Sefania 2 - ICIGHAN BIBILO

¹ Kohol nen imôngo, een, kohol nen, we, ikurior i lun a kunya ga ne,

² je er i lu a pase awashima la ga yô— iyange ngi karen er imough nahan— je er iyugh i TER i tsung la i lu a va sha a ven ga ne, man er iyange i iyugh i TER i lu a va sha a ven ga ne.

³ Ker nen TER, ne mbaasemaleghlegh mba sha tar cii, ne mba ne we atindi a Na iko; ker nen perapera, ker nen ishima i legh legh, tsô alaghga á yer ne sha iyange i iyugh i TER la.

⁴ Gadia á ta Gasa kera man Asekelon una hingir ice; á zenda Ashedodi iyange sha tembe, man á wuhe Ekeron kera.

⁵ Kwagh á tser mba ve tem ken kpezegemnger, ikurior i Mbakereti! Kwaghôron u TER ngu num a we, we, Kanaan, tar u Mbafiliti; Me tim u, je orteman ker nana kera shi ga.

⁶ Kpezegemnger kpaa ua hingir ijiir i ilev yan toho, man ajiir a tsan sha ci u mbakuranilev, man atôr sha ci u ikumuile.

⁷ Kpezegemnger ua hingir kwar u asande a ya u Yuda a a shi her la; vea koso ilev vev keregh; vea yav ken ayou a Asekelon iyange i been; gadia TER Aôndo ve Una umbur ve, Una gema mlu ve.

⁸ M ungwa tarnahan u Moabi man iheen i Mbaamon, i ve hee ior Av, man er ve va tseen sha tar ve yô.

⁹ Nahan yô, TER u akum a Sha, Aôndo u Iserael ngu kaan nahan er: Er M lu u uma yô, mimi je, Moabi una hingir er Sodom, man Mbaamon er Gomora nahan, ijiir i imo menden her man ahungwa a bar, man ice gbem sha won; asande a ior Av aa sar ve, man asande a ikurior Yam a a shi her la aa ngohol ve.

¹⁰ Kwagh ne una er ve sha ci u iyolgengese ve, sha ci u ve hee ior i TER u akum a Sha, man ve va tseen sha a ve yô.

¹¹ TER Una cier ve iyol; gadia Una bunde icivir i mbaaôndo mba shin tar cii kera; ior vea civir Un hanma or hen ijiir i nan, ityar i shin kpezegemnger i akuraior cii.

¹² Ne Mbaetiopia kpaa á wua ne sha sanker Wam.

¹³ Una naregh uwegh Nagh sha imbusutarimese, Una tim Ashiria Una gema Nineve á hingir ice man iomborinya er desereti nahan.

¹⁴ Akum a ibua aa yav ken atô na, man hanma inja i ishôso cii; akumedu man adendem vea tsa ken uindyuruku nav, mba gberen imo sha uwindou; mtim una lu sha agbur a ihinda a uya, gadia i bugh tom u sha ikon i sedar la kera.

¹⁵ Ngun ka gar u iember u a tema bem bem, u a kaa ken ishima na er: Ka mo je ne, mô ugen ngu ga, saa mo; yô, nenge er a hingir ice man ijiir i inyamtoho i yaven her yô; hanma or u karen her nana gbire iwer man nana mishi uwegh.