Orpasenkwagh 1 - ICIGHAN BIBILO

¹ Akaaôron a Orpasenkwagh, wan u Davidi, tor u ken Yerusalem:

² Gbilinkwagh u agbilinakaa, kape Orpasenkwagh a kaa ne, gbilinkwagh u akaagbilinigh, ka gbilin cii.

³ Ka nyi mtser je or nana zua a mi sha tom u nan u sha ican cii u nan lu eren shin tara?

⁴ Kov ugen ka u kar, ugen shi u va, kpa tar yô, ngu gbem sha won.

⁵ Iyange ka i due, man iyange ka i mire, i tolough yemen u zan henpe ka i due la.

⁶ Ahumbe ka a ver ishigh a za ken imbusutariyan, shi a gema a za ken imbusutarimese, nga ningir gbem sha gbenda u a, man ahumbe shi a hide henpe a vande ningir yô.

⁷ Uifi cii mba kough mba za hee shin zegemnger, nahan kpaa zegemnger ivin ga; henpe uifi ka vea ver ishigh la, ka her je, shi ka ve za ye.

⁸ Akaa cii vôr gbida gbida, gande u ôron; ishe ngi idi sha mnenge ga, togh kpaa ku idi sha m-ongo ga.

⁹ Kwagh u a vande lun, shi ka un una lu ye, kwagh u i vande eren ka un je shi á er ye; ma kwagh u he ngu sha won ga.

¹⁰ Kwagh ugen ngu u or nana ter nana kaa er: Nenge, kwagh ne ka u he kpa? A vande lun sha won sha ayange a tsuaa, a se lu a lu ga la.

¹¹ Mba umbur ior mba tsuaa ga, man mba ve lu van ken hemen kpaa, mba vea mase van vea umbur di ve ga.

¹² Mo Orpasenkwagh ne, m lu tor u Iserael ken Yerusalem.

¹³ M ver ishima sha u me ker man me time sha kwaghfan sha akaa cii a a eren sha won yô; ka kwagh u ican tsung je, u Aôndo A ne ônov mba iorov sha u vea er tom u nyoon iyol sha mi yô.

¹⁴ M nenge tom u i eren shin tar cii; yô, nenge ase, ka gbilinkwagh ci ca, ka u zendan ahumbe ityô tsô!

¹⁵ Kwagh u a vande huren kera yô, á fatyô u hingir jighilaa ga, man kwagh u a lu ga yô, á fatyô u ôron iyenge na ga.

¹⁶ M ôr kwagh a iyol yam, m kaa mer: Nenge, m zua a kwaghfan kpishi hemba mba ve vande lun a mo ken Yerusalem cii; een, ishima yam zua a kwaghfan kua mfe wuee.

¹⁷ M ver ishima yam sha u fan kwaghfan kua mfe, man sha u fan ihundugh kua ibumegh; tsô m kav, ngun kpaa ka u zendan di ahumbe ityô tsô.

¹⁸ Gadia sha kwaghfan kpishi, mye u ican kpaa ngu di kpishi; or u nan seer mfe yô, nan seer ishima i vihin kpaa.