Numeri 16 - ICIGHAN BIBILO

¹ Kpa Koraki wan u Isehar wan u Kohati wan u Levi, man Datan man Abiram ônov mba Eliabi kua On wan u Peleti, ônov mba Ruben, ve kua a ior,

² ve va tile sha ishigh ki Mose; ve lu a Mbaiserael mbagenev, lu ior deri uhar man akunduahargber, lu mbahemen ior mba i yila ve mkohol yô, lu ior mba duen ati je;

³ tsô ve kohol, ve hingir ayongo a Mose man Aron, ve kaa a ve er: Ne ya kuma ve, gadia ior cii ka uicighanmbaiorov, hanma or kpaa; TER ngu a ve; man ka nyi ne kenden ayol a en sha je er ne hemba ior i TER cii nahana?

⁴ Er Mose ungwa nahan yô, a gure a kuma ishigh inya,

⁵ a ôr kwagh a Koraki kua ior nav cii, a kaa er: Kper pepe TER Una tese mba ve lu mba Nav, man or u nan lu icighanor yô, Una er, nana kporom her a Na, een, or u Una tsuwa nan la, Una er, nana kporom her a na.

⁶ Yô, er nen kwagh ne: tôô nen ugbande mba nanden kwaghhumandoon shimi, Koraki a ior nav cii;

⁷ Kper yô, haa nen usu shimi, gema haa nen kwaghhumandoon sha mi, sha ishigh ki TER, tsô or u TER Una tsuwa nan la, ka nan nana lu icighanor ye, ne kumbur yum, ne ônov mba Levi.

⁸ Tsô Mose kaa a Koraki er: Shi ungwa nen yôô, ne ônov mba Levi:

⁹ Er Aôndo u Iserael A tsough ne ken ior mba Iserael sha u Una kporom a ven her a Na sha u né eren tom u tabernakel u TER, man né tilen sha ishigh ki iorough né eren ve tom,

¹⁰ man er A kporom a we kua anngôôv ou, ônov mba Levi cii kpaa, nahan kpaa kuma ne gaa? Shi tom u pristi kpaa ne mba kerene?

¹¹ Nahan we a ior ou cii, ne kohol ne hingir iyongo a TER; Aron ngu di nyi man ne hon unu?

¹² Tsô Mose tindi i za yila Datan man Abiram, ônov mba Eliabi, kpa ve venda er: Sé va ga;

¹³ er u dugh a vese ken tar u atumbabua man iyough dumbur ker la wer, ú va wua se ken desereti ne, nahan ka kwagh u kiriki? Shi ka u ka yan tor sha vese kpaa ha?

¹⁴ Man u va a vese ken tar u atumbabua man iyough dumbur ker ga, u na se dyako u ishule man ikon i wain kpaa ga; sar u ka tsuwan ior mban ashe? Yô, sé va ga.

¹⁵ Nahan ishima vihi Mose tsung, a kaa a TER er: De rumun nagh vegh ku ve ve a mi la ga; shin jaki môm tsô kpaa, m ngohol ve sha apera ga, shi m er mô ve môm kwaghvihin kpaa ga.

¹⁶ Tsô Mose kaa a Koraki er: Kper yô, we, kua ior ou cii, va nen sha ishigh ki TER, we man ve man Aron;

¹⁷ hanmô wen nana̱ tôô gbande u nan u kwaghhumandoon, nana̱ haa kwaghhumandoon shimi, man hanmô wen nana̱ va a gbande u nan u kwaghhumandoon sha ishigh ki TER, ka ugbande deri uhar man akunduahargber; we kua Aron kpaa, hanmô wen nana̱ va a gbande u nan u kwaghhumandoon.

¹⁸ Tsô hanma or tôô gbande u nan u kwaghhumandoon nan haa usu shimi, shi nan haa kwaghhumandoon sha mi, nan za tile hen hunda u tenti u kohol ker la, a Mose man Aron imôngo.

¹⁹ Koraki kohol ior cii, hingir ayongo a ve, hen hunda u tenti u kohol ker la; tsô iengem i TER va ande hen ior cii.

²⁰ Nahan TER ôr kwagh a Mose man Aron kaa er:

²¹ Due nen ken ior mban kera, M tim ve icin i môm.

²² Kpa ve gure ve kuma ishiv inya, ve kaa er: Ahii! Aôndo u ujijingi mba uumace cii, or môm nan er kwaghbo, tsô Ú gema Ú yuwe ior cii?

²³ Nahan TER ôr kwagh a Mose kaa er:

²⁴ Ôr kwagh a ior kaa ve wer: Kar nen hen tenti u Koraki man Datan man Abiram kera.

²⁵ Tsô Mose mough za hen Datan man Abiram; mbavesen mba Iserael kpaa cir un ijime.

