Mpase U Yohane 2 - ICIGHAN BIBILO

¹ Nger hen ortyom u nongo u Kristu u ken Efese wer: Un u A ker asan ataankarahar ken uwegh Nagh ku yanegh shi A lu zenden ker atô u udaarmbaamengerev mba zenaria mba utaankaruhar la, ngu ôron akaa ne nahan er:

² M fa aeren a ou man tom wou u sha ican kua ishima i taver you, man shi er u fetyô u rumun aferaior ga, kpa u kar mba ve yer ayol a ve er mbaapostoli, kpa i lu nahan ga la, u nenge ka mbaaiev.

³ U ngu a ishima i taver, u rumun ican sha ci u iti Yam kpaa, u vôr ga.

⁴ Kpa kwagh shim a we, ka er u undu dooshima wou u hiihii la yô.

⁵ Umbur hen ape u gbe yô, gema ishima, er aeren a hiihii la. Gayô, Me va hen we, Me tôô daarimenger wou ken ijiir na kera, aluer wea gema ishima ga yô.

⁶ Kpa kwagh ne yô, u ngu a mi, u kôr aeren a Mbanikolai la ihom a Mo kpaa M ker a ihom la.

⁷ Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Or u nan hembe yô, Me na nan, nana ya kon u uma u u lu ken Paradiso u Aôndo la.

⁸ Nger hen ortyom u nongo u Kristu u hen Semurna wer: Un u A lu u hiihii man u masetyô u a kpe kpa shi A lu uma la, ngu ôron akaa ne nahan er:

⁹ M fa ican you i yan man shi ibanave you, nahan kpaa u ngee a akaa; man ityuhwanev mbi ior mba ve yer ayol a ve er Mbayuda kpa i lu nahan ga, i lu shinagoge u Satan la.

¹⁰ De cie akaa a aa va tser u la ga. Nenge diabolo ngu veren iyol u una kende ior enev mbagenev ken gaadi, sha u á kar ne yô; man ican ia er ne á kuma ayange pue je. Lu jighjigh, ar ken ku je man Me na u tsar u uma ye.

¹¹ Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Or u nan hembe yô, ku u sha uhar la ua er nan kwagh ga.

¹² Nger hen ortyom u nongo u Kristu u hen Peregamu wer: Un u A lu a sanker u esen akur ahar tsor tsor la ngu ôron akaa ne nahan er:

¹³ M fa henpe u tem ka henpe ikônough ki torough ki Satan ki lu je la, nahan kpaa u kusu iti Yam gbang gbang, u nyiman jighjigh u nan Mo la ga, shin sha ayange a Antipa orshiada Wam u jighjigh la kpaa, un u i wua un hen ven, henpe Satan a tem la.

¹⁴ Kpa akaa shim a we kpeghee, ka er u lu a mbagenev hen a we mba ve kusu ityesen i Balaam u a tese Balaki er a̱ gbihi kwaghhônon sha ishigh ki ônov mba Iserael la; ka u yan inyamakombo man shi u eren idya je la.

¹⁵ We kpaa, u ngu a mbagenev mba ve kusu ityesen i Mbanikolai la nahan vough. Nahan yô, gema ishima,

¹⁶ gayô, Me va hen we fefa, Me va nôngo ityav a we sha sanker u ken zwa Wam ne.

¹⁷ Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Or u nan hembe yô, Me na nan mana u ken myer la, shi Me na nan iwen i pupuu, man sha iwen la yô, i nger iti i he sha mi, i ma or nan fe i ga, saa or u nana ngohol i la.

¹⁸ Nger hen ortyom u nongo u Kristu u hen Tiatire wer: Wan u Aôndo u A lu a ashe er nomborusu nahan man shi angahar a Na a lu er dela u engem la, ngu ôron akaa ne nahan er:

¹⁹ M fa aeren a ou man dooshima wou man jighjigh u nan wou man tom wou man ishima i taver you, man er aeren a ou a masetyô la hemba ngeen a a hiihii la.

²⁰ Kpa kwagh u a shim a we yô, ka er u gbe den Yesebel kwase u a yer iyol na er profeti la, ngu tesen man ngu tsughun mbatomov Av er ve̱ er idya shi ve̱ ya inyamakombo kpaa.

²¹ M na un ian Mer, a̱ gema ishima, kpa sar un pe geman ishima den idya na la ga.

²² Nenge, Me kende un inya sha gambe; mba ve er idya a na la kpaa Me kende ve ken zegecan, aluer vea gema asema vea de aeren a na la ga yô,

²³ man Me wua ônov nav sha ku. Iniongo i Kristu cii ia fa er i lu Mo je M tim ahi man asema ye; man Me na ne injar sha inja i aeren a en ser ser.

²⁴ Kpa ne mbagenev mba ken Tiatire mba ne lu a ityesen ne ga shi ne fe akaa a cimin a Satan er ve kaan nahan la ga yô, M ngu kaan ne mer: M kera ngu seer ne ma ikav mbigenev ga.

²⁵ Kpa kwagh u ne lu a mi la yô, kusu nen un gbang gbang zan zan Me kar van.

²⁶ Or u nan hembe shi nana ver ishima sha aeren a Am zan zan mkur yô, Me na nan tahav sha akuraior,

²⁷ nana tema tor sha a sha tôgh ku iyôôgh er ka i hembe ityegh avur avur nahan, er Mo kpaa M ngohol tahav hen Terem nahan,

²⁸ man Me na nan ishan i sha use.

²⁹ Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô.