Sekaria 10 - ICIGHAN BIBILO

¹ Sôn nen TER ura u sha ayange a ura u masetyô la; ka TER A er inyiar ye, Una na ve ura u vesen, hanma or nana zua a akaamenden ken sule.

² Gadia terafim ôr gbilinkwagh, mbaasorov kpaa mba nengen aie, mba ôron mnyam ma cien ma aiem, mba sur ior asema gbilin; ka nahan man ve zenden er iyôngo nahan, ican ngi eren ve, sha ci u orkuran ngu ga.

³ Iyugh Yam ngi yeghen sha mbakuran, Me tsaha ukpev; gadia TER u akum a Sha va sôr ikumuile Na, ka ya u Yuda je la, Una gema ve vea hingir er nyinya Na u dedoo ken utya yô.

⁴ Ka ken a ve iwen i sha zongo ia due ye, imande i tenti kpaa ka ken a ve, adautya kpaa ka ken a ve, ka ken a ven kpaa hanma ortaregh nana due ye.

⁵ Vea hingir er mbaageev mba ve ndyar angahar shin angbiôr a sha akômaigbinda ken utya yô; vea nôngo ityav, gadia TER ngu a ve; mbaanyinyav vea va ahenge.

⁶ Me taver ya u Yuda, Me yima ya u Yosev kpaa. Me hide a ve, gadia mhôônom kôrom a ve, vea hingir je á bee er lu M ta ve kera ga nahan; gadia Mo M ngu TER, Aôndo ve, Me ungwa ve kpaa.

⁷ Eferaim kpaa una hingir er orageegh yô, ishima ve ia ember er ka vea ma wain nahan; ônov vev vea nenge nahan, vea ember, ishima ve ia ember ken TER.

⁸ Me yila ve sha hondo, Me kohol ve, gadia M paa ve; vea ngee er ve vande ngeen nahan.

⁹ Shin er M tsenda ve ken akuraior nahan kpaa, vea umbur Mo ken ityar i caa; vea lu uma her a ônov vev, man vea hide kpaa.

¹⁰ Me shi Me due a ve ken tar u Igipiti kpaa, Me kohol mba ve lu ken Ashiria, Me va a ve ken tar u Gileadi man u Lebanon, ijiir i teman ia yina ve.

¹¹ Vea kar ken zegemnger u ican, á gbidye agôndo a zegemnger; aiv a Nil cii aa uma; á shiligh a ihagh i Ashiria inya, tôgh ku torough ku Igipiti kpaa kua kar kera.

¹² Me taver ve ken TER; vea zenden ken iti Na, kape TER A kaa la.