Numeri 23 - ICIGHAN BIBILO

¹ Tsô Balaam kaa a Balaki er: Tam atse ataankarahar heen man shi verem anomabua ataankarahar man shi anomaiyôngo ataankarahar kpaa;

² Balaki er er Balaam kaa un nahan; tsô Balaki vea Balaam na nagh sha nombua man nomiyôngo sha atse la ser ser.

³ Nahan Balaam kaa a Balaki er: Lu hen nagh ough ku nanden, mo me za; alaghga TER Una va kohol mo; hanma kwagh u Una pasem cii me ôr u. Tsô a unde sha igungu i kpuun kpuun.

⁴ Aôndo va kohol Balaam; Balaam kaa a Na er: M ta atse ataankarahar, m na nagh sha nombua man nomiyôngo sha atse la ser ser.

⁵ Tsô TER na kwaghôron ken zwa u Balaam, A kaa er: Hide hen Balaki, ka kwagh ne za ôr un ye.

⁶ Nahan a hide hen a na; yô, un lu hen nagh nagh ku nanden heregh, a atiator a Moabi cii.

⁷ Tsô a tôô injakwagh na, a kaa er: Ka hen Aram je Balaki a za koo a mo ye, ka tor u Moabi je, ka sha iwo i sha ityoughkitaregh la: Va, va wam Yakob ifan, va, yuwe a Iserael,

⁸ Me er nan man me wa mba Aôndo A we ve ifan ga la ifana? Me er nan man me yuwe a mba TER A yugh a ve ga laa?

⁹ Gadia er m til sha ityough ki avande yô, m nenge a na; er m til sha agungu yô, m kav un; nenge, ka ikurior i teman tseke ve, mba nongo a akuraior agen ga.

¹⁰ Ka an nana fatyô u ôron iyenge i vuulevu u Yakob, shin iyenge i umôm-ken-unyiin u Iseraela? Ma m kpe ku u orperapera, mkur wam ma a lu er u na nahan!

¹¹ Tsô Balaki kaa a Balaam er: Ka nyi u er a mo nahana? M za va a we mer va wam mbaihomov av ifan, man nenge ase, u gema u ver ve a ver doo doo.

¹² A kaa a na er: Kera ka u me ver ishima me ôr kwagh u TER A ne ken zwa wam la tseegh gaa?

¹³ Balaki kaa a na er: Shi va, sé yem ijiir igen, pe shi ú za nenge a ve yô; ka kpeafogh ve tseegh ú nenge a mi ye, ú nenge a ve cii ga; za wam ve ifan her.

¹⁴ Tsô a za a na ken ikôngough ki Sofim, sha ityough ki Pisega, a ta atse ataankarahar, a na nagh sha nombua man nomiyôngo sha atse la ser ser.

¹⁵ Tsô a kaa a Balaki er: Lu hen nagh ough ku nanden; mo me za me za kegh keela.

¹⁶ Tsô TER va kohol Balaam, na un kwaghôron ken zwa. A kaa er: Hide hen Balaki, ka kwagh ne za ôr un ye.

¹⁷ Nahan A va her a na; yô, un lu hen nagh nagh ku nanden heregh, atiator a Moabi kpaa lu a na. Balaki pine un er: Tsô TER kaa nana?

¹⁸ Nahan a tôô injakwagh na a kaa er: Mough! Tile sha, Balaki, ungwa; kegh ato her a mo, we wan u Shipor;

¹⁹ Aôndo ka or man Una er aie ga; shi ka wan u or man Una vaa afanyô kpaa ga; Una kaa kwagh yô, Una kera er sha mi gaa? Man Una ôr kwagh yô, Una kera kure sha mi vough gaa?

²⁰ Nenge, i nam zwa er m̱ na iveren; Un A na iveren kera ve, mo me fatyô u geman i kposo ga.

²¹ I nenge a ifer ken Yakob ga, shi i nenge a injughul ken Iserael kpaa ga; TER, Aôndo na, ngu a na imôngo, awer a gbiren a ember tor nga her a ve.

²² Aôndo u A dugh a ve ken tar u Igipiti la; ngu ve er ikoryaregh nahan.

²³ Mimi je, ma ishor i kpehen i ia kôr Yakob ngi ga, ma ahir a eren a aa er Iserael kwagh kpaa, nga ga. Hegen yô, á pase sha Yakob man Iserael kwagh u Aôndo A er yô:

²⁴ Nenge, ikurior ne ngi moughon er ngôbegha nahan, man ngi moughon tilen tswang er begha nahan; una yav inya ga, saa una ya kwagh u a tusu a min, man una ma awambe a mba a woo ve yô.

²⁵ Tsô Balaki kaa a Balaam er: Yô ifan kpaa de we ve ga, iveren kpaa de kera veren ve doo doo ga.

²⁶ Kpa Balaam gema kaa a Balaki er: M kaa u mer: Kwagh u TER A kaa la, ka un me er kpee ye gaa?

²⁷ Balaki kaa a Balaam er: Va, m̱ za a we hen ijiir igen; alaghga á za lu Aôndo pe ú wam ve ifan her.

²⁸ Tsô Balaki za a Balaam sha ityough ki Peor u a ver ishigh shin taaikôngo la.

²⁹ Balaam kaa a Balaki er: Tam atse ataankarahar heen, verem anomabua ataankarahar man shi anomaiyôngo ataankarahar.

³⁰ Tsô Balaki er er Balaam kaa un nahan, a na nagh sha nombua man nomiyôngo sha atse la ser ser.