Obadia 1 - ICIGHAN BIBILO

¹ Ka mpase u sha mnenge u Obadia ne: Ter AÔNDO ngu kaan sha kwagh u Edom nahan er: Se ungwa loho hen TER, i tindi ortyom hen akuraior er: Mough nen sha, sé za nôngo nen ityav a na.

² Nenge, M gema u u hingir kpeghee ken akuraior; mba lahan we tsung.

³ Imanger i ken ishima you la, tsugh u, we u u tem ken ihighaavande, we u ijiir i teman you i tav sha ne, u u kaan ken ishima you wer: Ka an nana hungwa a mo shin inyaa?

⁴ Shin er u yem sha je er gafa nahan, shin er u we iya you sha asan je nahan kpaa, ka sha her je Me hungwa a we shin inya ye, kape TER A kaa ne.

⁵ Aluer mbaiv vea va her a we, shin mbanumungbenda tugh— nenge, er i tim u kera yô!— vea kera ii kwagh zan zan á kuma ve tsô gaa? Aluer mbasundan atam a wain vea va hen a we yô, vea kera shi kwagh her, á yar twar gaa?

⁶ Nenge er i ker ikav mbi Isou vighe vighe yô! Man nenge er i ker akaa a na a injaa a i koso a ken myer la!

⁷ Mbawasen we la cii ve tsugh u, ve zenda u zan zan ar ken ikighirtar; mba ve tem bem a we ve tsugh u, ve hemba u kpaa; mba ve ye kwaghyan wou la, ve hôn u ityambelegh— mkav kpaa ngu ken a na ga.

⁸ TER kaa er: Sha iyange la Me kera tim mbafankwagh ken Edom man mkav kpaa sha uwo u Isou kera gaa?

⁹ Iyol ia kpe anomaior a ou, Teman, zan zan á wua hanmô ve sha uwo u Isou, á tim ve kera.

¹⁰ Sha ci u ipilakwagh u i er anngôu Yakob la, kunya ua kôr u, man á tim u sha won kera.

¹¹ Sha iyange i u tile her sha iyol i palegh, sha iyange i atôatyev va kura inyaregh nagh, man atôatyev nyôr sha ihinda na, ve er ishor sha Yerusalem la, we, u lu er u môm ken a ve nahan.

¹² De kenger anngôu a iember sha iyange i ican na ga; man de ember nen sha iyange i mtim u ônov mba Yuda ga; man shi de er kwagh sha imanger sha iyange i kwagh a tser ve la ga.

¹³ De nyer sha hundagar u ior Av sha iyange i bocan ve la ga; een, de kenger ve a iember zum u ican tser ve sha iyange i bocan ve la ga; man shi de ze uwegh sha ikav vev sha iyange i bocan ve la ga.

¹⁴ De til sha akahar a gbenda, sha u wuan ior nav mba ve yevese la ga; man shi de ne mbawaren nav sha ikev i mbaihomov sha iyange i ican la ga.

¹⁵ Gadia iyange i TER mgbôghom sha akuraior cii; er u er nahan, kape we di kpaa á er a we je la; ieren you ia hire sha ityough you.

¹⁶ Gadia er ne me sha icighanwo Wam nahan, kape akuraior cii aa maan gbem la; een, aa maan aa menan je aa hingir er nga a vande lun sha won ga yô.

¹⁷ Kpa sha uwo u Shion yô, á zua a mbawaren, ua hingir icighanjiir; man ya u Yakob kpaa una shi á ngohol tar na.

¹⁸ Ya u Yakob una hingir usu, ya u Yosev kpaa una lu nombor usu, ya u Isou yô, una lu ayia, vea yegh ker vea hia a; ma kwagh á shi ken ya u Isou ga, gadia ka TER A kaa nahan ye.

¹⁹ Mba ken Imbusutariyan la vea ngohol uwo u Isou; man mba shin Pev kpaa vea ngohol Mbafiliti; vea ngohol tar u Eferaim man u Samaria, Benyamin kpaa una ngohol Gileadi.

²⁰ Mbauikangenev mba ken ikum i Mbaiserael ne vea ngohol tar u Mbakanaan zan zan á za ar hen Sarefati; man mbaikangenev mba Yerusalem mba ve lu ken Sefaradi vea ngohol agar a ken Imbusutariyan la.

²¹ Mbayiman vea unde sha uwo u Shion sha u ôron uwo u Isou ijir; nahan tartor ua hingir u TER.