Nehemia 8 - ICIGHAN BIBILO

¹ Tsô ior cii kohol ishima i môm hen tembe u sha ishigh ki Hundagar u Mnger la; ve kaa a Esera, orngeren la er, a̱ va a ruamabera u atindi a Mose a TER wa Iserael la.

² Tsô pristi Esera va a atindi sha ishigh ki mkohol u ior, nomso man kasev, kua ior mba ve fatyô u ungwan kaven cii, sha uwer u sha utaankaruhar sha iyange i hiihii la.

³ A ôr kimi hen tembe u sha ishigh ki Hundagar u Mnger la, hii pepe je zan zan iyange sha tembe, sha ishigh ki nomso man kasev man mba ve fetyô u ungwan kaven yô; ior cii ver ato sha ruamabera u atindigh la.

⁴ Esera orngeren la tile sha daar u ikon u ve er sha ci u kwagh la yô; Matitia man Shema man Anaia man Uria man Hilkia kua Maaseia ve tile ikua a na, ken uwegh nagh ku yanegh; man ken uwegh nagh ku imesegh yô, lu Pedaia man Mishael man Malkiya man Hashum man Hashebadana man Sekaria kua Meshulam.

⁵ Tsô Esera bugh ruamabera la sha ashe a ior cii; gadia a tile a kar ior cii sha; er a bugh un yô, ior cii mough tile sha.

⁶ Tsô Esera sugh TER, Aôndo u hemban. Ior cii rumun er: Amen, Amen! Ve naregh ave ve sha; ve gure ve civir TER, ve kuma ishiv inya.

⁷ Man Yeshua man Bani man Sherebia, Yamin, Akubi, Shabetai, Hodia, Maaseia, Kelita, Asaria, Yosabadi, Hanan, Pelaia kua Mbalevi, ve pase ior atindi la; ior tile sha hen ajiir a ve je.

⁸ Man ve ôr ken uruamabera, ken atindi a Aôndo la, wanger wanger, ve pase inja i a kpaa, sha u ior ve̱ kav kwaghôron la yô.

⁹ Tsô Nehemia u a lu gomna la, man pristi Esera orngeren, man Mbalevi mba ve tesen ior, ve kaa a ior cii er: Nyian ka icighaniyange i TER, Aôndo wen; yô, de kera zungu nen ga, de kera vaan nen kpaa ga. Gadia ior cii lu vaan er ve ungwa akaaôron a atindi la yô.

¹⁰ Shi a kaa a ve er: Gba yemen nen tsô, za ya nen tar, ma nen kwaghnyohon, tindi nen mba i er kwagh sha ci ve ga la a kwar; gadia nyian ka icighaniyange i TER wase je, ishima i̱ de kera vihin ne ga; gadia iember i ne ember TER la ka agee a en je.

¹¹ Mbalevi yange ior cii er ve̱ huan, ve kaa er: Huan nen, gadia iyange ne ka icighaniyange je; asema a̱ de vihin ne ga.

¹² Tsô ior hembe yem cii, sha u vea za ya kwagh, vea ma kwagh, man sha u vea tindi a kwar hen mbagenev, shi vea ember kpishi, gadia ve kav akaaôron a i pase ve la.

¹³ Sha iyange i sha uhar la yô, mbavesen mba sha uya mba uter mba ior cii, man upristi kua Mbalevi ve kohol hen Esera orngeren, sha u vea ver ato sha akaaôron a atindigh yô.

¹⁴ Ve nenge i nger ken atindi er TER kaa Mose er Mbaiserael ve̱ tema ken atumbe, sha ayange a iniongo i sha uwer u sha utaankaruhar la;

¹⁵ man ve̱ yôô, shi ve̱ tindi loho hen agar a ve cii kua ken Yerusalem kpaa er: Due, za nen sha iwo, za tôô nen agbaa a olev man agbaa a olev u ken toho man agbaa a mirtel man andar a avile kua agbaa a ikon i wan ahu kpishi sha u eren atumbe er i nger nahan.

¹⁶ Tsô ior due, za va a mi, ve va er atumbe a ve a mi, hanmô sha hav mbu iyou i nan man sha ityembe ve, man sha ityembe i iyou i Aôndo, tembe u hen Hundagar u Mnger kua sha tembe u hen Hundagar u Eferaim la.

¹⁷ Tsô mkohol u ior mba ve hide ken kwar cii, ve er atumbe, ve tema ken a; gadia hii sha ayange a Yeshua wan u Nun la je ar sha iyange ne, Mbaiserael lu a er nahan ga. Nahan iember lu her kpishi.

¹⁸ Man ayange ayange, hii sha iyange i hiihii je zan zan ar sha iyange i masetyô la, a lu ôron ken ruamabera u atindigh u Aôndo. Ve er iniongo la ayange ataankarahar; iyange i sha anigheni la yô, lu icighanmkohol sha tindi.