Numeri 14 - ICIGHAN BIBILO

¹ Tsô ior cii ger mliam, ior tsa vaan tugh mbula.

² Mbaiserael cii gba zan Mose man Aron ivever iyol, ior cii kaa er: Guda ma se kpe ken tar u Igipiti, gayô, guda ma se kpe ken desereti ne je!

³ Ka nyi man TER A ve a vese ken tar ne er se̱ va kpe ku u ishôm nahana? Kasev man mbayev asev mba kiriki, á va kura ve; kera guda u sé hide ken Igipiti gaa?

⁴ Tsô ve gba kaan ayol a ve er: Sé ver nen or u hemen se, sé hide nen ken Igipiti.

⁵ Tsô Mose vea Aron ve gure ve kuma ishigh inya sha ishigh ki mkohol u ior i Mbaiserael cii.

⁶ Tsô Yosua, wan u Nun kua Kalebu wan u Yefune, mba ve lu ken mba ve za nenge tar la mker la, ve ande akondo a ve;

⁷ ve ôr kwagh a ior i Mbaiserael cii, ve kaa er: Tar u se zende ken u sha u nengen u mker la, ka tar u doon kpishi.

⁸ Aluer i doo TER a vese yô, Una nyôr a vese ken tar la, Una na se u; ka tar u atumbabua man iyough ve dumbur ken u.

⁹ Ka mhendan tsô, de hendan nen a TER ga ye, de cie nen ior i tar la kpaa ga; gadia ve ka kwaghyan wase je; mure ve kar sha ve kera. TER ngu a vese; de cie nen ve ga.

¹⁰ Kpa ior cii kaa er, i̱ ta ve awen; tsô iengem i TER ande hen Mbaiserael cii, ken tenti u kohol ker la.

¹¹ Tsô TER kaa a Mose er: Ka hanma shighe je man ior mban vea de u lahan Mo? Man ka hanma shighe je man vea nam jighjigh, er M er uivande hen a ve yum nahan nee?

¹² Me tsaha ve sha bouange, Me ngohol ve dyako ve kera Me gema u ú hingir ikurior i ia hemba ve iyenge man agee kpaa.

¹³ Tsô Mose kaa TER er: Nahan Mbaigipiti vea ungwa, gadia U due a ior mban ken a ve kera sha agee je,

¹⁴ tsô vea gba ôron mba ve tem ken tar ne; man ve kpaa ve vande ungwan, er We TER U lu ken atô u ior mban yô, man mba nengen a We TER ishigh a ishigh je, man ibeenegh You kpaa ki luun ve sha, shi We U hemen ve gbenda ken ityôgh ki ibeenegh atetan man ken ityôgh ki usugh tugh.

¹⁵ Man aluer U gba wuan ior mban icin i môm nahan yô, akuraior a a ongo gwa u iti You la, aa ôr kwagh aa kaa er:

¹⁶ Ka sha ci u TER A fetyô u nyôron a ior mban ken tar u A bum er Una na ve la ga man A woo ve ken desereti ye.

¹⁷ Yô, agee a TER a̱ shi vese, er U kaa la Wer:

¹⁸ TER we ishima, ngu a erdoo wuee, deen ifer man tindi u peren, kpa u tsahan yô, den ga; tsahan ônov sha ifer i uter zan zan kov u sha utar man shi u sha unyiin kpaa.

¹⁹ Ma U shi de ior mban ifer ve sha erdoo Wou u U lu a mi yum la, er U hii den ior mban, hii ken Igipiti je zan zan nyian ne yô.

²⁰ Tsô TER kaa er: M de ve sha imo you ve;

²¹ kpa mimi je er M lu u uma man er tar cii ua iv a iengem i TER yô,

²² mimi je, ior mban cii, mba ve nenge iengem Yam man uivande Av mba M er ken Igipiti man ken desereti, nahan kpaa, ve meem je i kom kwa pue, ato kpa ve veren sha imo Yam ga ne yô,

²³ vea nenge a tar u M bum a uter vev Mer Me na ve la ga; mbalahan Mo cii, mô ve môm nana nenge a u ga;

²⁴ kpa wanakiriki Wam Kalebu, er un yô, jijingi na a lu kposo man a dondom jighilii kpaa yô, ka un Me nyôr a na ken tar u a ze la ye; tsombor na kpaa ua ya u.

