Mpase U Yohane 16 - ICIGHAN BIBILO

¹ M shi m ungwa zegeimo due ken tempel, i kaa a mbatyomov mba Shaav mba utaankaruhar mbala er: Za nen za haa nen agbande a ataankarahar a iyugh i Aôndo i lu shimi la shin tar.

² Tsô ortyom u Sha u hiihii la za za haa gbande na shin tar, maa ior mba ve lu a ikav i inyam shi ve lu civir eev mbu i kpaa la, ve gba avav a bo a vihin.

³ U sha uhar gema haa gbande na shin zegemnger maa hingir er ka awambe a orkpen nahan, hanma kwagh u uma u shin zegemnger cii kpe.

⁴ Ortyom u Sha u sha utar haa gbande na shin uifi man amboramnger maa ve hingir awambe.

⁵ Shi m ungwa ortyom u mnger lu kaan er: We, U ngu u perapera, We u U lu hegen, ngise kpaa U lu la, U ngu wang sha ajir a ôron a Ou ne.

⁶ Gadia ve haa awambe a uicighanmbaiorov man uprofeti kpaa, nahan U na ve awambe Wer, ve̱ ma. Kwagh ne kuma sha a ve je.

⁷ Shi m ungwa atse a nanden nagh sha mi la kpaa lu kaan er: Kape i lu je la Tere, Aôndo Uhembanagee, ajir a Ou a ôron ka sha mimi man sha jighjigh kpaa.

⁸ Ortyom u Sha u sha unyiin la haa gbande na sha iyange maa i na iyange ian sha u i̱ hia ior sha usu yô.

⁹ Tsô ior hia sha mtsee u taveraa la, ve gba tuhwan iti i Aôndo u A lu a tahav sha atsan angan, ve kera gema asema, ve na Un icivir ga.

¹⁰ Ortyom u Sha u sha utaan la haa gbande na sha ikônough ki torough ki inyam la, maa tartor u i wa ime, ior gba nyuman iniombor ve sha ci u mnyoon.

¹¹ Ve tuhwa Aôndo u Sha sha ci u mnyoonom vem man shi avav a ve la kpaa, ve kera gema asema a ve sha aeren a ve la kera ga.

¹² Ortyom u Sha u sha ataratar la haa gbande na shin zegeifi u Uferati, maa mngerem nam uma sha u sôron gbenda sha ci u utor mba sha ityoughkitaregh la.

¹³ M shi m nenge ujijingi mba hwangerev utar er asôhô nahan due ken zwa u darakon la man shi ken zwa u inyam la man shi ken zwa u profeti u aiegh la.

¹⁴ Gadia ka ujijingi mba diabolo mba ve eren uivande la, mba duen zan hen utor mba sha tar sha won cii sha u kohol ve ijiir i môm sha ci u ityav mbi iyange i vesen i Aôndo, Uhembanagee la.

¹⁵ Nenge, M ngu van er ormbaiv nahan. Or u nan lu per shi nan kor riga u nan sha u nana kera zende idyelegh er á nengen kunya u nan ga yô, i saan nan iyol.

¹⁶ Tsô ve kohol ve imôngo hen ijiir i i yer ken zwa u Heberu er Armagedon la.

¹⁷ Ortyom u Sha u sha utaankaruhar la haa gbande na sha ahumbe, nahan zegeimo due ken tempel, ken ikônough ki torough kila, lu kaan er: I kure ve!

¹⁸ Maa inyiar lu kpishi kua imo man idyuran kpaa, tar kpaa tenger sha agee, imba i u lu a vande tenger mayange ga, hii sha shighe u or hii teman shin tar la je, kape mtenger u tar ne a lu sha agee ne.

¹⁹ Nahan zegegar la pav ikwe itiar, agar a akuraior kpaa yôhôl kera. Aôndo umbur Zegebabilon sha u nan un iyongo i wain u iyugh Na la.

²⁰ Nahan acile cii yevese, i kera zua a iwo kpaa ga.

²¹ Uzegembaawombov osough Sha haa shin tar, iwombo i môm yuhwa kuma er talenti môm nahan (pams deri môm). Ior gba tuhwan Aôndo sha ican i awomboogh la, gadia ican i a la cier iyol yum.