Nehemia 5 - ICIGHAN BIBILO

¹ Tsô ior ger mliam kpishi a kasev vev sha ci u anmgbianev vev Mbayuda.

² Mbagenev lu kaan er: Se a ônov asev mba nomso man mba kasev, se ngee; yô, i̱ na se alakema, se̱ ya se̱ lu uma.

³ Shi mbagenev lu kaan er: Se ver ishule yase ityungu kua ikon yase i wain man uya asev kpaa; yô, i̱ na se alakema sha ci u ijen.

⁴ Mbagenev di lu kaan er: Se gba injô sha ci u kpandegh ku tor, se ver ishule yase ityungu man ikon i wain kpaa.

⁵ Nahan ayol ase kua a anmgbianev asev ka kwagh môm, ônov asev kpaa mba er ônov vev nahan; man nenge ase, se mba nan mbayev asev mba nomso man mba kasev ken uikangen, ve hingir ikpan; ônov asev mba kasev mbagenev yô, vande hingir ikpan kera ve; man se fa kwagh u sé er ga, gadia ior mbagenev ngohol ishule yase kua ikon i wain kpaa.

⁶ Nahan ishima vihim kpishi zum u m ungwa mliam vem kua akaaôron ne kpaa yô.

⁷ Tsô m hen ken ishima yam, nahan m zôhô a mbatamen man mbatarev, m kaa a ve mer: Ne mba nan injô hiden ngohol mtser karen ikaa inya, hanmô wen hen anmgbian u nan. Tsô m lôhô ior mkohol u vesen sha kwagh ve la.

⁸ M kaa a ve, mer: Se yô, sha mfetyô wase yô, se paa anmgbianev asev Mbayuda, mba lu i tee ve atôatyev yam la; man ne yô, gema ne mba teen anmgbianev enev; nahan doo u ve̱ tee ayol a ve, se se̱ yama? Tsô ve huan ving, ve kera fa kwagh u vea kaa ga.

⁹ Man shi m kaa mer: Kwagh u ne eren ne a doo ga; guda u ne zenden ne cian Aôndo wase sha ci u iheen i atôatyev, mbaihomov asev la gaa?

¹⁰ Mo kpaa a anmgbianev av man mbatomov av, se lu nan ve injô i inyar man i uyia; yô, sé shi de nen injô ne.

¹¹ Yô, shi hide nen ve a ishule ve nyian, ishule ve i ikon i wain, man ishule ve i ikon i olev kua uya vev man shi ci môm ken mbaaci deri u inyaregh vegh man i iyiav man u wain kua u mkure, mba lu ne ngohol her a ve la.

¹² Tsô ve kaa er: Sé hide ve a mi, sé kera ker ma kwagh hen ve ga; sé er er u kaa nahan vough. Nahan m yila upristi, m kaa a ve mer, ve̱ bum er vea er sha ityendezwa ne.

¹³ Shi m nduur riga wam, m kaa mer: Kape hanma or u nan er sha ityendezwa ne ga yô, Aôndo Una nduur nan ken ya u nan kua tom u nan kera ne; kape á nduur nan nana hingir aveve la. Tsô, ior cii kaa er: Amen! Shi ve wuese TER. Nahan ior er sha ityendezwa ne.

¹⁴ Man shi hii sha iyange i i verem gomna ve ken tar u Yuda la, hii sha inyom i sha ikundu la je zan zan ar sha inyom i sha ikundugber kar uhar i tor Artashaseta la, ka anyom pue kar ahar je la, mo vea anmgbianev av se ya kwaghyan u gomna ga.

¹⁵ Kpa ugomna mba ve vande teman a mo yô, ve yuhwan ior ikav, ve ngohol bredi man wain her a ve, man shi azurfa ushekel akunduahar; mbatomov vev kpaa lu eren tahav sha ior; kpa mo yô, m er nahan ga, sha ci u cian Aôndo.

¹⁶ Shi m taver ishima sha tom u gilgar ne kpaa, se yam ma inya kpuaa kpaa ga; mbatomov av cii kpaa ve kohol sha tom la.

¹⁷ Man shi Mbayuda mbagenev man mbatarev, ior deri môm man akunduahargber, kua shi mba ve due ken atôatyev a a kase se, ve va her a vese la, ve yaan kwaghyan hen tebul wam.

¹⁸ Kwagh u i sôngo sha iyange i môm yô, lu bua môm man uicighanmbaiyôngov ataratar kua ikegh kpaa; i sôngo a sha inyaregh yagh; man ayange a karen pue yô, i va a hanma inja i wain kpishi; nahan kpaa m za iyol mer, i̱ nam kwaghyan u gomna ga, sha ci u ican lu eren ior mban yum.

¹⁹ Umbur mo sha kwagh u dedoo, Aôndo wam, sha akaa a m er sha ci u ior mban cii.