Nehemia 9 - ICIGHAN BIBILO

¹ Tsô sha iyange i sha ikundu kar unyiin i uwer ne yô, Mbaiserael kohol, ve hôr kwaghyan a ajav a ikondo iyol man inya sha ityouv vev.

² Tsombor u Iserael kem ayol a ve a atôatyev cii, ve tile sha, ve pase asorabo a ve, kua aferakaa a uter vev.

³ Á pav iyange atôôn anyiin yô, tiôn môm ve tile sha hen ajiir a ve, ve ôr ken ruamabera u atindigh u TER, Aôndo ve la, shi tiôn ugen ken atôôn anyiin la, ve pase akaabo a ve, ve sôn TER, Aôndo ve.

⁴ Tsô Yeshua man Bani, Kademiel, Shebania, Buni, Sherebia, Bani man Kenani, ve va tile sha agbur a unden mi, a Mbalevi la, ve genger imo taver taver, ve sôn TER, Aôndo ve.

⁵ Tsô Mbalevi: Yeshua man Kademiel, Bani, Hashabeneia, Sherebia, Hodia, Shebania kua Petahia, ve kaa er: Mough, tile nen sha, wuese nen TER, Aôndo wen, hii sha uicôronmbaashighev zan zan gbem sha won; i̱ wuese iti You i iengem i i gande iwuese kua icivir cii inya la.

⁶ We U ngu TER, We tseegh; We U er Sha man shi Sha u a lu sha la a ikum ve cii, tar kua akaa a a lu shin u kpaa man uzegembamngerev man akaa a a lu shimi cii, U koson a cii; ikum i Sha kpaa ngi civir We.

⁷ We U ngu TER, Aôndo u U tsough Aberam, U dugh a na ken Ur u Mbakaldi man U ii un iti Wer Aberaham.

⁸ U zua un a ishima i jighjigh sha ishigh You man shi U tôndo zwa a na kpaa, Wer, Ú na un tar u Mbakanaan man Mbahiti man Mbaamor man Mbaperishi man Mbayebushi kua Mbagirgashi, Ú na tsombor na je; man shi U er sha kwaghôron Wou vough, gadia We U ngu u perapera.

⁹ Man U nenge ican i uter asev ken Igipiti man U ungwa mliam vem hen kpe u Zegemnger u Nyian kpaa;

¹⁰ man U tese uivande man akaa a kpilighyol sha Farao man mbayev nav cii, kua ior mba hen tar na cii; gadia U fa, ve manger sha uter asev; nahan U due iti, er i lu nyian nahan.

¹¹ U tôndo zegemnger sha ishiv vev, nahan ve kar sha tareghnyaagh her atô u zegemnger; mbatôvon ve angahar yô, U gbihi ve shin iv, er ka iwen shin zegemnger nahan.

¹² Man shi U hemen ve sha ityôgh ki ibeenegh atetan man sha ityôgh ki usugh tugh, sha u nan ve iwanger sha gbenda u vea za yô.

¹³ Shi U sen sha uwo u Senai, U ôr kwagh a ve Sha, U na ve akaaôron a jirigh a jighilii, man atindiakaa a mimi man akaawan a dedoo kua atindi;

¹⁴ U pase ve icighaniyange i memen You man U wa ve atindi man akaawan kua atindiakaa sha ikev i wanakiriki Wou Mose;

¹⁵ U na ve kwaghyan u Sha kpaa, sha ci u ijen ve, man U due ve a mngerem ken vande sha ci u imura ve, U kaa a ve Wer, ve̱ nyôr, ve̱ ngohol tar u U kende uwegh Ough sha Wer, Ú na ve la.

¹⁶ Kpa ve, uter asev, ve er kwagh sha imanger, ve nômbo ikôr, ve ver ato sha atindi a Ou ga,

¹⁷ ve venda u ungwa kwagh, ve umbur akaa a kpilighyol a Ou a U er hen ve la ga, kpa ve nômbo ikôr; sha mhendan ve la je, ve ver orhemen ugen sha u vea hide vea za lu ikpan her. Kpa U ngu Aôndo u den asorabo, U mgbough a mrumun u sha mhôôn man mhôônom ma zungwen man ishima i wan kua erdoo wuee, U gbihi ve kera ga.

¹⁸ Een, je yô, shighe u ve haa wanbua la, ve kaa er: Ngun ka Aôndo wou u A dugh a we ken tar u Igipiti je ne, man ve er kwagh u ndôhôrshima kpishi,

¹⁹ nahan kpaa sha mhôônom Ou ma zungwen kpishi yô, U undu ve ken desereti ga; ityôgh ki ibeenegh kpaa kar sha ityouv vev kera ga, sha u hemen ve gbenda atetan, man ityôgh ki usugh kpaa kar kera ga, sha u tesen ve iwanger man gbenda u vea zaan a mi tugh yô.

