Mpase U Yohane 4 - ICIGHAN BIBILO

¹ Ken masetyô u akaa ne yô, m ver ashe, yô, nenge, hunda lu Sha, lu ivegher. Man imo i hiihii i m ungwa er ka ikpamkor nahan la yô, i ôr kwagh a mo i kaa er: Kôndo sha heen, me tese u akaa a aa er ken masetyô u angan keng yô.

² Fese nahan m lu ken Jijingi, man nenge, i ver ikônough ki torough Sha man i tema sha ikônough ki torough kila.

³ Un u A tema sha mi la, mluashe Na lu er iwen i yasepi man i sardiu nahan, ikume i sha aôndo kase ikônough ki torough kila wa atô, mluashe u i lu er emeraldi nahan.

⁴ Man mkônom ma torom magenem ikundu kar m nyiin kase ikônough ki torough kila wa atô. Mbatamen ikundu kar unyiin tema sha mkônom ma torom mara, ve lu a akondo a pupuu iyol man atsar a zenaria lu ve sha ityou.

⁵ Ken ikônough ki torough kila yô, inyiar due ker man shi imo man idyuran kpaa. Amenger ataankarahar lu yeghen usu bong sha ishigh ki ikônough ki torough kila, ka ujijingi mba utaankaruhar mba Aôndo je la.

⁶ Sha ishigh ki ikônough ki torough kila lu er ka zegemnger u lun er gelase nahan, bee krusetalu. Man ker atô u ikônough ki torough kila man ken ikasen i ki akaauma lu her anyiin, a lu a ashe iyol kpulughuu sha ishi man ken ijime kpaa.

⁷ Kwaghuma u hiihii la lu er begha nahan, kwaghuma u sha uhar la lu er bua nahan, kwaghuma u sha utar la lu a ishigh er ka ki orough nahan, man kwaghuma u sha unyiin la lu er gafa u purugh nahan.

⁸ Akaauma a anyiin la cii hanmô ve lu a akper ataratar, ve cir ashe iyol kpulughuu ken won man kimi kpaa. Tugh man tetan cii ve memen ga, ve kaan er: Icighan, Icighan, Icighan, Ter Aôndo Uhembanagee, u ngise lu shi A lu hegen shi A lu van kpaa la.

⁹ Man hanma shighe u akaauma la a na iengem man icivir man iwuese hen Un u A tem sha ikônough ki torough A lu uma gbem sha won la yô,

¹⁰ mbatamen mba ikundu kar unyiin la ve gba inya sha ishigh ki Un u A tem sha ikônough ki torough la ve civir Un u A lu uma gbem sha won la. Ve haa atsar a ve sha ishigh ki Un u A tem sha ikônough ki torough la ve kaa er:

¹¹ We, Ter Aôndo wase, U kuma u ngohol iengem man icivir man agee gadia U gba akaa cii man ka sha ishima You kpaa a lu, shi i gbe a kpaa ye.