Numeri 9 - ICIGHAN BIBILO

¹ TER or kwagh a Mose ken desereti u Senai sha inyom i sha uhar sha uwer u hiihii er ve due ken tar u Igipiti kera la, A kaa er:

² Mbaiserael ve̱ ver ishima ve̱ yaan Paseka sha shighe u i ver la vough.

³ Uwer ne, sha ayange a u pue kar anyiin, aikighe, ya nen un sha shighe u i ver la, sha atindi na cii man sha akaawan a na cii kape ya nen un la.

⁴ Mose gema kaa a Mbaiserael er, ve̱ ya Paseka.

⁵ Tsô ve ya Paseka ken uwer u hiihii la, sha ayange a u pue kar anyiin, aikighe, ken desereti u Senai; er TER kaa Mose nahan, kape Mbaiserael ve er je la.

⁶ Kpa ior mbagenev lu, mba ve lu wang ga sha ci u ve bende a ikomor yô, nahan ve fatyô u yan Paseka sha iyange la ga; nahan ve va hen Mose vea Aron sha iyange la je;

⁷ ior mbala kaa a na er: Se yô, se kera mba wang ga, sha ci u se bende a ikomor yô, man ka nyi i yange se u nan TER nagh a Mbaiserael imôngo sha shighe u i ver laa?

⁸ Tsô Mose kaa a ve er: Hira tile, nen, m̱ ungwa kwagh u TER Una kaa sha kwagh wen ve.

⁹ Tsô TER ôr kwagh a Mose, kaa er:

¹⁰ Ôr kwagh a Mbaiserael kaa a ve wer: Aluer hanma or ken a ven shin ken tsombor wen nana kera lu wang ga sha ci u nan bende a ikomor yô, shin nana lu ken zende ca, nahan kpaa, nana ya Paseka u TER.

¹¹ Uwer u sha uhar sha ayange a u pue kar anyiin la, aikighe, ve̱ ya un sha bredi u i we kwa sha mi ga yô, kua ika i yuan;

¹² ve̱ de deen ma kwagh na a luun her zan zan sev mbu aven ga, man ve̱ de sombon kuhe na kpaa ga; ka sha atindi a Paseka vough ve̱ yaan un ye.

¹³ Kpa or u nan lu wang nan lu ken zende kpaa ga, man nan we iko u yan Paseka ga yô, i̱ dugh nan ken nongo u nan kera, gadia nan na TER nagh sha shighe u i ver la ga, or la nana tôô isholibo i nan.

¹⁴ Aluer shiror u nan va nyer ne a nyôr, man á sar nan ka yan Paseka u TER yô, nana̱ ya un sha tindi u Paseka kua kwaghwan na kpaa, lu nen a tindi môm sha ci u shiror kua or u tar la jim.

¹⁵ Iyange i i tim tabernakel la, ibeenegh sen cir tabernakel, ka tenti u shiada je la; iyange ia been yô, ki lu sha tabernakel er ka usu nahan zan zan sev mbu kar aven.

¹⁶ Kape i luun gbem la, ibeenegh ki cir un; tugh yô, ki lu er usu nahan.

¹⁷ Hanma shighe u ibeenegh kia moughon sha tenti kera yô, Mbaiserael ve mough ve gba yemen; henpe ibeenegh kia za tilen la, Mbaiserael ve haa afo heregh.

¹⁸ Ka sha imo i TER, Mbaiserael zenden ye, ka sha imo i TER kpaa, ve haan afo ye; ayange a ibeenegh kia tema sha tabernakel la cii, ve lu hen afo.

¹⁹ Ibeenegh kia lu sha tabernakel ayange a ngeen yô, Mbaiserael ve eren tom u TER, ve mough ga.

²⁰ Shighe gen yô, ibeenegh ki lu sha tabernakel anyangem kpeghee tsô; ka sha imo i TER ve haan afo, shi ka sha imo i TER kpaa ve moughon ve yemen ye.

²¹ Shighe gen yô, iyange i been nahan, ibeenegh ki lu her zan zan sev mbu av; zum u ibeenegh kia mough pepe yô, ve mough ve gba yemen; shin a lu tugh shin atetan ibeenegh kia mough yô, ve mough je ve gba yemen.

²² Shin a lu ayange ahar, shin a lu uwer, shin a lu inyom man ibeenegh kia tema sha tabernakel kia lu sha mi yô, Mbaiserael ve lu hen afo her, ve mough ga; kpa shighe u kia moughon yô, ve mough ve gba yemen.

²³ Ka sha imo i TER ve haan afo, shi ka sha imo i TER kpaa ve moughon ve yemen ye; ve wa kwaghôron u TER iko, er TER kaa Mose, Mose gema kaa ve nahan.