²⁶ A za ôr kwagh a ior, a kaa er: Kar nen hen utenti mba aferaior mban kera yôô; de benden nen ma kwagh ve ave ga, sha er né tim sha asorabo a ve la cii ga yô.

²⁷ Tsô ve kar hen utenti mba Koraki man Datan man Abiram kera; Datan vea Abiram yô, ve due, ve tile hen hunda u utenti vev, ve a kasev vev man ônov vev mba nomso man mbayev vev mba kiriki.

²⁸ Mose kaa er: Ka sha kwagh ne man né fa er i lu TER A tindim sha u m̱ eren ityom ne cii ye, m gbe eren i sha ishima yam tsô ga.

²⁹ Aluer ior mban vea kpe er ior cii ve kpen nahan, shin ma kwagh á er ve u a eren ior mbagenev kpaa yô, ka TER A tindim ga.

³⁰ Kpa aluer TER Una er kwagh u he, inya ia aver zwa u i, ia mena ve kua ior vev cii, vea haa shin Sheol uma yô, fa er ior mban ve laha TER yô.

³¹ Tsô kur akaaôron ne yô, inya pav hen pe ve tile la;

³² inya aver zwa u i, mena ve man ônov vev kua ior mba Koraki cii, a akaa ve cii.

³³ Ve a akaa a ve lu a mi cii, ve haa shin Sheol uma; inya hide zua her, cir ve, ve tim ken ior kera.

³⁴ Mbaiserael mba ve kase ve cii, zum u ve ungwa mliam vem la yô, ve yevese; gadia ve kaa er: Inya i̱ de men se ga.

³⁵ Shi usu due hen TER, hia ior deri uhar man akunduahargber mba ve va nande nagh ku kwaghhumandoon la.

³⁶ Tsô TER ôr kwagh a Mose kaa er:

³⁷ Kaa Eliasar wan u pristi Aron, a̱ kura ugbande mba kwaghhumandoon ken usu u lu masen enger la, a̱ tsenda usu la kera ca je; gadia ve hingir uicighanmbaakaav;

³⁸ ka ugbande mba kwaghhumandoon mba ior mba asorabo a ve a ne ve ku ne; i var iyôv mbi par par mbi cirin atse a nanden nagh sha mi la a mi; gadia ve va a mi sha ishigh ki TER, ka nahan man ve hingir uicighanmbaakaav ye; nahan vea lu Mbaiserael ikav.

³⁹ Tsô pristi Eliasar tôô ugbande mba togula mba kwaghhumandoon mba ior mba i nande ve, ve va na nagh a mi la, i̱ var kwagh u cirin atse a nanden nagh sha mi la a mi;

⁴⁰ sha u ve̱ lu Mbaiserael ikav i umbur kwagh, man sha u or u ken inya nan lu ken tsombor u Aron ga, nana de kporom er nana̱ nande kwaghhumandoon sha ishigh ki TER, nana gema á hingir er Koraki a ior nav nahan ga, er TER kaa Mose, Mose gema kaa un nahan.

⁴¹ Tsô sev mbu av yô, ior i Mbaiserael cii mough ayôôso sha Mose kua Aron, ve gba kaan er: Ka ne je ne woo ior mba TER ye.

⁴² Tsô er ior kohol hingir ayôôso a Mose man Aron la yô, ve gema ashe ken vegher u tenti u kohol ker la, ibeenegh gema cir sha mi, iengem i TER kpaa ande ken igbar.

⁴³ Tsô Mose vea Aron ve kar ken hemen u tenti u kohol ker la.

⁴⁴ TER ôr kwagh a Mose, kaa er:

⁴⁵ Kar nen hen ior ne kera, Me tim ve icin i môm; tsô ve gure ve kuma ishiv inya.

⁴⁶ Mose kaa a Aron er: Tôô gbande wou u kwaghhumandoon, dugh usu ken atse a nanden nagh sha mi, wa shimi, haa kwaghhumandoon sha mi, tôô fese za a mi hen ior, za na iwom sha ci ve; gadia TER ngu yuwen, bouange kpaa hii ve.

⁴⁷ Tsô Aron tôô, er Mose kaa un nahan, za ayem, za nyôr ior hen atô; yô bouange vande hiin hen ior kera kpaa; tsô a haa kwaghhumandoon sha mi, a na iwom sha ci u ior.

⁴⁸ Tsô til hen atô u mbakpenev a mbaumav yô, bouange la maa de.

⁴⁹ Ior mba ve kpe sha bouange la yô, lu ior dubu pue kar unyiin man deri utaankaruhar je, i ôr ior mba ve kpe sha kwagh u Koraki la ga.

⁵⁰ Tsô Aron hide hen Mose hen hunda u tenti u kohol ker la; bouange la kpaa bee.