Numeri 32 - ICIGHAN BIBILO

¹ Ônov mba Ruben man ônov mba Gadi, ve lu a ilev ngee kpishi; man er ve nenge tar u Yasar man tar u Gileadi lu tar u doon ilev yô,

² ônov mba Gadi man ônov mba Ruben ve va ôr kwagh a Mose man pristi Eleasar man mbahemenev mba ior la, ve kaa er:

³ Ataroti man Dibon man Yasar man Nimra man Heshebon man Eleale man Sebam man Nebo kua Behon;

⁴ tar u TER kôr ngohol sha ishigh ki ior i Iserael la, ka tar u doon ilev, man mbayev ou gema mba a ilev.

⁵ Shi ve kaa er: Aluer a doo u a vese yô, ma i ne mbayev ou tar ne ma u hingir u ve; de peren a vese yande Yordan keela ga.

⁶ Tsô Mose kaa a ônov mba Gadi man ônov mba Ruben er: Nahan yô, anmgbianev enev ve̱ za ityav, ne né tema heen zee?

⁷ Inja nan man ne eren ner asema a̱ hide ônov mba Iserael ijime ve̱ de peren ve̱ zaan ken tar u TER A ne ve la ga nahana?

⁸ Kape uter enev lu er zum u m tindi ve hen Kadeshi-barnea sha u ve̱ za nenge tar je la.

⁹ Er ve za hen pev u Esekol ve za nenge tar la yô, ve va na asema hide Mbaiserael ijime ve kera za ken tar u TER na ve la ga.

¹⁰ Ishima vihi TER sha iyange la tsung, nahan A bum, er:

¹¹ Mba ve dugh ken Igipiti ne, mô ve môm u nan kom anyom ikundu man u nan hembe nahan yô, nana nenge tar u M bum a Aberaham man Isaka man Yakob la ashe je ga, sha er ve dondom sha ishima i môm ga yô,

¹² saa Kalebu wan u Yefune Orkenishi, man Yosua wan u Nun, sha ci u ve dondo TER sha ishima i môm yô.

¹³ Ishima vihi TER a Iserael tsung je. A er ve, ve gba zenden ken desereti wue wue anyom akunduahar, zan zan kov u u er ifer sha ishigh ki TER la tim kera cii.

¹⁴ Nenge, ne mough sha ityough ki uter enev, ne tsombor u eren kwaghbo ne, sha u né seer ishimavihin i TER a Iserael i tsung la, i̱ za a za hemen yô.

¹⁵ Gadia aluer ne de u dondon Un yô, Un kpaa Una shi á de ve, vea lu ken desereti her, nahan né tim ior mban cii.

¹⁶ Tsô ve va her a na, ve kaa er: Sé maa atôrauile heen sha ci u ilev yasev man agar kpaa sha ci u mbayev asev mba kiriki;

¹⁷ kpa se yô, sé kange iyol i utya sé hemen Mbaiserael zan zan sé za ar a ve hen ijiir ve i teman; mbayev asev mba kiriki yô, vea hira lu ken agar a taver la, sha ci u ior mba ve lu ken tar ne.

¹⁸ Sé hide ken uya asev ga, saa Mbaiserael cii vea ya dyako, hanma or nana lu a dyako u nan.

¹⁹ Gadia se sé ya dyako a ve imôngo yande Yordan ga, yande keela cii, gadia se sé zua a dyako wase yande Yordan keen, vegher u sha ityoughkitaregh ne.

²⁰ Tsô Mose kaa a ve er: Aluer nea er nahan, nea kange iyol i utya sha ishigh ki TER sha u zan ityav yô,

²¹ man hanmô wen u nan kange iyol i utya yô, nana per Yordan sha ishigh ki TER, zan zan A za zenda mbaihomov Nav sha ishigh Nagh kera,

²² man á hemba tar la sha ishigh ki TER yô, ken masetyô la né hide nahan né kera lu a ibo sha ishigh ki TER man sha ishigh ki Iserael kpaa ga; tar ne kpaa ua hingir u wen sha ishigh ki TER.

²³ Kpa aluer nea er nahan ga yô, nenge, ne er TER isholibo, fa nen isholibo yen ia kôr ne.

²⁴ Yô, maa nen agar sha ci u mbayev enev mba kiriki man atôr sha ci u ilev yenev, man er nen er ne kaa nahan.

²⁵ Tsô ônov mba Gadi man ônov mba Ruben ôr kwagh a Mose, ve kaa er: Mbayev ou vea er er terem a kaa nahan.

²⁶ Mbayev asev mba kiriki man kasev asev man ilev yasev man hanma zendenya wase cii vea lu ken agar a Gileadi keela.

²⁷ Kpa se mbayev ou yô, sé per hanma or nan kange iyol i utya, sha ishigh ki TER, sha u zan ityav, er terem a kaa nahan.

²⁸ Tsô Mose ôr pristi Eleasar kwagh ve man Yosua wan u Nun kua mbavesen mba uya mba uter mba ikwe i Mbaiserael la kpaa.

²⁹ Mose kaa a ve er: Aluer ônov mba Gadi man ônov mba Ruben vea per Yordan a ven imôngo yô, hanma or u nan kange iyol i utya sha ishigh ki TER man á hemba tar la sha ishigh yenegh yô, na nen ve tar u Gileadi u̱ hingir u ve;

³⁰ kpa aluer vea rumun u peren a ven imôngo a iyol i utya ga yô, ve̱ zua a kwar ve a ven imôngo ken tar u Kanaan.

³¹ Tsô ônov mba Gadi man ônov mba Ruben gema kaa er: Kwagh u TER A kaa mbayev ou yô, kape sé er la.

³² Sé per sha ishigh ki TER a iyol utya, sé za ken tar u Kanaan; dyako wase u yan yô, á lu Yordan yande keen.

³³ Tsô Mose na ônov mba Gadi man ônov mba Ruben man vegherkwe u Manase wan u Yosev, tartor u Shihon tor u Mbaamor man tartor u Ogo tor u Bashan, tar la cii man agar a ker, a mkôngom ma a, agar a ken tar la cii.

³⁴ Nahan ônov mba Gadi man Dibon man Ataroti man Aroer

³⁵ man Ataroti-sofan man Yaser man Yogbeha

³⁶ man Bete-nimra kua Bete-haran, agar a taver man atôrauile.

³⁷ Ônov mba Ruben maa Heshebon man Eleale man Kiriataim

³⁸ man Nebo man Baal-meon (i gema a ati) kua Sebema; ve ii agar a ve maa la ati agen.

³⁹ Ônov mba Makir wan u Manase, ve za ken Gileadi ve za hemba un, ve zenda Mbaamor mba ve tema ker la.

⁴⁰ Mose gema Gileadi na Makir wan u Manase, a tema ker.

⁴¹ Yair wan u Manase, za hemba agar a ker, maa a ii a iti er Havoti-yair.

⁴² Noba kpaa za hemba Kenati kua angarev nav, maa a ii un iti er Noba, sha iti na.