²⁵ Mbaamaleki man Mbakanaan yô, ve tema ya shin pev; kper hide nen ijime, yem nen ken desereti za nen gbenda u zan shin zegemnger u Nyian la.

²⁶ Tsô TER ôr kwagh a Mose kua Aron, kaa er:

²⁷ Ka hanma shighe je ior mba aferev mban vea de u zan Mo ivever iyoloo? M ungwa ivever i Mbaiserael ve eren Mo yô.

²⁸ Kaa nen a ve ner: Er M lu u uma ne yô, kape TER A kaa la, mimi je, kwaghôron u ne er sha ato Am la, kape Me er a ven di je la;

²⁹ akom a en aa saa ken desereti ne; mba i er iyenge ve cii, iyenge yen la ci ca cii, hii sha mba ve kom anyom ikundu man mba ve hembe nahan, mba ve zem ivever iyol ne,

³⁰ ne yô, né nyôr ken tar u M bum Mer, Me na ne u, sha er né tema ker la je ga, saa Kalebu wan u Yefune man Yosua wan u Nun tseegh.

³¹ Kpa mbayev enev mba kiriki mba ne kaa ner, á kura ve la yô, gema ka ve je, Me nyôr a ve, vea fa tar u ne vende u la ye.

³² Kpa ne yô, akom a en aa saa ken desereti ne.

³³ Ônov enev vea hingir mba zenden ken desereti wue wue er mbakuranilev nahan, zan zan anyom akunduahar je; vea tôô ibo i idya yen zan zan akom a en aa saa ishe ken desereti cii ve.

³⁴ Iyenge i ayange a ne lu nengen tar la mker, ayange akunduahar la, inyom i môm sha ityough ki hanma iyange, né tôô afer a en, ka anyom akunduahar je la, ka nahan man né fa er i kera doom a ven ga ye.

³⁵ Mo TER M kaa nahan, kape Me er a ior mba bov mban ne cii, mba ve kohol ve hendan a Mo ne, vea tim ken desereti ne je, ka keregh vea kpe ye.

³⁶ Ior mba Mose tindi sha u ve̱ za nenge tar la mker man ve hide ve gema ve va er ior za un ivever iyol sha akaavihin a ve ôr sha tar la,

³⁷ ior mba ve va ôr akaavihin sha tar la la, bouange wua ve sha ishigh ki TER.

³⁸ Ka Yosua wan u Nun kua Kalebu wan u Yefune mba ve lu ken mba ve za sha u za nengen tar la mker yô, ve mase shin her uma ye.

³⁹ Mose er Mbaiserael akaa ne cii yô, ior gba zungwen tsung.

⁴⁰ Tsô ve mough pepe ve unde sha ityough ki uwoogh, ve gba kaan er: Kôndon yase, sé yem hen ijiir i TER A kaa je ne; gadia se er isholibo.

⁴¹ Kpa Mose kaa a ve er: Ka nyi ne per tindi u TER nahana, gadia kwagh ne una za á doo ga.

⁴² De kende nen ga, gadia TER ngu a ven ga; sha er mbaihomov enev ve̱ de za hembe ne ga yô.

⁴³ Gadia Mbaamaleki man Mbakanaan mba ne ken hemen keela, á wua ne sha sanker; er ne de u dondon TER yô, TER kpaa Una kera lu a ven ga.

⁴⁴ Nahan kpaa, ve norom ve za unde sha ityough ki uwoogh; kpa areki u ikuryan u TER kua Mose yô, ve due ken afo ga.

⁴⁵ Tsô Mbaamaleki man Mbakanaan mba ve tema sha iwo la, sen, va ta num sha a ve, hemba ve, zenda ve zan zan za ar hen Horma.