Nehemia 11 - ICIGHAN BIBILO

¹ Atiator a ior tema ken Yerusalem; ior mbagenev yô, ve er ishor sha u tsuwan or môm ken mbapuev er nana̱ va tema ken Yerusalem, icighangar la, mba utaankarunyiin yô, ve̱ tema ken agar agen.

² Tsô ior wuese mba ve rumun u za teman ken Yerusalem sha asema ve la cii.

³ Mban ka mbahemenev mba hen ipaventar la, mba ve za tema ken Yerusalem la; kpa ken agar a Yuda yô, hanma or nan tema ken ya u nan ken agar a ve: Iserael man upristi man Mbalevi man mbasôrontempel kua ônov mba mbatomov mba Solomon.

⁴ Ken Yerusalem yô, ônov mba Yuda mbagenev tema ker, kua ônov mba Benyamin kpaa. Ken ônov mba Yuda yô, lu: Ataia wan u Ushia, wan u Sekaria, wan u Amaria, wan u Shefatia, wan Mehalalel, ken ônov mba Perese;

⁵ man Maaseia wan u Baruki, wan u Kolhose, wan u Hasaia, wan Adaia, wan u Yoyaribi, wan u Sekaria, wan u Orshilo.

⁶ Ônov mba nomso mba Perese cii, mba ve tema ken Yerusalem yô, lu ior deri unyiin man akunduatar kar anigheni, anomaior a ageegh.

⁷ Ônov mba nomso mba Benyamin yô lu: Salu wan u Meshulam, wan u Yoedi, wan u Pedaia, wan u Kolaia, wan u Maaseia, wan u Itiel, wan u Yeshaia.

⁸ Ken ijime na yô, lu Gabai man Salai, lu ior deri utaankarunyiin man ikundu kar anigheni.

⁹ Yoel wan u Shikeri lu ornengen sha a ve; Yuda wan u Hasenua lu or u sha uhar u nengen sha gar la.

¹⁰ Ken upristi yô, lu: Yedaia, wan u Yoyaribi man Yakin man

¹¹ Seraia wan u Hilkia wan u Meshulam, wan u Sadoki, wan u Merayoti, wan u Ahitubi, orhemen u nengen sha iyou i Aôndo,

¹² man anmgbianev vev mba ve lu eren tom u iyou la, lu ior deri anigheni man ikundu kar uhar; man Adaia wan u Yeroham, wan u Pelalia, wan u Amshi, wan u Sekaria, wan u Pashur, wan u Malkiya,

¹³ man anmgbianev nav, uityombaiorov mba sha uya mba uter, lu ior deri uhar man akunduahar kar uhar; man Amashai wan u Asarel, wan u Ahasai wan u Meshilemoti, wan u Imer,

¹⁴ man anmgbianev vev, anomaior a ageegh, lu ior deri man ikundu kar anigheni; ornengen sha a ve yô, lu Sabediel, wan u Hagedolim.

¹⁵ Ken Mbalevi yô, lu Shemaia wan u Hashubi, wan u Aserikam, wan u Hashabia, wan u Buni;

¹⁶ man Shabetai man Yosabadi, mba uhar ken uityombaiorov mba Mbalevi, mba ve lu nengen sha tom u iyou i Aôndo u ken won la;

¹⁷ man Matania, wan u Mika, wan u Sabedi, wan u Asav, u a lu orhemen sha u hiin ishughun ken msen yô, kua Bakebukia, un lu orhemen u sha uhar ken anmgbianev nav; man Abeda wan u Shamua, wan u Galal, wan u Yedutun.

¹⁸ Mbalevi mba ken icighangar cii yô, lu ior deri uhar man akunduanyiin kar unyiin.

¹⁹ Man shi mbakuranhunda yô, lu Akubi man Talmon kua anmgbianev vev mba ve lu kuran ihinda la, lu ior deri man akunduatargber kar uhar.

²⁰ Mba ve shi ken Iserael man ken upristi man Mbalevi yô, ve lu ken agar a Yuda cii, hanmô hen dyako u nan.

²¹ Kpa mbasôrontempel yô, tema ken Ofel; Shiha man Gisepa lu nengen sha mbasôrontempel.

²² Ornengen sha Mbalevi ken Yerusalem yô, lu: Ushi wan u Bani, wan u Hashabia, wan u Matania, wan u Mika, ken ônov mba Asav mba ve wan atsam la, sha ci u tom u iyou i Aôndo.

²³ Gadia tor kaa imo sha kwagh ve, man shi i ver tindi u taver sha ci u mbawanatsam, sha ci u gbayol ve u ayange ayange.

²⁴ Man Petahia wan u Meshesabel, u ken ônov mba Sera, wan u Yuda, lu angahar a tor sha akaa cii sha ci u ior.

²⁵ Sha kwagh u agar man akôngo a ve yô, ônov mba Yuda mbagenev tema ken Kiriati-arba kua agar a na, man ken Dibon kua agar a na, man ken Yekabeseel man agar a na;

²⁶ man ken Yeshua, man ken Molada, man Bete-peleti;

²⁷ man ken Hasar-shual, man ken Bersheba kua agar a na;

²⁸ man ken Shikelagi, man ken Mekona, man agar a na;

²⁹ man ken En-rimon, man ken Sora, man ken Yarmuti,

³⁰ Sanoa, Adulam man agar a ve, Lakishi man akôngo a na, Aseka man agar a na; ve haa afo, hii hen Bersheba zan zan ar hen pev u Hinom.

³¹ Ônov mba Benyamin kpaa tema ken Geba zan zan za ar hen Mikemashi man Aiya man hen Betel a agar a na;

³² hen Anatoti, Nobu, Anania,

³³ Hasor, Rama, Gitaim,

³⁴ Hadidi, Seboim, Nebalati,

³⁵ Lodi, man Ono, Pev u mbafan tom u aveegh la.

³⁶ Man Mbalevi yô, ikwe ve igen ken Yuda i magh i a Benyamin.