Numeri 21 - ICIGHAN BIBILO

¹ Tsô tor u Aradi, Orkanaan, u a tema ken Imbusutariyan la, a ungwa gwa er Iserael kar sha gbenda u Atarim, nahan a za nôngo ityav a Iserael, a kôr mbagenev.

² Nahan Iserael tsegha zwa a TER, kaa er: Aluer Ú na ikurior ne sha ikev yam mimi yô, me tim agar a ve purututu.

³ Tsô TER ungwa imo i Iserael, A na Mbakanaan sha ikev ve, ve tim ve purututu kua agar a ve cii; maa i ii ijiir la iti er Horma.

⁴ Tsô ve hembe hen uwo u Hor, ve gba yemen gbenda u zan hen zegemnger u Nyian la, sha u vea ningir tar u Edom yô; asema gba yinan ior sha gbenda.

⁵ Nahan ior hingir ayôôso a Aôndo man Mose, ve kaa er: Ka nyi ne dugh a vese ken Igipiti ner, sé va ken desereti nahan? Gadia kwaghyan kpaa ngu ga, mngerem kpaa ma ga; kwaghyan u injaa ga ne, due se ishima.

⁶ Tsô TER haa iyô i bo hen atô u ior, i nyuma ior; Mbaiserael kpishi pande kpe.

⁷ Nahan ior va hen Mose, ve kaa er: Se er isholibo er se hingir ayôôso a TER man a we kpaa yô; sôn TER A̱ kura iyô ne hen a vese kera. Tsô Mose gba sônon sha ci u ior.

⁸ Nahan TER kaa a Mose er: Er iyô, hambe sha ityô; nahan yô, hanma or u iyô i nyom nan, nana gema á kenger ngila yô, nana war.

⁹ Tsô Mose ker iyô i togula, hambe i sha ityô; nahan or u iyô i nyom nan nan kenger sha iyô i togula la yô, nan war je.

¹⁰ Tsô Mbaiserael hembe za haa afo hen Oboti.

¹¹ Shi ve hembe hen Oboti, ve za haa afo hen Iye-abarim, ken desereti u a lu sha ishigh ki Moabi, vegher u sha pe iyange i dugh la.

¹² Heera kpaa, ve hembe, ve za haa shin pev u Seredi.

¹³ Heera kpaa, ve hembe ve za haa afo yande Arnon u a lu ken desereti u a hii sha tar u Mbaamor la; gadia Arnon ka ikighir i Moabi, ngu hen atô u Moabi a Mbaamor.

¹⁴ Ka nahan man i kaa ken Ruamabera u Ityav mbi TER er: Wahebi u ken Sufa, man upev mba Arnon,

¹⁵ soughsough u upev, u a tingir a sen shin ijiir i teman i Ar, shi a za lian sha ikighir i Moabi la ye.

¹⁶ Heera yô, ve hembe ve yem hen Beer, ijôr i TER kaa a Mose er: Kohol ior imôngo, M̱ na ve mngerem la.

¹⁷ Tsô Iserael wa icam ne er: Va ase mngerem, we ijôr, ter nen i icam;

¹⁸ ijôr i mbahemenev time, i akpamaior a dugh sha tô, man sha igbough vegh la. Ve hembe hen desereti ve yem Matana;

¹⁹ ve hembe hen Matana ve yem Nahaliel; ve hembe hen Nahaliel ve yem Bamoti;

²⁰ ve hembe hen Bamoti ve yem shin pev u hen kpuun kpuun u Moabi, sha ityough ki Pisega u a ver ishigh shin taaikôngo la.

²¹ Tsô Iserael tindi mbatyomov hen Shihon, tor u Mbaamor, kaa er:

²² Ma m kar hen tar wou; sé kaha sé nyôr ken sule ga, shin ken sule u wain kpaa ga; mngerem ma shin azôr kpaa, sé ma ga; sé kar sha igbudu u tor zan zan sé bee tar wou.

²³ Kpa Shihon rumun er Iserael a̱ kar hen tar na ga, Shihon gema kohol ior nav cii, gba van hen Iserael ken desereti a ishima i num; a va zan zan hen Yahashi; a nôngo ityav a Iserael.

²⁴ Iserael hemba un sha zwa u sanker, ngohol tar na hii hen Arnon je zan zan za ar hen Yaboki kar za kighir hen Mbaamon, gadia ikighirtar i Mbaamon la taver tsô.

²⁵ Iserael ngohol agar la cii, nahan Iserael tema ken agar a Mbaamor cii, ken Heshebon kua ken agar a na kpaa.

²⁶ Gadia Heshebon lu gar u Shihon, tor u Mbaamor; ka un lu nôngo ityav a tor u Moabi u tsuaa la, a ngohol tar na cii zan zan za kighir hen Arnon ye.

²⁷ Ka nahan man mbaôron kwagh sha anzaakaa ve kaa er: Va nen hen Heshebon, i̱ maa gar u Shihon, a̱ lu her dông.

²⁸ Gadia usu due ken Heshebon, nombor usu due ken gar u Shihon, u hia Ar u Moabi, mba ve tema tor sha ajiir a taven sha a Arnon la.

²⁹ Kwagh á tser u, Moabi! Ne saa ve, ne ior i Kemoshi; a er ônov nav mba nomso hingir mba yevese, ônov nav mba kasev ve hingir mbakwarev mba Shihon tor u Mbaamor.

³⁰ Se ta ve avaan; i tim Heshebon zan zan za ar hen Dibon; se vihi tar la zan zan za ar hen Nofa, za kighir hen Medeba.

³¹ Nahan Iserael tema ken tar u Mbaamor la.

³² Mose tindi er i̱ za nenge mker ken Yaser; ve̱ ngohol agar a na, shi ve̱ zenda Mbaamor mba ve lu her la kpaa.

³³ Tsô ve gema ve gba kôndon sha ian i Bashan; nahan Ogo, tor u Bashan due di a ior nav sha u nôngon ityav a ve, hen Ederei.

³⁴ TER kaa a Mose er: De cie un ga, gadia M na un sha ikev you; ior nav cii kua tar na kpaa, ú er a na er u er a Shihon, tor u Mbaamor u a tema ken Heshebon la nahan.

³⁵ Nahan ve wua un a ônov nav mba nomso kua ior nav cii, zan zan ma or kera lu un her ga; maa ve ngohol tar na.