Numeri 20 - ICIGHAN BIBILO

¹ Tsô Mbaiserael, ka ior ci ca je la, ve va ken desereti u Zin sha uwer u hiihii la; ior maa haa hen Kadeshi; Miriam kpe heregh i ii un her.

² Mngerem ma va banen ior yô, ve kohol imôngo ve hingir ayongo a Mose kua Aron.

³ Ior hingir ayongo a Mose, ve gba kaan er: Guda u ma se kpe zum u anngôôv asev kpeen sha ishigh ki TER la!

⁴ Man inja na nan man ne ve a ior i TER ken desereti ne, sha u sé va kpe ker, se a uzendenya asev cii?

⁵ Man ka nyi je ne due a vese ken Igipiti, ne va a vese hen bojiir ne nahana? Ka ma ijiir i lun a iyiagh ga, shin tur, shin ikon i wain, shin pomegraneti kpaa ga; mngerem ma man kpaa ma ga.

⁶ Tsô Mose vea Aron ve mough hen ior, ve za hen hunda u tenti u kohol ker la, ve gure ve kuma ishiv inya; nahan iengem i TER ande hen ve!

⁷ Tsô TER ôr kwagh a Mose, kaa er:

⁸ Tôô gbough, kohol ior we vea anngôu Aron; yô, ôr kwagh a vande sha ashe ve, tsô ua due a mngerem ma u; er, mngerem ma due ken vande la, na ior ve̱ ma kua uzendenya vev kpaa.

⁹ Tsô Mose tôô gbough sha ishigh ki TER, er A kaa un nahan.

¹⁰ Mose vea Aron ve kohol ior hen vande la; a kaa a ve er: Ungwa nen ase, ne mbahembanato mban; sé due a mngerem ken vande ne, sé na ne zee?

¹¹ Tsô Mose kende uwegh sha, gbidye vande sha gbough nagh kwa har mngerem due kpishi, ior ma kua uzendenya vev kpaa.

¹² Nahan TER kaa a Mose man Aron er: Er ne nem jighjigh ne tseghem sha ishigh ki Mbaiserael ga yô, nahan né kera nyôr a ior ne ken tar u M ne ve la ga.

¹³ Ka mngerem ma Meriba je ne; gadia Mbaiserael hingir ayôôso a TER, shi A pase ve iyol Na er Un lu icighan yô.

¹⁴ Hen Kadeshi la, Mose tindi mbatyomov hen tor u Edom er: Anngôu Iserael ngu kaan nahan er: We iyol you kpaa, u fa ican i i tser se la cii,

¹⁵ er uter asev yem ken Igipiti, se tsa ken Igipiti gbem, man Mbaigipiti ve er se ican, se a uter asev kpaa yô;

¹⁶ zum u se vaa a TER yô, A ungwa imo yase, A tindi Ortyom, va due a vese ken tar u Igipiti; se mban heen hen Kadeshi gar u hen ikighirtar you ne;

¹⁷ yô, ma u shi de, ma se kar hen tar wou; sé nyôr ken sule u uyia shin u wain ga, mngerem ma shin azôr kpaa sé ma ga, kpa sé kar di sha igbudu u tor tsô; sé kaha ken iyan shin ken imese kpaa ga, zan zan sé za bee tar wou.

¹⁸ Kpa Edom kaa a na er: De karen hen mo, m̱ due a sanker m̱ nôngo ityav a we ga.

¹⁹ Tsô Mbaiserael kaa a na er: Sé kar sha igbudu, aluer sea ma mngerem ou, mo kua uzendenya av kpaa, me kimbi ishe i ma; ka kwagh je ga, de m̱ gba karen angahar tsô.

²⁰ Kpa a kaa er: Ú kar ga. Tsô Edom gba van her a na a ishima i num a ior kpishi sha agee je.

²¹ Kape Edom venda er Iserael a̱ de karen hen tar na ga la; nahan Iserael kaha kar hen na kera.

²² Tsô ve hembe hen Kadeshi; Mbaiserael, ka ior ci ca, ve va ar hen uwo u Hor.

²³ TER ôr kwagh a Mose man Aron hen uwo u Hor, sha ikighirtar i Edom la, A kaa er:

²⁴ Aron una za kohol ior nav, gadia una nyôr ken tar u M ne Mbaiserael la ga, sha ci u ne hembe ato sha kwaghôron Wam hen mngerem ma Meriba yô.

²⁵ Yô, kua a Aron man wan na Eleasar, unde a ve sha uwo u Hor;

²⁶ er akondo a Aron haa wan na Eleasar; Aron yô, una za kohol ior nav, una kpe sha her.

²⁷ Tsô Mose er er TER kaa nahan; ve unde sha uwo u Hor sha ashe a ior cii.

²⁸ Nahan Mose er akondo a Aron haa wan na Eleasar; Aron maa a kpe her sha ityough ki uwoogh; Mose vea Eleasar ve hungwa sha uwo la.

²⁹ Ior cii mba kaven er Aron a kpe yô, ya u Iserael cii vaa ku u Aron ayange ikundugber.