Sekaria 14 - ICIGHAN BIBILO

¹ Nenge, iyange i TER ngi van, i á kar ishar you ken atô wou yô.

² Gadia Me kohol akuraior cii á va nôngo ityav a Yerusalem, á ngohol gar la, á kura akaa a ken ayou, á nzughul a kasev; vegher u gar á yem a ve uikangen; ior mba vea shi la, á tim ve ken gar la kera ga.

³ Zum la TER Una due, Una nôngo ityav a akuraior la, er ka A nôngo sha iyange i utya nahan.

⁴ Sha iyange la angahar a Na aa tile sha uwo u Olev u u lu Yerusalem sha ishi, vegher u sha ityoughkitaregh la; uwo u Olev ua pav her atô, hii vegher u sha ityoughkitaregh yem shin ityôtar, zegepev una lu ken atô; vegherwo u môm una yem vegher u ken imbusutarimese, ugen di vegher u ken imbusutariyan.

⁵ Nea yevese nea kar shin pev u iwo Yam; gadia pev u iwo la una ar hen Asel je; nea yevese er lu ne yevese mtenger u tar sha ayange a Ushia tor u Yuda la nahan; tsô TER Aôndo Wam Una va a uicighan Nav cii.

⁶ Sha iyange la iwanger ia lu ga; akaa a engem aa hide ijime iyol i a.

⁷ Á lu iyange i môm i TER A fe i yô; á lu atetan ga, á lu tugh kpaa ga; kpa á va hingir aikighe yô, iwanger ia lu.

⁸ Tsô sha iyange la mngerem ma umam maa due ken Yerusalem; tiôn u ma ugen una yem sha zegemnger u sha ityoughkitaregh man tiôn ugen shin zegemnger u shin ityôtar; fam kua inyom kpaa, á lu nahan.

⁹ TER Una tema tor sha tar cii; sha iyange la TER Una lu môm man iti Na kpaa ia lu i môm.

¹⁰ Tar la cii ua hingir shambe shambe, á hii hen Geba zan zan á za hen Rimon hen Yerusalem vegher u ken imbusutariyan la; kpa Yerusalem una tav sha, una lu hen ijiir na, á hii hen Hundagar u Benyamin zan zan á za ar hen ijiir i hunda u tsuaa la, kar za hen Hundagar u Zongo, man hii hen gôgôyou u taven u Hananel zan zan za ar hen ahungwa a shoghol wain a tor.

¹¹ Ior vea tema ker, mtim u sha ifan i wan una kera lu ga, Yerusalem una tema bem bem.

¹² Ka bouange u TER Una tsaha akuraior a a ve ityav sha Yerusalem cii a mi ne: Inyam ve ia hôô kera er ve til sha angahar a ve her la je, ashe ve kpaa aa hôô ken ategher, nombor ve kpaa ua hôô ken zwa ve.

¹³ Tsô sha iyange la injughul i vesen i i dugh hen TER ia ta sha a ve; hanma or nana gba or u wan ndor a nan sha uwe, uwegh ku orgenegh kua kende sha sha num a orgenegh.

¹⁴ Yuda je kpaa, una nôngo ityav a Yerusalem; man á kohol inyaregh ki akuraior a a kase un la cii: zenaria man azurfa man akondo, á ngee á dumbur.

¹⁵ Kape bouange inja ne nahan una haa sha anyinya man sha mbaalfadari man sha urakumi man sha ujaki man hanma zendenya u a lu ken afo la cii.

¹⁶ Tsô hanma or u nan shi ken akuraior a a ve ityav sha Yerusalem la, nana kôndon anyom anyom sha u za civir Tor, TER u akum a Sha, man sha u eren iniongo i atumbe kpaa.

¹⁷ Tsô á hingir u hanma tsombor ken icombor i sha tar cii ua za sha Yerusalem sha u za civir Tor, TER u akum a Sha la ga yô, ura ua kera nôô her a ve ga.

¹⁸ Aluer tsombor u Igipiti ua kôndo, ua va ga yô, mba ura u kera nee hen ve ga la, bouange una tser ve, u TER A tsahan akuraior a mi a a kende sha u za eren iniongo i atumbe ga la.

¹⁹ Ngun ka mtsaha u Igipiti man mtsaha u akuraior cii a a kende, sha u za eren iniongo i atumbe ga yô.

²⁰ Sha iyange la á nger sha amem a anyinya er: Icighankwagh u TER; ityev mbi ken iyou i TER kpaa mbia hingir er ka agbande a sha ishigh ki atse a nanden nagh sha mi la nahan.

²¹ Een, hanma ityegh ki ken Yerusalem man ki ken Yuda kia hingir icighankwagh u TER u akum a Sha; mbanan iniav cii kpaa, vea va tôô ki, vea jiidi kwagh shimi; sha iyange la ma Orkanaan nana kera lu ken iyou i TER u akum a Sha ga.