Numeri 35 - ICIGHAN BIBILO

¹ TER ôr kwagh a Mose hen ukpuunkpuun mba Moabi hen kpe u Yordan tiôn u hen Yeriko la, A kaa er:

² Kaa Mbaiserael ve̱ pande dyako u ve zough a mi la ve̱ na Mbalevi agar a teman ker, shi na nen Mbalevi akôngo a lun a toho sha ci u uile, a a kase agar la kpaa.

³ Agar la a̱ lu sha u ve̱ tema ker yô; akôngo a lun a toho la yô, ka sha ci u ilev vev man akaa a ve kua uzendenya vev cii.

⁴ Akôngo a lun a toho a agar a né na Mbalevi la yô, a̱ hii hen gil u gar la je a̱ yem ken hemen zan zan i̱ kuma aseva dubu, a̱ ningir a̱ tser cii.

⁵ Man shi kar nen akôngo a gar, aseva dubu uhar sha vegher u sha ityoughkitaregh, man vegher u ken imbusutarimese kpaa, aseva dubu uhar, vegher u shin ityôtar kpaa aseva dubu uhar man vegher u ken imbusutariyan kpaa kar nen aseva dubu uhar, gar a̱ lu hen atô; a̱ lu ve ajiir a uzendenya mba ken agar la vea yaan toho her yô.

⁶ Agar a né na Mbalevi yô, i̱ lu agar ataratar a waren ker la, a né na sha u or á wua or yô, nana̱ yevese nana̱ za ta ker yô; shi na nen agar agen akunduahar kar ahar kpaa.

⁷ Nahan agar a né na Mbalevi cii yô, ka agar akunduahar kar anigheni, a akôngo a uzendenya yan toho her sha mi imôngo.

⁸ Agar a né tsuwa ken kwar u Mbaiserael yô, mba ve ngee yô, ngohol nen hen ve i̱ ngee; mba ve lu kpuaa yô, ngohol nen hen ve kpuaa; ka sha mlu u dyako u vea ya la man vea pande agar a ve, vea na Mbalevi ye.

⁹ TER shi ôr kwagh a Mose A kaa er:

¹⁰ Ôr kwagh a Mbaiserael, kaa a ve wer: Zum u né per Yordan, né nyôr ken tar u Kanaan yô,

¹¹ tsuwa nen agar ver nen a̱ lu ne agar a waren ker; sha er or u nan woo or, nan woo or abu yô, nana̱ yevese nana̱ za ta ker yô.

¹² Agar la a̱ hingir ne ajiir a waren ker sha ikev i or u oron iyev la, sha er or u nan woo or la nana̱ de kpe ga, saa nana vande tilen sha ishigh ki ior, á ôr nan ijir ve.

¹³ Agar a né na la yô, a̱ lu ne agar a waren ker, ataratar.

¹⁴ Na nen agar atar yande Yordan shi na nen agar atar ken tar u Kanaan; a̱ lu agar a waren ker.

¹⁵ Mbaiserael kua orvannya man u nan lu shir ker a ven kpaa, agar ataratar la a̱ lu ve ajiir a waren ker; sha u hanma or u nan woo or abu yô, nana̱ yevese nana̱ za ta ker yô.

¹⁶ Kpa aluer nana gbidye or sha iyô je nana kpe yô, nan hingir orwuanor ve; orwuanor la, i̱ wua nan kpee.

¹⁷ Man aluer nana kôr iwen sha uwe i i kom u wuan or a mi, nana kema or je nana kpe yô, nan hingir orwuanor ve; orwuanor la i̱ wua nan kpee.

¹⁸ Shin aluer nana kôr ikagh ki konough ken uwe, ki ki kom u wuan or a mi, nana gbidye or je nana kpe yô, nan hingir orwuanor ve; orwuanor la, i̱ wua nan kpee.

¹⁹ Ka or u oron iyev la, nana wua orwuanor la ye; aluer nana kohol nan yô, nana̱ wua nan je.

²⁰ Aluer nana daa or sha ihom shin nana ta or ma kwagh sha apera je nana kpe yô,

²¹ shin nana ta or iju sha ihom je nana kpe yô, u nan te nan iju la, i̱ wua nan kpee, ka orwuanor je; or u oron iyev i awambe la, nana̱ wua orwuanor la, aluer nana kohol nan yô.

²² Kpa aluer nana daa or abu a lu sha ihom ga, shin nana ta or ma kwagh man a lu sha apera kpaa ga,

²³ shin nana gba kenden ma iwen i i kom u wuan or a mi, nana nenge ga, man ia za ta or, nana kpe yô, man nan kpaa nana vande lun ihom a or la ga, man nana wa ishima u vihin nan iyol kpaa ga yô,

²⁴ Ior ve̱ ôr ijir i or u nan woo or vea or u oron iyev i awambe la sha atindi ne;

²⁵ ior ve̱ war or u nan woo or la sha ikev i or u oron iyev i awambe, ior ve̱ hide a nan ken gar u waren ker, henpe nan yevese nan za te la; nana̱ lu ker zan zan zegepristi u i shigh un icighanmkure la a̱ kar kpen ve.

²⁶ Kpa aluer or u nan woo or la, nana aver ikighir i gar u nan za war ker henpe nan za te la,

²⁷ man or u oron iyev i awambe la nana kohol nan ken won u ikighir i gar u nan za war ker la yô, or u oron iyev i awambe la, nana wua or u nan woo or la yô, nana kera lu a ibo sha awambe ga;

²⁸ gadia ka u ma nan lu ken gar u nan za war ker la zan zan zegepristi ma a kar kpen ve; zegepristi una va kpeen kera yô, or u nan woo or la, nana̱ hide ken tar u nan, ape kwagh u nan a lu yô.

²⁹ Kwagh ne a̱ hingir ne tindi, eren nen nahan sha ikov ikov sha ajiir a en a ne tema cii.

³⁰ Or u nan woo or yô, i̱ wua orwuanor la sha mpase u mbashiada; kpa shiada u or môm yô, kuma u wuan or a mi ga.

³¹ Man shi de ngohol nen ipaa sha ci u uma u orwuanor ga, u nan lu a ibo i i kom ku yô, i̱ wua nan kpee je.

³² Shi de ngohol nen ipaa sha ci u or u nan za te ken gar u waren ker la ner, nana̱ hide nana̱ za tema ken tar u nan, er pristi a lu a kpe ga la ga.

³³ Nahan yô, de hôngor nen tar u ne tem ker ne ga; gadia awambe nga a hôngor tar; ma kwagh u á na iwom a mi sha ci u tar u i hee awambe sha u la ngu ga, saa awambe a or u nan hee a la.

³⁴ De hôngor nen a tar u ne tem ker, u Mo M tem hen atô u u ne ga; gadia Mo TER M tema hen atô u Mbaiserael.