Numeri 5 - ICIGHAN BIBILO

¹ TER ôr kwagh a Mose, kaa er:

² Kaa Mbaiserael, ve̱ due a hanma orimande hen afo kera, man hanma or u kwagh a dugh nan ken iyol a nende inya yô, man hanma or u nan kera lu wang ga, sha ci u nan bende a ku yô.

³ Shin a lu nomsoor shin a lu kwase kpaa, due nen a ve, ve̱ yem ve̱ za lu ken akôngoafogh, sha u ve̱ de hôngor afo ve, a Mo M tem ker la ga.

⁴ Tsô Mbaiserael er nahan, ve due a ve er ve̱ za lu ken akôngoafogh; er TER kaa Mose nahan, kape ônov mba Iserael ve er la.

⁵ TER shi ôr kwagh a Mose kaa er:

⁶ Kaa a Mbaiserael wer, á lu nomsoor shin kwase nana er ma isholibo i ior ve eren yô, nan kera er a TER sha mimi ga, man ibo á kôr nan yô,

⁷ nana̱ pase kwaghbo u nan er la; nahan nana̱ hide a kwagh u nan lu a ibo sha mi la her vough, nana̱ seer môm-ken-utaan sha mi, nana̱ na or u nan er nan kwaghbo la.

⁸ Kpa aluer or la nana lu a orpaan u nana ngohol kwagh u á hide a mi la ga yô, nahan kwagh u á hide a mi la, una hingir kwagh u TER, ka kwagh u pristi je la, kua nomiyôngo u wamen a mi kpaa u a na iwom a mi sha ci u nan la.

⁹ Hanma nagh ku kenden sha sha uicighanmbaakaav mba Mbaiserael cii, ku ve va na pristi yô, ku̱ hingir kwagh na je.

¹⁰ Uicighanmbaakaav mba hanma or cii, ve̱ hingir kwagh na, kwagh u hanma or nan ne pristi yô, a̱ hingir kwagh na.

¹¹ TER shi ôr kwagh a Mose kaa er:

¹² Ôr kwagh a Mbaiserael, kaa a ve wer, aluer kwase u ma or una kar kpe, una er nan kwaghbo,

¹³ orgen nana yav a na, nom na nana fa ga, man kwagh la kpaa una due ken igbar ga, shin er a hôngor iyol na nahan kpaa, man a zua a shiada sha na ga, shi a kohol un a kwaghbo la ave kpaa ga yô,

¹⁴ aluer jijingi u wan iyol sha kwagh una kende nan sha kwagh u kwase u nan, er a hôngor iyol kera yô; shin jijingi u wan iyol sha kwagh una kende nan sha kwagh u kwase u nan, una hôngor iyol ga kpaa,

¹⁵ or la nana̱ va a kwase u nan la hen pristi, nana̱ va a nagh sha ci u nan, mwem ma shair ma ma kom môm-ken-upue u efa; nana̱ de hee mkurem sha mi ga, shin nana̱ de we libano u human doon sha mi kpaa ga, gadia ka nagh ku sha samuyia ku iyol i wan sha kwagh, ka nagh ku sha samuyia ku umbur kwagh, ku ku umbur ifer yô.

¹⁶ Pristi a̱ kporom a kwase la, a̱ ver un sha ishigh ki TER;

¹⁷ nahan pristi a̱ tôô icighanmnger hen ityegh ki inyaagh, pristi a̱ ongo vuulevu hen inya ken tabernakel, a̱ haa shin mnger;

¹⁸ tsô pristi a̱ ver kwase la, a̱ tile sha ishigh ki TER, a̱ sagh kwase la ice, a̱ penda nagh ku sha samuyia ku umbur kwagh sha ave a kwase la, ka nagh ku sha samuyia ku iyol i wan sha kwagh je la; pristi a̱ gema a lu a mngerem ma nan mnyoonom ma van a ifan sha uwegh nagh;

¹⁹ pristi a̱ er kwase la a̱ bum, a̱ kaa a kwase la er: Aluer orgen nan yav a we ga, man er u lu a nomu ne, wea kaha wea er kwagh u hôngorough ga yô, u ngu a ishô sha mngerem ma nan mnyoonom ma van a ifan ne, ma de eren we kwagh ga;

²⁰ kpa aluer u kaha er u lu a nomu ne, u hôngor iyol you, orgen u nan lu nomu ga nan yav a we yô,

²¹ pristi a̱ er kwase la a̱ bum mbum u wan or ifan, pristi a̱ kaa a kwase la er: TER A̱ er u hingir kwagh u wan ifan a mi man u eren ishor a mi hen ior ou, sha m-er u TER Una er u akooso ou á uma man iyav ou mbua mor la.

²² Mngerem ma van a ifan man maa nyôr u shin uya maa mor u iyav, maa uma u akooso; nahan kwase la a̱ rumun er: Amen, Amen.

²³ Nahan pristi a̱ nger ifan la sha ruamabera, a̱ ôô i shin mngerem ma nan mnyoonom mara;

²⁴ a̱ na kwase la, a̱ ma mngerem ma nan mnyoonom ma van a ifan mara; tsô mngerem ma van a ifan mara maa nyôr un shin uya, maa gba nyoon un.

²⁵ Pristi a̱ ngohol nagh ku sha samuyia ku iyol i wan sha kwagh, sha ikev i kwase la, a̱ cia nagh ku sha samuyia kura sha ishigh ki TER, a̱ va a ku hen atse a nanden nagh sha mi;

²⁶ pristi a̱ ongo nagh ku sha samuyia kura ikevwe poo i̱ lu nagh ku umbur ku ku, a̱ nande ku sha atse a nanden nagh sha mi; ken masetyô yô, a̱ na kwase la mngerem mara a̱ ma.

²⁷ Una na kwase mngerem mara una maan yô, aluer una hôngor iyol na, una er nom na kwaghbo yô, mngerem ma van a ifan mara maa nyôr un ken uya, maa gba nyoon un, iyav nav mbua mor, akooso na aa uma, kwase la una hingir kwagh u wan ifan a mi hen ior nav.

²⁸ Kpa aluer kwase la una hôngor iyol na ga, una lu wang yô, una war una mar ônov.

²⁹ Ka tindi u iyol i wan sha kwagh ne: Aluer kwase u lun a nom una kar kpe una hôngor iyol na,

³⁰ shin aluer jijingi u wan iyol sha kwagh una kende or nana wa iyol sha kwase u nan yô, nana̱ ver kwase la sha ishigh ki TER, pristi a̱ er a kwase la sha tindi ne cii.

³¹ Or la nana lu a ibo ga; kpa kwase la yô, una lu a ibo iyol.