Numeri 19 - ICIGHAN BIBILO

¹ TER ôr kwagh a Mose man Aron, A kaa er:

² Ka tindi u i̱ eren sha mi u TER A we je ne er: Ôr kwagh a Mbaiserael ve̱ va u a tulebua u nyian u a lu a iyolough ga, shi a lu a ihogholough iyol kpaa ga yô, u i lu a vande tan un igbur mayange ga yô;

³ gema un na pristi Eleasar, nahan i̱ due a mi ken akôngoafogh, i̱ za wua un sha ishigh nagh je.

⁴ Pristi Eleasar a̱ er awambe na sha ihôwe na, a̱ mishi awambe na vegher u hen ishigh ki tenti u kohol ker la, kwa taankaruhar;

⁵ i̱ nande tulebua la sha usu sha ishigh nagh je, ikôvough nagh man inyam na man awambe a na a icômbov nav, i̱ nande cii;

⁶ pristi a̱ tôô kon u sedar man hisop kua ikondo i nyian dindee, a̱ gbihi hen atô u usu u lu hian tulebua la.

⁷ Nahan pristi a̱ ôô akondo a na, shi a̱ ôô iyol sha mnger kpaa, man una mase hiden ken afo ye, pristi una kera lu wang ga zan zan iyange ia kar been.

⁸ Or u a nande tulebua la kpaa, a̱ ôô akondo a na sha mnger, shi a̱ ôô iyol sha mnger kpaa, una kera lu wang ga zan zan iyange ia kar been.

⁹ Or u nan lu wang yô, nana̱ kura mtwem ma tulebua la, nana̱ ver ma ken akôngoafogh hen ijiir i wang; i̱ ver ma sha ci u ior i Mbaiserael sha ci u mngerem ma wanger kwagh a min; ka nagh ku isholibo je.

¹⁰ Or u a kor mtwem ma tulebua la, a ôô akondo a na, una kera lu wang ga zan zan iyange ia kar been; Mbaiserael cii kua shiror u nan va nyer ve a nyôr la kpaa, i̱ lu ve tindi u gbem.

¹¹ Or u nana bende a ikom i or yô, nana kera lu wang ga ayange ataankarahar.

¹² Nana̱ wanger iyol i nan sha mtwem mala sha iyange i atar la, man sha iyange i ataankarahar la kpaa, nahan nana hingir wang; kpa aluer nana wanger iyol i nan sha iyange i atar man sha iyange i ataankarahar la kpaa ga yô, nana kera lu wang ga.

¹³ Anti or u nana bende a ikom i or u nan kpe yô, man nan wanger iyol i nan ga yô, nan ngu hôngor tabernakel u TER; or la, i̱ dugh nan ken Iserael kera, sha ci u i lu a mishi nan mngerem ma wanger kwagh a mi la, iyol ga yô, nan kera ngu wang ga; mlu u wang ga u nan la ngu a nan her.

¹⁴ Tindi u sha or u nan kpe ken tenti yô, ka un ne: Hanma or u nan nyer ken tenti la, man hanma or u nan lu ken tenti la kpaa, nana kera lu wang ga, ayange ataankarahar.

¹⁵ Hanma kwagh u a lu ivegher, u i cir kughur sha mi ga yô, kera ngu wang ga.

¹⁶ Hanma or u nan lu ken ikôngo man nan bende a or u i woo nan sha sanker yô, shin a lu kuhe u or, shin a lu uwar kpaa, nana kera lu wang ga, ayange ataankarahar.

¹⁷ Or u nan lu wang ga la yô, i̱ pande mtwem ma nagh ku isholibo, ma i nande la, i̱ kese mngerem ma senen, i̱ haa sha mtwem mala shin ika;

¹⁸ or u nan lu wang yô, nana̱ tôô hisop nana̱ civ shin mnger, nana̱ mishi sha tenti man sha uika cii man sha ior mba ve lu heregh cii kua sha or u nan bende a kuhe, shin nan bende a or u i woo nan yô, shin nan bende a ikom, shin a lu uwar kpaa;

¹⁹ or u wang la, nana̱ mishi u a lu wang ga la ma iyol, sha iyange i atar kua sha iyange i ataankarahar la kpaa; sha iyange i ataankarahar la, nana̱ wanger un; nahan una ôô akondo a na, shi una ôô iyol sha mnger kpaa, iyange ia been yô, una hingir wang.

²⁰ Kpa or u nan kera lu wang ga, man nana wanger iyol i nan ga yô, or la i̱ dugh nan ken ior kera, sha ci u nan hôngor icighanjiir u TER yô, i mishi nan mngerem ma wanger kwagh a mi la iyol ga; nan ngu wang ga her.

²¹ I̱ hingir ieren ve gbem; or u a mishi mngerem ma wanger kwagh a mi la, a̱ ôô akondo a na; hanma or u nana bende a mngerem ma wanger kwagh mi la yô, nana kera lu wang ga zan zan iyange ia kar been.

²² Hanma kwagh u or u nan lu wang ga la, nana bende a mi yô, una kera lu wang ga; shi orgen u nan bende a kwagh la kpaa, nana kera lu wang ga, zan zan iyange ia kar been.