Orpasenkwagh 3 - ICIGHAN BIBILO

¹ Hanma kwagh ngu a ayange na; man shighe kpaa ngu sha ci u hanma kwagh sha won:

² Shighe u maren ngu, man shighe u kpen, shighe u môôr kwagh, man shighe u wuhen kwagh u i môôr la kera;

³ shighe u wuan ngu, man shighe u waren; shighe u yôhôl, man shighe u maan kpaa;

⁴ shighe u mlia ngu, man shighe u ahan a sen; shighe u zungwen, man shighe u yaren kwan;

⁵ shighe u haan awen kera, man shighe u kohol awen; shighe u kuven, man shighe u den ikuven;

⁶ shighe u keren kwagh, man shighe u kwagh á gba saan tsô; shighe u koson kwagh, man shighe u haan kera;

⁷ shighe u anden, man shighe u koron; shighe u huan ving, man shighe u lamen;

⁸ shighe u lun a dooshima, man shighe u kôron ihom; shighe u nôngon ityav, man shighe u bem.

⁹ Ka nyi mtser man ortom nan zough a mi sha tom u nan ye ican sha mi laa?

¹⁰ M nenge tom u Aôndo A ne ônov mba iorov sha u vea nyoon iyol sha mi yô.

¹¹ A er hanma kwagh er a̱ doo ashe sha shighe na, man A shi A ver mtsôr ken asema a ve; nahan kpaa, or fatyô u timen fan tom u Aôndo A er sha hiihii je, zan zan mkur la kpaa ga.

¹² M fa ma kwagh u hemban doon ve ngu ga, saa u ember man u eren akaa a dedoo sha ayange a ve lu uma la cii.

¹³ Man shi er hanma or nana̱ ya kwagh, nana̱ ma kwagh, i̱ doo nan iyol ken tom u nan ye ican sha mi la cii; kwagh ne ka iwua i Aôndo je.

¹⁴ M fa hanma kwagh u Aôndo A er yô, una lu gbem; á seer ma kwagh sha mi ga, man á pande ma kwagh sha mi kpaa ga; Aôndo er un nahan, sha u ior ve̱ cia sha ishigh Nagh.

¹⁵ Hanma kwagh u a lu hegen yô, tsuaa je kpaa vande lun, kwagh u una va la, tsuaa je kpaa vande lun; Aôndo keren u hiden a kwagh u a vande karen kera yô.

¹⁶ Shi m nenge shin tar, hen ape ôron ijir la, nenge, ifer lu her; man hen ijiir i perapera kpaa, ifer shi lu her.

¹⁷ M kaa ken ishima yam mer, Aôndo Una ôr mbaperapera ijir kua mbaaferev cii; gadia kera yô, shighe u hanma kwagh ngu man u hanma tom kpaa.

¹⁸ M kaa ken ishima yam mer, kwagh ne ngu sha ci u ônov mba iorov, sha u Aôndo Una kar ve, ve̱ nenge er ve ayol a ve ve lu er ishôso nahan.

¹⁹ Gadia kwagh u a eren ônov mba iorov yô, ka un je shi ka a er ishôso ye, ka kwagh shon la môm ngu a tser ve cii ye; er ngun a kpe nahan, kape ngula kpaa a kpe la; een, ve cii iôôn ve ngi môm; or hemba ishôso sha ma kwagh je ga; gadia ka gbilinkwagh cii.

²⁰ Ve cii ka ijiir i môm vea za ye, ve cii ka shin vuulevu ve dugh, shi ka shin vuulevu kpaa vea hide ye.

²¹ Ka an nan fe er iôôn i or ia yem Sha man iôôn i ishôso yô, ia sen ia yem shin inyaa?

²² Nahan yô, ma kwagh u hemban doon ngu ga, saa u or nana ember ken ityom i nan tsô, gadia kwagh ne ka kwar u nan je ne; gayô, ka an nana hide a nan er nana va nenge kwagh u a er ken ijime i nan laa?