Numeri 15 - ICIGHAN BIBILO

¹ TER ôr kwagh a Mose A kaa er:

² Ôr kwagh a Mbaiserael, kaa a ve wer: Zum u ne za nyôr ken tar u né za tema ker, u M lu nan ne la,

³ man á sar ne ka nan TER nagh ku usugh, a lu nagh ku nanden, shin nagh ku sôngon, sha u kuren iceghzwa, shin nagh ku sha ishima i dedoo, shin ku sha uiniongo mba i ver sha ashighe ashighe la, sha u eren TER kwaghhumandoon sha ibua shin sha iyôngo yô,

⁴ or u nan ne nagh ku nan la, nana̱ na TER nagh ku sha samuyia, i̱ lu mwem ma kengese ma ma kom môm-ken-upue u efa ma i nongo mkurem sha mi ma ma kom môm-ken-unyiin u hin;

⁵ man wain sha ci u nagh ku man, na a̱ kuma môm-ken-unyiin u hin sha hanma gumiyôngo, a nagh ku nanden shin a nagh ku sôngon imôngo.

⁶ Man a lu nomiyôngo yô, na nagh ku sha samuyia sha mwem ma kengese ma ma kom uhar-ken-upue u efa ma i nongo mkurem sha mi ma ma kom môm-ken-utar u hin;

⁷ man na wain sha ci u nagh ku man a̱ kuma ci môm ken utar u hin; ka kwagh u human doon TER.

⁸ Aluer wea na nagh ku nanden, shin nagh ku sôngon sha gumbua sha u kuren iceghzwa, shin a lu nagh ku bem ku nan TER kpaa,

⁹ nahan i̱ na nagh ku sha samuyia a gumbua la imôngo, i̱ lu mwem ma kengese ma ma kom utar-ken-upue u efa, ma i nongo mkurem sha mi ma ma kom vegher u hin.

¹⁰ Man shi na wain sha ci u nagh ku man, a̱ kuma vegher u hin, ka nagh ku usugh ku human doon TER je la.

¹¹ Kape hanma nombua shin nomiyôngo shin gumiyôngo shin gumkpev kpaa i̱ er a ve la.

¹² Iyenge i ne na la, kape er nen a hanmô ve sha iyenge ve la.

¹³ Hanma or u nan lu or u tar la jim yô, kape nana̱ na akaa ne nahan vough ne, zum u nana naan nagh ku usugh ku human doon TER la.

¹⁴ Man aluer shiror u nan nyer ne a nyôr, shin hanma or u nan tse a ven sha ikov ikov, man á sar nan ka nan nagh ku usugh ku human doon TER yô, er ne eren la kape nan kpa, nana̱ er je la.

¹⁵ Ior cii, tindi a̱ lu môm sha ci wen kua shiror u nan nyer ne a nyôr la; ka tindi u gbem sha ikov ikov; er ne ne lu la, kape shiror kpaa una lu sha ishigh ki TER je la.

¹⁶ Tindi a̱ lu môm, kwaghwan kpaa môm, sha ci wen kua shiror u nan nyer ne a nyôr la.

¹⁷ TER shi ôr kwagh a Mose, A kaa er:

¹⁸ Ôr kwagh a Mbaiserael kaa a ve wer: Zum u né za nyôr ken tar u M lu zan a ven ker la,

¹⁹ né gbaa yan iyiagh ki hen tar la yô, naan nen TER nagh ku kenden sha.

²⁰ Na nen masa u sha mwem ma geran enem ma hiihii la, a̱ lu nagh ku kenden sha, er nagh ku kenden sha ku vande u gbidyen iyiav sha mi nahan, kape né kende ku sha la.

²¹ Naan nen TER nagh ku kenden sha, sha mwem ma geran enem ma hiihii la, sha ikov ikov.

²² Zum u né kar kpe, né kera wa atindi a TER na Mose ne cii iko ga yô;

²³ ka akaa a TER kaa Mose, Mose gema kaa ne a la cii, hii sha iyange i TER hii u kaan a la je zan zan sha ikov ikov;

²⁴ yô, aluer ior cii er kwagh la man ve fa ga yô, nahan ior cii ve̱ zua, ve̱ va a gumbua sha ci u nagh ku nanden ku human doon TER kua nagh ku sha samuyia man nagh ku man ku i magh sha mi, sha tindi la, man kpev môm sha ci u nagh ku isholibo.

²⁵ Pristi a̱ na iwom sha ci u ior i Mbaiserael cii, tsô á de ve kwaghbo ve; gadia ve er abu tsô, man ve̱ va a nagh vegh, ka nagh ku usugh ku nan TER kua nagh ku isholibo, sha ishigh ki TER, sha ci u kwagh u ve er abu la;

²⁶ tsô á de ior i Mbaiserael cii, isholibo ve la, kua shiror u nan nyer ve a nyôr la kpaa, gadia ior cii er kwagh la abu.

²⁷ Man aluer or môm nana er isholibo abu yô, nana̱ va a tuleivo u a kom inyom i môm yô, sha ci u nagh ku isholibo.

²⁸ Pristi a̱ na iwom sha ci u or u nan kar kpe nan er isholibo abu sha ishigh ki TER la, a̱ na iwom sha ci u nan, tsô á de nan isholibo i nan.

²⁹ Tindi môm a̱ lu sha ci wen; or u nan er kwaghbo abu la, shin a lu or u tar la jim ken Mbaiserael, shin a lu shiror u nan nyer ne a nyôr kpaa.

³⁰ Kpa aluer hanma or nana er ma kwagh sha apera, shin a lu or u hen tar la jim shin a lu shiror kpaa, nan ngu lahan TER; or la i̱ dugh nan ken nongo u nan kera;

³¹ sha ci u nan laha kwaghôron u TER, shi nan vihi tindi Na kpaa yô, i̱ dugh or la kera keng, ifer i nan ia lu nan iyol.

³² Zum u Mbaiserael lu ken desereti la, ve kohol orgen lu taven ikon sha iyange i memen.

³³ Ve mba ve kohol un taven ikon la, ve va a na hen Mose man Aron kua hen ior cii.

³⁴ Tsô ve wa un ken gaadi, gadia i lu a fa kwagh u á er a na ga.

³⁵ Tsô TER kaa a Mose er: I̱ wua or ne kpee, ior cii ve̱ ta un awen ken akôngoafogh.

³⁶ Tsô ior cii due a na ken akôngoafogh, ve ta un awen, ve wua, er TER kaa Mose nahan.

³⁷ Tsô TER ôr kwagh a Mose, A kaa er:

³⁸ Ôr kwagh a Mbaiserael, kaa ve wer, ve̱ taan anzôr sha azongo a akondo ve, sha ikov ikov cii, man hanma injôr sha zongo la, ve̱ kange mou u kwel sha mi;

³⁹ a̱ lu ne anzôr a né kenger sha mi man né umbur atindi a TER cii, né waan a iko kpaa yô; sha er de zenden nen sha ishima yen man sha ashe a en ga, ka kwagh u a ne ne idya i eren je la;

⁴⁰ sha u né umbur atindi a Am cii, né eren sha mi, né hingir uicighanmbaiorov mba Aôndo wen yô.

⁴¹ Ka Mo TER M lu Aôndo wen, u M dugh a ven ken tar u Igipiti Mer, Me lu Aôndo wen ye; ka Mo TER M lu Aôndo wen ye.