Orpasenkwagh 8 - ICIGHAN BIBILO

¹ Ka an nan lu er orfankwagh nahana? Ka an nan fe mpase u kwagha? Kwaghfan u or ka a na ishigh ki nan ki wanger, ka a gema mlu u gbua gbua u ishigh ki nan la.

² M kaa mer: wa tindi u tor iko sha ci u mbum u i bum Aôndo la yô.

³ De dugh sha ishigh nagh kera fefa ga, de norom sha kwagh u ifer ga, gadia ka a er hanma kwagh u a sar un yô.

⁴ Gadia imo i tor ngi a tahav; ka an nana fatyô u pinen un er: Ka nyi u erene?

⁵ Hanma or u nan we tindi iko yô, nana kav kwagh u vihin ga; ishima i orfankwagh fa shighe kua gbenda kpaa;

⁶ gadia hanma kwagh yô, shighe na ngu, kua gbenda u una za yô; gayô, ifer i or ngi kighir nan;

⁷ gadia nan fa kwagh u una va er ga; man ka an nana fatyô u ôron nan er kwagh una va luu?

⁸ Ma or ngu a tahav sha ahumbe u yangen a ga, shi nan ngu a tahav sha iyange i kuugh kpaa ga; ken utya yô, mba ne or gbenda ga, kape ifer kpaa ia war or u nan eren i ga la.

⁹ Akaa ne cii m nenge, shi m ver ishima m nenge tom u i eren shin tar cii, shighe u or ka nana lu a tahav sha orgen yô, nan eren nan ican.

¹⁰ Tsô m nenge i ii aferaior, ve sen shin uwar, man mba ve lu eren dedoo la, i gema i dugh ve ken ijiir i wang kera, ve hungul ken gar kpaa; kwagh ne kpaa ka gbilinkwagh.

¹¹ Ka er i kur ijirôron i sha tom u ifer fefa ga yô, man ishima i ônov mba iorov i taver sha u eren ifer nahan ye.

¹² Orsholibo ka nan er ifer kwa deri, kpa nan tsa sha won; nahan kpaa, m fa mimi je, mba ve cie Aôndo yô, vea tema doo doo, gadia ve cia Un;

¹³ kpa mkpeyol una lu hen orifer ga, man ayange a nan kpaa aa lihe er mure nahan ga, gadia nan cie Aôndo ga.

¹⁴ Gbilinkwagh ugen u i eren sha won yô, ka kwagh u ka a tser ior mba perapera er ka sha aeren a mbaaferev la; man shi mbaaferev kpaa kwagh ngu a er ve er ka sha aeren a mbaperapera yô; nahan m kaa mer, kwagh ne kpaa ka gbilinkwagh tsô.

¹⁵ Nahan m wuese ishar i haan iyol, gadia ma kwagh ugen u hemban doon or sha won er nana ya kwagh, nana ma kwagh i̱ saan nan iyol yô, ngu ga, gadia ia lu a nan ken tom u nan u sha ican la, sha ayange a uma u nan cii, a Aôndo A ne nan shin tar yô.

¹⁶ Shighe u m gem a ishima m ver sha kwaghfan sha u me nenge ityom i i eren sha won yô, gadia orgen ngu u tugh kua tetan cii nan kusun ashe sha mnya ga yô,

¹⁷ nahan m nenge tom u Aôndo cii, er ma or nana fatyô u kaven tom u i eren u shin tar la ga; gadia shin er nana nôngo nan, nana time u kpaa, nana kav ga; een, shin er orfankwagh nan henen er nan fa kpaa, nana kav u ga.