Sekaria 12 - ICIGHAN BIBILO

¹ Ka mkaanem ma TER ôr sha Iserael. TER ngu ôron kwagh, Un u A samber Usha, u A tim imagh ki taregh, man A er jijingi u or ken a nan yô, er:

² Nenge, M ngu eren Yerusalem a̱ hingir iyongo i nan ior mba ve kase un la cii, ve̱ hingir zemba ze zemba; man sha Yuda kpaa ia lu nahan, zum u á kase Yerusalem sha utya la.

³ Tsô sha iyange la, Me er Yerusalem una hingir ior cii iwen i yuhwan; mba vea kende i sha cii, vea vihi ayol a ve tsung; akuraior a sha tar cii aa kohol imôngo á ta num sha i.

⁴ Sha iyange la, kape TER A kaa ne, Me ta hanma nyinya mciem iyol, man orhendan un kpaa Me ta nan ihundugh. Me bugh ashe Am sha ya u Yuda man Me pir hanma nyinya u akuraior cii ashe.

⁵ Nahan mbahemenev mba ikwe i Yuda vea kaa ken asema a ve er: Mbateman ken Yerusalem, mba agee am ken TER u akum a Sha, Aôndo ve la.

⁶ Sha iyange la Me er mbahemenev mba Yuda vea hingir er gbande u lun a usu ken atô u ikon, man er ikaghusu ken atô u aile a uyia nahan; vea nande akuraior a a kase ve la cii ken iyan kua ken imese kpaa; Yerusalem una lu her hen ijiir na, ka hen Yerusalem je la.

⁷ TER Una vande yiman utenti mba Yuda, sha u icivir i ya u Davidi man icivir i mbateman ken Yerusalem i̱ de hemban i i Yuda la ga.

⁸ Sha iyange la TER Una kumba mba ve tem ken Yerusalem; u nan lu seelee kpaa, sha iyange la nana hingir er Davidi nahan; ya u Davidi kpaa una hingir er Aôndo nahan, er Ortyom u TER nahan, sha ishigh vegh.

⁹ Tsô sha iyange la Me ker u timin akuraior a a mough num a Yerusalem cii.

¹⁰ Me haa Jijingi u mhôôn man u zamber sha ya u Davidi man sha mba ve tem ken Yerusalem; man vea kenger Mo u ve komom la; vea zungwe Un er or ka nan zungwe wan u nan u môm môm nahan, asema aa vihi ve sha ci Na, er ishima ka i vihi or sha wan u nan u iunda yô.

¹¹ Sha iyange la ijungwen i ken Yerusalem ia vese er ijungwen i Hadadi-rimon shin pev u Megido nahan.

¹² Tar ua zungwe, hanma tsombor kposo; tsombor u ya u Davidi kposo, kasev vev kpaa kposo; tsombor u ya u Natan kposo, kasev vev kpaa kposo;

¹³ Tsombor u ya u Levi kposo, kasev vev kpaa kposo; tsombor u ya u Shimei kposo, kasev vev kpaa kposo;

¹⁴ icombor i i shi her cii, hanma tsombor kposo, kasev vev di kpaa kposo.