Mpase U Yohane 13 - ICIGHAN BIBILO

¹ Tsô m nenge inyam due shin zegemnger lu a akor pue man ityouv itiankarihiar. Sha akor a i yô, ader a tor lu pue, sha ityouv mbi i yô, ati a uityuhwan lu.

² Inyam shon i m nenge a mi la yô, i lu er ka anyam nahan, angahar a i lu er a dwem nahan, man zwa u i lu er zwa u begha nahan. Darakon gema na i agee a na man shi ikônough nagh ki torough man shi tahav mbu vesen kpaa.

³ Ityough ki mômough ken ityouv mbi i yô, lu er i gber ki, er kia kpe nahan; kpa ivav i i mgbôghom a ku la i bee. Tar cii dondo inyam la, kpiligh ior iyol a i,

⁴ ve civir darakon sha ci u a gem tahav nav a ne inyam la yô, shi ve civir inyam la kpaa, ve kaa er: Ka an nan lu er inyam ne nahana, man shi ka an nana fatyô u nôngon ityav a ii?

⁵ Shi i na inyam la zwa sha u ôron uzegembaakaav kua ityuhwanev kpaa, shi i na i ian er i̱ eren tahav zan zan iwer akunduahar kar ihiar.

⁶ Tsô i bugh zwa u i, i gba tuhwan Aôndo, shi i tuhwa iti Na kpaa man shi tabernakel Na kpaa, ka mba ve tem Sha je la.

⁷ Shi i na i ian sha u i̱ nôngo ityav a uicighanmbaiorov i̱ hemba ve kpaa, shi i na i tahav sha hanma nongo man hanma nongoior man hanma zwa man hanma ikurior kpaa.

⁸ Mba ve tem shin tar cii vea civir i, ka ve mba i nger ati a ve ken ruamabera u uma u Waniyôngo ga la, Un u i senge Un hii sha igbetar je la.

⁹ Aluer or nana lu a ato yô, nana̱ ungwa.

¹⁰ Aluer i ver or sha ci u uikangen yô, ka ken uikangen je nana za keng ye. Aluer or nana wua sha sanker yô, nan di kpaa á wua nan sha sanker keng. Ka sha kwagh ne man ishima i taver i uicighanmbaiorov man jighjigh ve u nan a lu ye.

¹¹ Shi m nenge inyam igen due shin tar, lu a akor ahar er waniyôngo nahan, kpa i gema i lu ôron kwagh er darakon nahan.

¹² I lu eren tahav mbu inyam i hiihii la cii sha ishigh ki i hiihii la, shi i lu eren er tar kua mba ve tem ken u yô, ve̱ civir inyam i hiihii i ivav i i, i mgbôghom ken ku kpa i war la.

¹³ I er uivande mba vesen, i er usu je kpaa due Sha sen shin tar sha ashe a ior.

¹⁴ I lu tsughun ior mba ve tem shin tar sha uivande mba i ne i u eren sha ishigh ki inyam i hiihii la, i kaa a ve er ve̱ er eev mbu inyam i i gber i sha sanker kpa i lu uma her la.

¹⁵ Man i na i ian sha u i̱ na iôôn ken eev mbu inyam la nahan eev mbu inyam mbula gba lamen je, shi i na er mba ve civir eev mbu inyam la ga yô, i̱ wua ve kera.

¹⁶ Shi i lu eren er i̱ na ior cii ikav sha uwegh vegh ku yanegh shin icul ve, mbakiriki man mbavesen kpaa, mbanyarev man mbaatsanev kpaa, ônov man ikpan kpaa,

¹⁷ sha u ma or nana̱ de fetyô u yamen kwagh ga shin u teen kwagh kpaa ga, saa di or u nan lu a ikav la, ka iti i inyam la je la, shin iyenge i iti i i.

¹⁸ Heen yô, kwaghfan ngu. Or u nan lu a mfe yô, nana̱ ôr iyenge i inyam la, gadia ka iyenge i or je. Iyenge i i yô, ka deri ataratar man akunduatar kar ataratar.