Nehemia 6 - ICIGHAN BIBILO

¹ Tsô zum u i za ôr Sambalati man Tobia man Geshem Orarabia kua mbaihomov asev mbagenev er m maa gil cii, ian kera shi ga yô, nahan kpaa hen shighe la, m lu a zer ucivir sha ihindagar ga.

² Nahan Sanbalati man Geshem tindi loho her a mo, kaa er: Va sé zua ken gar ugen ken agar a ken gbulumaa u Ono. Kpa ve lu wan ishima u eren mo kwagh u bo.

³ Nahan m tindi mbatyomov her a ve, m kaa mer: M ngu eren zegetom, nahan me fatyô u van ga; inja na nan man á timbir tom shighe u me undu u, me va hen a vene?

⁴ Ve tindi loho her a mo kuma kwa nyiin je sha imbagbenda ne; mo di kpaa m lu kaan ve imo i môm la tsô.

⁵ Tsô Sanbalati tindi wanakiriki na her a mo er keke nahan, ka u sha kwa taan je la, a washika u ivegher sha uwe;

⁶ i nger kimi er: Mba ôron ken atôatyev, Gashemu kpaa ngu ôron, er we kua Mbayuda, ka ne ka hendan kwagh, ka nahan je man u maan gil ye; man we yô, hange u ka teman tor ve, kape i lu ôron la.

⁷ Shi u ver uprofeti sha u teren we ken Yerusalem, er: Tor ngu ken Yuda; nahan yô, á za pase tor akaaôron ne. Yô, va ase, sé nenge sha kwagh ne.

⁸ Tsô m tindi un a loho, m kaa mer: Akaa a u kaa a la cii, i er a nahan ga, kpa ka ken ishima you tsô u hen a ye.

⁹ Gadia ve cii, lu ve ka tan se mciem iyol, ve lu kaan er: Ave a̱ kpe ve sha tom la, je á kera er u ga. Yô, shi taver mo ave!

¹⁰ Tsô er m za hen ya u Shemaia wan u Delaia, wan u Mehetabel, u i wuhe un la yô, a kaa er: Yô, sé zua ken iyou i Aôndo, ken tempel, sé wuhe ihinda i tempel, gadia mba van sha u va wuan we, vea va tugh, vea va wua u.

¹¹ Kpa m kaa mer: Or er mo nahan kpaa nana yevese kwagh ha? Man shi ka hanma or er mo nahan, nana nyôr ken tempel, man nana lu uma here? Me nyôr ga.

¹² Tsô m kav er i lu Aôndo A tindi un ga yô, kpa a ôrom kwaghôron u profeti a kwaghbo ishima, gadia Tobia man Sanbalati ve ôr tôndo a na.

¹³ I ôr tôndo a na, sha u m̱ cia, m̱ er nahan, m̱ er kwaghbo, sha u vea zua a ityôkwagh i wan mo acôghol iyol, sha u vea heem yô.

¹⁴ Aôndo wam, umbur Tobia man Sanbalati sha aeren a ve ne, man profeti u kwase Noadia kua uprofeti mbagenev, mba i lu ve ka tan mo mciem iyol la.

¹⁵ Tsô i bee gilgar sha uwer u Elul ayange a u ikundu kar utaan, kohol ayange cii kuma akunduahargber kar ahar je.

¹⁶ Zum u mbaihomov asev cii ungwa nahan yô, atôatyev a a kase se cii, cier a iyol, iyol kpe ve, ve ure, gadia ve kav er tom ne, i lu sha agee a Aôndo wase i er u ye.

¹⁷ Man shi sha ayange la, mbatamen mba Mbayuda tindi uwashika kpishi hen Tobia, man uwashika mba Tobia kpaa lu nyôron hen ve.

¹⁸ Gadia ior mbagenev kpishi ken Yuda ve bum a na, gadia a lu wankem u Shekania wan u Ara; man wan na Yehohanan kpaa er wan u Meshulam wan u Berekia.

¹⁹ Man shi ve ter aeren a na a dedoo sha ishigh yagh, man ve ôr un kwaghôron wam kpaa. Tobia kpaa tindi uwashika sha u tan mo mciem iyol.