Orpasenkwagh 6 - ICIGHAN BIBILO

¹ Kwaghvihin ngu u m nenge a mi shin tar, a yuhwa ior kpaa:

² ka or u Aôndo A ne nan akaa kpishi, inyaregh man icivir, je nan kera ban a ma kwagh sha ci u uma u nan sha akaa a a sar nan la ga; nahan kpaa, Aôndo na nan tahav mbu yan a ga, kpa ka orgen nana ya a ye; kwagh ne kpaa ka gbilinkwagh, ka bocan je.

³ Aluer or nana mar ônov deri, nana tsa anyom kpishi kpaa, je zan zan ayange a anyom a nan kpaa a ngee, kpa uma u nan una iv a kwagh u doon ga, man á ii nan kpaa ga yô, m kaa mer, guda, iyav mbu vihin a or la,

⁴ gadia mbu va gbilin, man shi mbu hiden ken ime kpaa, iti i mbu, ime gema yer kera,

⁵ man mbu nenge iyange ga, man shi mbu fa i kpaa ga; yô, mbu a mmem hemba or la;

⁶ een, shin nana lu uma anyom dubu kwa har je kpaa man nana zua a iveren i dedoo ga—yô, akaa cii ka ijiir i môm tsô aa za gaa?

⁷ Tom u or u sha ican cii, ka sha ci u zwa u nan je, nahan kpaa kwagh kom isharen i nan la ga.

⁸ Ka sha nyi je orfankwagh nan hembe ibumeoro? Shin icanor, u nan fe u zenden sha ishigh ki uuma yô, nan hemba sha nyi?

⁹ Guda u nengen a kwagh sha ashe a u lun a isharen sha akaa wuee la; kwagh ne kpaa ka gbilinkwagh je, ka u zendan di ahumbe ityô tsô.

¹⁰ Kwagh u nan lu cii kpaa, i vande yilan iti i nan ngise je, shi i fa er nan lu or yô, nana fatyô u hendan a, u a hembe nan agee la kpaa ga.

¹¹ Er akaaôron a seer ngeen, gbilinkwagh di kpaa seer, nahan ka or a inja sha nyi?

¹² Gadia ka an nan fe kwagh u a hembe doon or sha mlu u nan sha ayange a uma u nan a gbilinigh cii, a a kar nan er mure la nahana? Gadia ka an nana fatyô u ôron or kwagh u una lu ken ijime i nan shin tara?