Orpasenkwagh 5 - ICIGHAN BIBILO

¹ Ver ishima sha nguhar wou zum u u zaan hen iyol i Aôndo yô; gadia u zan sha u za ungwan hemba doon a u nan nagh ku abumeaior la; gadia ve kera fa er ve lu eren ifer ga.

² De kera bughun zwa fefa ga, ishima you kpaa i̱ de kera kumbur sha u ôron ma kwagh sha ishigh ki Aôndo ga; gadia Aôndo ngu Sha man we u ngu shin tar, nahan yô, kwaghôron wou a̱ de ngeen ga.

³ Gadia mnyam ma cien ka ma va sha mngee u ityom, imo i ibumeor ka sha mngee u akaaôron.

⁴ Zum u wea tsegha zwa sha ishigh ki Aôndo yô, de kera ngôôr u eren sha mi ga, gadia doo Un a abumeaior ga; yô, er kwagh u u tsegh zwa sha mi la.

⁵ Guda ma u tsegha zwa ga, a u u tsegha zwa man u er sha mi ga la.

⁶ De rumun zwa wou u̱ haa u kwaghbo iyol ga, de kaan a ortyom u Aôndo wer, m tsume, ga; ka sha ci u nyi man Aôndo A̱ yuwe a imo you man A̱ tim tom u sha ave a ou la keraa?

⁷ Gadia er mnyam ma cien ma lu kpishi nahan, kape kwaghôron u gbilinigh kpaa a ngee la, kpa we yô, cia Aôndo!

⁸ Aluer wea nenge mkighir u i kighir icanor man mvihi u ijirôron kua mimi ken ipaven ugen yô, kwagh shon a̱ de kpiligh we iyol ga, gadia u a hembe tahav ngu kenger u a lu a tahav la, man shi mbagenev mba hemban ve kpaa mba.

⁹ Kwagh u a lu mtsera u tar sha hanma ijiir yô, ka tor u a we sule u kahan iko yô.

¹⁰ Or u azurfa a doo nan yô, azurfa una kuma nan ga; u nan keren inyaregh ki ngeen kpaa, mtsera una kuma nan ga; kwagh ne kpaa ka gbilinkwagh tsô.

¹¹ Shighe u inyaregh ka ki seer yô, mbayan ki di kpaa ve seer; yô, ki ornyar la a inja sha nyi, saa di u kenger ki sha ashe tsô gaa?

¹² Mnyam ma ortom ka ma dedoo, shin nana ya kwagh ciôn, shin kpishi kpaa, kpa m-ide u ornyar yô, una rumun nan nana yav ga.

¹³ Zegekwagh u vihin ugen ngu u m nenge a mi shin tar: inyaregh ki or ka nan koso la, ki gema ki hingir kwagh u vihin mlu u nan;

¹⁴ aluer inyaregh kila kia saa ishe sha ikôr i bo yô, nana mar wan kpaa, una lu a ma kwagh sha ave ga;

¹⁵ er nan dugh ken iyav mbu ngô u nan nahan, kape shi nana hide idyelegh er lu nan due la nahan, nana tôô ma kwagh sha tom u nan u ican la, nana yem a mi ga.

¹⁶ Kwagh ne kpaa ka zegekwagh u vihin je: er nan ve nahan, kape shi nana hide vough la; ka nyi mtser je nan ye sha tom u nan er sha ci u ahumbe laa?

¹⁷ Ayange a nan cii nan ye kwagh ken ime a ishima i vihin man angev kua iyugh.

¹⁸ Nenge, kwagh u m nenge a doo man a lu vough hen or yô, ka u nana̱ ya kwagh, nana̱ ma kwagh, nana̱ ember sha tom u nan cii, u nan er sha ican shin tar, sha ayange a nan a Aôndo A ne nan cii, gadia kwagh ne ka kwar u nan je la.

¹⁹ Hanma or kpaa u Aôndo A ne nan inyaregh kpishi man mkpeyol, man A shi A na nan agee u yan ki kpaa, man u ngohol ci u nan, man u ember ken tom u nan u sha ican la, ka iwua i Aôndo A ne nan je.

²⁰ Gadia nana kera umbur ayange a uma u nan la kpishi ga, gadia Aôndo ngu nan nan, nan ember ken ishima i nan.