Orpasenkwagh 12 - ICIGHAN BIBILO

¹ Umbur u A gbe u la sha ayange a iyev ou, er ayange a bo a lu a va ga, anyom kpaa a lu a kuma ga, a ú va kaa wer: Kera gbam ishima ga la;

² er iyange man iwanger man uwer man asan vea lu a wa ime ga, man abeen kpaa a lu a kohol her ken ijime i ura ga la;

³ sha iyange i mbakuranya vea kunde akarkase iyol, mbaageev kpaa vea ngurum, mbawuan sha nase kpaa vea de tom ve, sha ci u ve ngee ga, mba ve kenger sha a-an kpaa, ime ia wa ve,

⁴ man á wuhe ihinda i sha gbenda la; iov i wuan sha nase kpaa ia pande, man nana mough sha sha imo i inyon kpaa, man imo a atsam cii kpaa aa kera taver ga;

⁵ een, nana cia kwagh u taven, akaa a cieryol aa lu sha gbenda, kon u amondi kpaa ua kpar, ahungwa kpaa una hingir zumbee, isharen kpaa ia bee kera; gadia or ngu zan hen ya u nan u tsôron, man mbazungwen mba zenden sha igbenda;

⁶ man kor u azurfa kpaa ua mase tôndon ye, isheghmkure i zenaria kpaa ia gba ia hembe, ityumnger kpaa ia hembe hen imbormnger, ikaver i ikyekye kpaa ia sombo hen ijôr,

⁷ man vuulevu shi ua hide shin inya er i lu tsuaa nahan, jijingi kpaa una hide her Aôndo U lu na un yô.

⁸ Gbilinkwagh u agbilinakaa, kape Orpasenkwagh kaa la, ka gbilinkwagh cii.

⁹ Man shi er Orpasenkwagh a lu orfankwagh yô, a gba zan hemen u tesen ior mfe; een, a hen, a time, a dugh anzaakaa kpishi.

¹⁰ Orpasenkwagh ker er una zua a akaaôron a dedoo, man kwagh u i nger jighilii yô, ka akaaôron a mimi je la.

¹¹ Asemberakaa a mbafankwagh nga er utakera yô; man er ukusa mba i mande i taver yô, kape akaaôron a i kohol a imôngo a lu la, ka hen orkuran môm a dugh ye.

¹² Ken masetyô yô, wan wam, er teghelee; m-er u i er uruamabera kpishi la yô, ikighir ngi ga; takerada u henen kpishi ne iyol i kpen.

¹³ Ngun ka mkur u kwagh, u i vande ungwan la cii: Cia Aôndo, waan atindi Na iko; gadia ngun ka kwagh u ior cii ma ve er je ne.

¹⁴ Gadia Aôndo Una va a hanma tom hen ijir kua hanma kwaghmyer kpaa, shin a lu u dedoo, shin a lu u bo kpaa.