusalem, hanma or nana lu a gbough ku nan ken uwe sha ci u ayange kar ve sha won ngee.

⁵ Igbenda i gar kpaa ia mgbough a mbayev mba nomso man mba kasev, vea numben sha igbenda na.

⁶ TER u akum a Sha ngu kaan nahan er: Aluer á lu kwagh u kpilighyol sha ashe a asande a ior a a shi her hen ayange la yô, nahan ashe Am kpaa á kpiligh a iyolo? Kape TER u akum a Sha A kaa ne.

⁷ TER u akum a Sha ngu kaan nahan er: Nenge, Me yima ior Av mba ve lu ken tar u sha ityoughkitaregh man ken tar u shin ityôtar;

⁸ Me hide a ve, vea va tema ken atô u Yerusalem, vea hingir ior Av, Mo kpaa Me hingir Aôndo ve ken jighjigh man ken perapera.

⁹ TER u akum a Sha ngu kaan nahan er: Ave a en a̱ taver, ne mba ne ongo akaaôron angan sha ayange ne, sha zwa u uprofeti, hii sha iyange i i tim imagh ki iyou i TER u akum a Sha, sha u á maa i ka tempel je la.

¹⁰ Gadia er ayange la lu a kuma ga yô, injar lu sha ci u or, shin sha ci u zendenya kpaa ga; man shi or u nyôron shin u duen lu a mwar ga sha ci u orihom; gadia M sende ior ityough cii, hanma or nan lu ihom a or u wan ndor a nan.

¹¹ Kpa hegen yô, Me kera er a asande a ior a a shi ne, er sha ayange a tsuaa la nahan ga, kape TER u akum a Sha A kaa ne.

¹² Gadia ivor i bem ia lu heregh; kon u wain ua ume atam a u, inya kpaa ia na iyiagh nagh, Usha kpaa vea gba avure a ve; Me na asande a ior a a shi her ne, aa ya dyako sha akaa ne cii.

¹³ Tsô, er ne lu a ifan iyol ken akuraior nahan, we, ya u Yuda man ya u Iserael, kape Me yima ne la, man nea hingir iveren; de kera cie nen ga, taver nen ave a en.

¹⁴ Gadia TER u akum a Sha ngu kaan nahan er: Er M wa ishima u eren ne kwagh u bo zum u uter enev bamem la, man ishima gemam kposo sha kwagh la ga, kape TER u akum a Sha A kaa ne,

¹⁵ kape sha ayange angan shi M ver ishima u eren dedoo a Yerusalem man ya u Yuda la; de kera cie nen ga.

¹⁶ Ka akaa a né er a ne: Ôron nen kwagh sha mimi, hanma or a orgen; ôron nen ijir sha mimi man sha bem hen ihindagar yen;

¹⁷ ma or ken aven nana̱ de kera henen ifer ken ishima i nan sha or u wan ndor a nan ga; mbum u sha aie a̱ de kera doon ne ga; gadia akaa angan cii, M kôr a ihom, kape TER A kaa ne.

¹⁸ Kwaghôron u TER u akum a Sha shi va her a mo er:

¹⁹ TER u akum a Sha ngu kaan nahan er: Kwaghyan u hôron u sha uwer u sha unyiin man u sha utaan man u sha utaankaruhar man u sha pue, una hingir Yuda kwagh u msaanyol man u iember man uiniongo mba dedoo; nahan yô mimi man bem ve̱ doo ne ishima.

²⁰ TER u akum a Sha ngu kaan nahan er: Akuraior shi aa va kua ior mba teman ken agar kpishi,

²¹ mbateman ken gar ugen vea za hen ugen, vea kaa er: Sé yem nen fefa, sé za ker nen mrumun u sha mhôôn u TER, man sé ker nen TER u akum a Sha; mo kpaa me za.

²² Een, ior kpishi man akuraior a ageegh vea va sha u keren TER u akum a Sha ken Yerusalem, man sha u keren mrumun u sha mhôôn u TER.

²³ TER u akum a Sha ngu kaan nahan er: Sha ayange la, iorov pue ken akuraior a hanma zwa cii vea kôr mkaikondo u Oryuda, vea kaa er: Sé za a ven imôngo, gadia se ungwa ser, Aôndo ngu a ven.