Rutu 2 - ICIGHAN BIBILO

¹ Naomi lu a anmgbian u nom na, lu shagbaor, ken tsombor u Elimeleki, iti na er Boashi.

² Un Rutu, wan u Moabi la, kaa a Naomi er: Ma m ze ken ityev, ma m za yar twar u asagher a uyia hen or u mhôônom maa kôr nan a mo yô. A kaa a na er: Gba zan tsô, wan wam.

³ Tsô a za, a gba za yaren twar ken sule ken ijime i mbasundav; ikôr lagh un, a nyôr ken sule u Boashi, u a lu ken tsombor u Elimeleki yô.

⁴ Tsô hen shighe la Boashi za due ken Betelehem va, a kaa a mbasundav er: TER A̱ lu a ven. Ve di kpaa ve gema ve kaa a na er: TER A̱ ver u doo doo.

⁵ Tsô Boashi pine wanakiriki na, u a nengen sha mbasundav la er: Ka wankwase u an laa?

⁶ Un wanakiriki u nengen sha mbasundav la gema kaa a na er: Ka wankwase u Moabi u a hir vea Naomi imôngo ken tar u Moabi yô;

⁷ man a kaa er: Shi nam nen ian m̱ yar twar hen aile ken ijime i mbasundav; tsô a va, a gba va yaren pepe je zan zan hegen ne; a mem ken ya cihôn tsô.

⁸ Nahan Boashi kaa a Rutu er: Ungwa ase, wan wam kwase, de kera za yaren twar ken sule ugen ga, man shi de kera karen heen kera kpaa ga, kpa luun a ônkasev av imôngo.

⁹ Yô, nenge sha sule u ve sondo yô, dondo ve ijime; m ta mbayev av icin mer, ve̱ de benden we ave gaa. Shighe u imura ia kôr u yô, za hen atumnger za ma mngerem ma mbayev ve kese la.

¹⁰ Tsô a shirigh a gure, a wa ityough inya, a kaa a na er: Er nan man mhôônom ma ker u a mo, man u wem iko, mo u m ve a va shir nee?

¹¹ Boashi gema kaa a na er: I pasem kwagh u u er a ngô u nomu la wanger wanger, er nomu kpe kera la; man er u undu teru man ngôu man tar u i mar u ker kpaa, man u va hen ior mba u vande fan ve ga yô.

¹² Yô, TER A̱ er a we dedoo sha aeren a ou la, ma u zough a injar i kuman gbing gbing hen TER Aôndo u Iserael u u ve u va ker ijiir i memen shin akper a Na yô.

¹³ Tsô a kaa er: Mhôônom kôr u a mo terem, gayô, u surum ishima u ôr kwagh u dedoo a wanye wou u kwase, shin er m lu er mô kwase u ken kasev mba shiren we ga nahan kpaa.

¹⁴ Sha shighe u kwaghyan la, Boashi kaa a na er: Va heen, va coon bredi, ya, civ shin vineger. Tsô a tema a mbasundav; a na un alakema u i mgbagh un sha usu yô, a ya kuma un, a ver u hemban la her.

¹⁵ Moughon u za yaren twar yô, Boashi kaa a mbayev nav er: De nen un a̱ yar twar zan zan ken atô u aile je kpaa, de zehe nen a na ga.

¹⁶ Man shi tsuwa nen ken aile sha ashighe ashighe undu nen sha ci na, a̱ yar twar, de yangen nen un ga.

¹⁷ Nahan a yar twar zan zan iyange bee un ken sule la, tsô a gbire kwagh u a yar twar yô, a zua a samshair kuma efa môm nahan.

¹⁸ Tsô a tôô a nyôr ken gar; ngô u nom na nenge kwagh u a zough a mi sha twar u yaren yô; shi a va a kwagh u a ya hemba un la, a na un.

¹⁹ Ngô u nom na la, kaa a na er: Ka han u yar twar nyiana? Man ka han u er tomo? Iveren i̱ lu sha or u a we u iko la. A pase ngô u nom na or u un yar hen a na la, a kaa er: Iti i or u m yar her a na nyian la er Boashi.

²⁰ Naomi kaa a kwase u wan na er: TER A̱ ver un dedoo, wen u a de u tesen mbaumav kua mbakpenev kpaa, erdoo na ga la. Naomi shi kaa a na er: Or la ka anmgbian wase u ikua ikua je, man shi ka or môm ken mba vea fatyô u paan kwagh wase kpaa.

²¹ Tsô Rutu wan u Moabi kaa er: Een, a kaa a mo er: Lu a mbayev av zan zan ve̱ kar been sunda wam cii.

²² Naomi kaa a Rutu kwase u wan na la er: Doo tsô, wan wam, zenden a ônkasev nav imôngo sha u ma or nana̱ de nzughul a we ken sule ugen ga yô.

²³ Nahan a lu a ônkasev mba Boashi la, a gba yaren twar zan zan sunda u shair man u alakema kar been; a lu vea ngô u nom na imôngo.