Mpase U Yohane 19 - ICIGHAN BIBILO

¹ Ken masetyô u akaa ne m ungwa er ka zegeimo u zegeikpelaior Sha lu kaan er: Haleluya! Myom man iengem man agee ka a Aôndo wase,

² gadia ajir a Na a ôron ka a mimi, nga jighjigh kpaa; gadia A kure ijir i zegeidyakwase u a lu vihin tar sha idya na ne, A or un iyev sha ci u awambe a mbatomov Nav la.

³ Shi ve kimbir u kaan er: Haleluya! Mnyim nam ma kôndon sha gbem sha won.

⁴ Tsô mbatamen mba ikundu kar unyiin la man akaauma a anyiin la gba inya ve cir ishigh inya ve civir Aôndo u A tem sha ikônough ki torough kila, ve kaa er. Amen, Haleluya!

⁵ Imo kpaa due ken ikônough ki torough kila kaa er: Wuese nen Aôndo wase, ne mbatomov Nav cii, ne mba ne cie Un ne, mbakiriki kua mbavesen cii.

⁶ Tsô m ungwa ihuran er ka zegeikpelaior nahan, shi lu er ihuran i mngerem ma vesen nahan, shi lu er ihuran i idyuran i taver taver nahan, i lu kaan er: Haleluya! Ter wase Aôndo, Uhembanagee, tema tor ve.

⁷ Se lu nen saan saan, se ember nen, se civir nen Un, gadia ivaa i zuan i Waniyôngo kuma ve, kwase Na kpaa kohol iyol ve.

⁸ I rumun un er a̱ wuha iyol sha akondo a pupuu a dedoo a engem ashe man a wang kpaa— gadia akondo a pupuu a dedoo la yô, ka aeren a perapera a uicighanmbaiorov.

⁹ Tsô ortyom u Sha kaa a mo er: Nger wer: Mba i lehe ve iniongo i kwasehe i Waniyôngo yô, saan ve iyol. Shi a kaa a mo er: Angan ka akaaôron a Aôndo a mimi.

¹⁰ Nahan m gba inya, m cir ishigh inya hen angahar a na, sha u me civir un. Kpa a kaa a mo er: De eren nahan ga! M ngu ortom a we imôngo kua anmgbianev ou mba ve lu a shiada sha kwagh u Yesu la kpaa. Civir Aôndo. Gadia ka shiada u sha kwagh u Yesu a lu jijingi u akaaôron a profeti ye.

¹¹ Tsô m nenge Sha lu ivegher, nenge, nyinya u pupuu lu. Un u A tema sha mi la i yilan Un er Jighjigh man Mimi. Un er ijir sha perapera, shi nenge ityav kpaa.

¹² Ashe a Na ka nomborusu; sha ityough Nagh yô, ader a tor lu imôngo. I nger Un iti i ma or nan fe i ga, saa Un iyol Na tsô.

¹³ Ngu a riga iyol u i we un shin awambe yô, mba yer iti Na er, Imo i Aôndo.

¹⁴ Akumautya a Sha dondo sha a Na, ve lu sha anyinya a pupuu, ve haa akondo a pupuu a dedoo a kungun a wang iyol.

¹⁵ Sanker u esen tsor tsor due ken zwa Na sha u Una gber akuraior yô. Ka Un Una tema tor sha a sha tôgh ku iyôôgh ye. Shi ka Un kpaa Una shoghol ihungwa i wain i iyugh i sha ishima i vihin i Aôndo Uhembanagee la ye.

¹⁶ I nger iti sha riga Na man sha namegh Nagh er: Tor u utor man Ter u uter.

¹⁷ Shi m nenge ortyom u Sha tile sha iyange, lu yilan inyon i purugh sha kwavaôndo cii sha zegeimo er: Va kohol nen hen zegeiniongo u Aôndo ne,

¹⁸ va ya nen inyam i utor man inyam i anyinya kua mba ve hende a yô, man inyam i ior cii, ônov man ikpan, mbakiriki kua mbavesen cii.

¹⁹ Shi m nenge inyam la man utor mba shin tar man akumautya a ve, ve kohol sha u nôngon ityav a Un u A tem sha nyinya la man shi akumautya a Na.

²⁰ Tsô i kôr inyam la man shi profeti u aie la kpaa, un u a lu eren uivande sha ishigh ki inyam, a lu tsughun ior mba ve ngohol ikav i inyam la man shi mba ve civir eev mbu i la kpaa, i gbihi ve uhar cii uma ken berusu u a lu yeghen sha sulfur la.

²¹ Mbagenev mba ve shi her yô, i wua ve sha sanker u Un u a tem sha nyinya la, ka sanker u a lu duen ken zwa Na la, inyon cii kpaa ide sha inyam ve la.