Mpase U Yohane 20 - ICIGHAN BIBILO

¹ Shi m nenge ortyom u Sha lu senen Sha, lu a ishindan u ihungwa i i ze kweng la shi lu a ishiligh ku vesen ken uwegh nagh kpaa.

² Tsô a kôr darakon, ka tseiyô u a lu diabolo man Satan kpaa la, a kange un, una lu uikangen zan zan anyom dubu,

³ a kende un shin ihungwa i i ze kweng la a cir i a ver ikav sha mi sha u a̱ de kera tsughun akuraior ga, saa anyom dubu aa kuma ve. Ken masejime yô, á shi á pase un anshighe kpeghee keng.

⁴ Tsô m nenge mkônom ma torom, ior tema sha mi, i na ve ijir i ôron sha ikev. Shi m nenge uuma mba ior mba i gber ve ityough sha ci u shiada u Yesu man sha ci u mkaanem ma Aôndo la, ka mba ve civir inyam la ga shin eev mbu i kpaa ga, ve ngohol ikav i i sha atsul a ve ga, shin sha ave a ve kpaa ga. Ve nder ve tema tor a Kristu imôngo kuma anyom dubu je.

⁵ Mbakpenev mbagenev mba ve shi her yô, ve nder ga saa anyom dubu la aa kuma ve. Ka mnder u hiihii je ne.

⁶ Or u nan lu a ci sha mnder u hiihii ne yô, saan nan iyol, nan ngu icighanor kpaa. Mban yô, ku u sha uhar la ngu a tahav sha a ve ga, vea gema vea lu upristi mba Aôndo man mba Kristu kpaa, vea tema tor a na imôngo sha anyom dubu la.

⁷ Zum u anyom dubu la aa bee yô, á sagh Satan ken gaadi na kera.

⁸ Una due sha u tsughun akuraior a ken azongo a tar anyiin la, ka Gogi man Magogi je la, ka sha u una kohol ve sha ci u utya. Ingeegh vegh kuma er waarawa u shin zegemnger nahan.

⁹ Ve tange van sha tar ioo, ve va kase afo a uicighanmbaiorov man shi gar u doon ishima la kpaa. Tsô usu sen Sha hia ve kera cii.

¹⁰ Diabolo u a lu tsughun ve la kpaa i kende un ken ber u usu man sulfur ape inyam man profeti u aie ve lu la; á eren ve ican atetan kpaa tugh kpaa gbem sha won.

¹¹ Shi m nenge zegeikôn u pupuu u tor. Un u A tema sha mi la yô, tar man Sha yevese sha ishigh Nagh kera, ian kera lu sha ci ve mape ga.

¹² Tsô m nenge mbakpenev tile sha ishigh ki ikônough ki torough kila, mbavesen kua mbakiriki cii. Nahan i bugh uruamabera. I shi i bugh ruamabera ugen kpaa, ka ruamabera u uma je la. Tsô i ôr mbakpenev ijir sha akaa a i nger ken uruamabera mbala, sha aeren a ve.

¹³ Zegemnger na mbakpenev mba ve lu shin a na la. Ku man Hade kpaa na mbakpenev mba ve lu shin ve la. I ôr hanma or ijir sha aeren a nan ser ser.

¹⁴ Ku man Hade yô, i kende ve ken berusu. Ka ku u sha uhar, ka berusu je la.

¹⁵ Man aluer i nenge i nger or ken ruamabera u uma la ga yô, i kende nan ken berusu je.