Mpase U Yohane 18 - ICIGHAN BIBILO

¹ Ken masetyô u akaa ne yô, m nenge ortyom u Sha ugen lu senen Sha, lu a tahav mbu vesen, tar kpaa wanger sha iengem na la.

² A yila sha imo i genger genger a kaa er: A yôhôl ve, Zegebabilon yôhôl ve, hingir ijiir i ujijingi mba bov tsan her, shi hingir ya u hanma jijingi u hwangeregh man shi ya u inyon i hwangerev man i ndôhôr ishima kpaa.

³ Gadia akuraior cii ma wain u isharen na i ijimbagh la. Utor mba shin tar kpaa er idya a na. Mbakasuav mba shin tar hingir mbanyarev sha agee a ishar na i i haa ve iyol la.

⁴ Shi m ungwa imo igen due Sha kaa er: Nongoior Wam, due nen ken a na kera sha er né nyôr nongo sha asorabo a na ga, shi né ngohol atsan a tseren un la kpaa ga yô.

⁵ Gadia asorabo a na hingir tihi tav je ar Sha, Aôndo kpaa umbur afer a na.

⁶ Er nen a na vough er un kpaa a eren nahan la; or nen un iyev kwa har sha aeren a na la; nungwa nen un kwaghman kwa har shin iyongo i a lu nungwan la.

⁷ Er a lu civir iyol na shi ishar i lu haan un iyol nahan yô, kape na nen un ican man ijungwen vough la. Gadia ken ishima na yô, a lu kaan nahan er: M tema tor je, m ngu kwasecôghol ga, ijungwen kpaa me nenge a mi ashe ga.

⁸ Sha ci u nahan yô, atsan a na aa va shire sha a na iyange i môm je. Ka ku man ijungwen man ijen kpaa, á nande un sha usu kpaa. Gadia Ter Aôndo u A lu ôron un ijir la ka u ageegh je.

⁹ Utor mba ve er idya a na shi ishar i hee ve iyol a na imôngo la, vea vaa, vea zungwe un zum u vea nenge mnyim ma mhie na la.

¹⁰ Vea tile ken ica vea cia atsan a na la vea kaa er: Kwagh tser u ve! Kwagh tser u ve! We, zegegar ne, Babilon u taver ne, ijir you kure ken ihwa i môm tsô.

¹¹ Mbakasuav mba shin tar mba vaan mba zungwen un, gadia or môm kera ngu yamen ikav vev ga.

¹² Ka ikav mbi sha zenaria man azurfa man awen a injaa man utagbede man akondo a pupuu a dedoo man akondo a nyian dindee man akondo a shiliti man akondo a nyian bong man shi hanma inja i kon u human doon man hanma anzaakaa a i er a sha anyi a nortar man shi hanma anzaakaa a i er a sha ikon i injaa man sha dela man sha iyôgh ki iligh man sha awen a mabel

¹³ man shinamon man amomo man akaa a human doon man mkurem ma human doon man libano man wain man mkurem man mwem ma kengese man alakema man ibua man iyôngo man anyinya man akeke a zeren sha anyinya man ikpan man uuma mba iorov kpaa.

¹⁴ Atam a ou a a lu saren uma wou yum la kpaa a due ken a we kera, hanma kwagh u injaa man hanma kwagh u engem saa u ishe ve, á kera zua a mi mayange ga.

¹⁵ Mbaeren kasua sha akaa ne mba ve zough a mtsera ken a na, vea tile ken ica vea cia atsan a na la, vea vaa vea zungwe kpaa.

¹⁶ Vea kaa er: Kwagh tser un ve, kwagh tser un ve, zegegar ne u a hee akondo a pupuu a dedoo iyol man akondo a nyian dindee man akondo a nyian bong kpaa, shi a er hwe iyol sha zenaria man awen a injaa man utagbede kpaa ne,

¹⁷ gadia sha ihwa i môm tseegh tsô i vihi imbaikpelainyar ne cii. Mbakôômutso cii man mbaperen zegemnger man mbaerentom sha utso man mbazenden shin zegemnger cii, ve tile ken ica.

¹⁸ Mba nengen mnyim ma mhie na yô, ve genger imo ve kaa er: Ka hanma gar a kom sha zegegar nee?

¹⁹ Tsô ve haa vuulevu sha ityouv vev, ve vaa, ve zungwe, ve kaa er: Kwagh tser un ve, kwagh tser un ve, zegegar ne, mba ve lu a utso shin zegemnger cii ve hingir mbanyarev sha akaa a na a injaa la. Gadia ken ihwa i môm tseegh tsô i yôhôl un kera cii.

²⁰ We Sha, man ne uicighanmbaiorov man mbaapostoli man uprofeti, ember nen sha kwagh na ne, gadia Aôndo kure ijir yen a na ve.

²¹ Tsô ortyom u Sha ugen u taver iyol tôô iwen er zegenase nahan kende shin zegemnger, kaa er: Kape á mgbegha zegegar u Babilon kera sha agee, á kera zua a na ga je ne.

²² Á kera ungwa imo i mbakuhwan adiguve ken we ga, shin mbawanatsam shin mbatôngonamar shin mbatôngonikor kpaa ga. Man á kera zua a ma or u fan eev u eren ma tom u sha kwaghfan ken we kpaa ga, á kera ungwa iov i nase ken a we kpaa ga.

²³ Ma imenger ia kera ta iwanger ken a we kpaa ga, á kera ungwa imo i orkwasehe man shi kwasehe ken a we kpaa ga. Gadia mbakasuav ou lu ashagbaior shin tar, akuraior cii tsume sha ahir a ou la.

²⁴ Ka ken a na man i zua a awambe a uprofeti kua a uicighanmbaiorov man mba i wua ve shin tar cii la ye.