²⁰ Man shi U na ve Jijingi Wou u dedoo Wer, A̱ tesen ve, U nyume ve mana Wou ken zwa ve ga, U na ve mngerem sha ci u imura ve.

²¹ Een, anyom akunduahar je, U lu koson ve ken desereti, kwagh ban ve ga; akondo a ve bee iyol ga, angahar a ve kpaa mura ga.

²² Man shi U na ve ityartor kua akuraior, U kar kwar sha ityar ve; nahan ve ngohol tar u Shihon, ka tar u tor u Heshebon je la, man tar u Ogo tor u Bashan.

²³ U seer ve ônov ngee er asan a Sha nahan, U nyôr a ve ken tar u U kaa a uter vev Wer, vea nyôr vea ya u la.

²⁴ Kape ônov mban nyôr, ya tar ne, man U gema ior mba ve tema ken tar la hingir sha ikev ve, ka Mbakanaan je la, U na ve sha ikev ve a utor vev imôngo, kua akuraior a tar la, sha u ve̱ er a ve sha ishima ve yô.

²⁵ Ve ngohol agar a lun a ugil kua tar u doon iyiagh, ve ngohol uya mba mgboughon a akaa a dedoo man azôr a ombon mngerem shimi a i time a shin avande man ishule i ikon i wain man ishule i olev kua ikon ngôgh i umen atam; ve ya kwagh kuma ve, ve kehe, kpe ve iyol sha iveren You i vesen.

²⁶ Nahan kpaa ve hemba ato, ve hendan a We, ve gbihi atindi a Ou ken ijime, ve wua uprofeti Ou mba ve pase ve ibo ve, sha u hiden a ve her a We la, ve er akaa a ndôhôrshima kpishi.

²⁷ Nahan U na ve sha ikev i mbaihomov vev Wer, ve̱ er ve ican; kpa zum u ican er ve man ve vaa a We yô, U ungwa ve Sha; sha mhôônom Ou ma zungwen kpishi la, U na ve mbayiman, ve yima ve sha ikev i mbaihomov vev.

²⁸ Kpa er ve zua a mmem kera yô, shi ve er kwaghbo sha ishigh You, nahan U na ve sha ikev i mbaihomov vev Wer, ve̱ ya tor sha a ve; nahan kpaa zum u ve hide ve zamber a We yô, U ungwa ve Sha; acin imôngo je U yima ve sha mhôônom Ou ma zungwen;

²⁹ shi U pase ve ibo ve, sha u hiden a ve hen atindi a Ou; nahan kpaa ve er kwagh sha ityough ki kehen, ve ver ato sha atindi a Ou ga, kpa ve er kwaghbo, ve laha ajiraôron a Ou, a or nana wa a iko yô, nana lu uma sha a la, ve yoghol akende, ve nômbo ikôr, ve venda u ungwa.

³⁰ Anyom kpishi je U lu wan ishima a ve, U pase ve ibo ve sha Jijingi Wou, sha akaaôron a uprofeti Ou; nahan kpaa ve rumun ve ver ato ga; ka nahan man U gema ve U na sha ikev i akuraior a ken tar la.

³¹ Nahan kpaa sha mhôônom Ou ma zungwen yum la, U tim ve ci ca ga, man shi U undu ve kera ga; gadia U ngu Aôndo u mgboughon a mrumun u sha mhôôn man mhôônom ma zungwen.

³² Yô, Aôndo wase, u hemban, u ageegh, u cier iyol, u wan ikuryan man erdoo iko; ican ne cii i̱ de luun kwagh u kiriki sha ishigh You ga, ican i i tser se a utor asev man atiator a ase man upristi asev man uprofeti asev man uter asev kua ior Ou cii la, hii sha ayange a utor mba Ashiria je zan zan nyian ne.

³³ Nahan kpaa U ngu a ishô sha akaa a a tser se la cii; gadia U er ieren i mimi, kpa se yô, se er ifer;

³⁴ utor asev man atiator a ase man upristi asev kua uter asev kpaa, ve wa atindi a Ou iko ga, ve ver ato sha atindi a Ou kua mbampase Ou kpaa ga, mba U we ve kwagh sha mi la.

³⁵ Gadia ve civir We ken tar ve ga, man sha iveren You i vesen i U ver ve a mi la kpaa ga, man ken tar u vesen u doon sule u U na ve la kpaa ga, man shi ve gema ishima, ve undu aeren a ve a bo kpaa ga.

³⁶ Nyian yô, se mba ikpan, man tar u U ne uter asev Wer ve̱ ya atam a u man ahôm a u ne, nenge, se mba ikpan ken u je.

³⁷ Man ngu nan utor mba U ver sha a vese sha ci u asorabo a ase la, mtsera kpishi; man mba yan tor sha ayol a ase kua sha uzendenya asev kpaa, sha asema a ve je; se yô, kwagh tsule se kpishi.

³⁸ Nahan se mba yan ikur i mimi, se mba ngeren i je; mbahemenev asev kua upristi asev mba veren ikav sha mi.