Mpase U Yohane 1 - ICIGHAN BIBILO

¹ Mpase u Yesu Kristu u Aôndo na Un sha u A̱ tese mbatomov Nav akaa a aa er fefa keng la, man A pase a sha mtindi u A tindi ortyom Na hen Yohane wanakiriki Na la;

² ka un a er shiada sha mkaanem ma Aôndo, man sha kwagh u shiada u Yesu Kristu la sha akaa a a nenge cii ye.

³ Saan or u ôron akaaôron a profeti ne iyol kua mba ve ongo ve we iko sha akaa a i nger keregh la kpaa, gadia shighe mgbôghom.

⁴ Yohane ngu sughun iniongo i Kristu i itiankarihiar i ken Ashia la. Mrumun u sha mhôôn a̱ lu sha a ven kua bem mba ve dugh hen Un u A lu hegen, ngise kpaa lu, shi A lu van kpaa la, man shi hen Ujijingi mba utaankaruhar mba ve lu sha ishigh ki ikônough Nagh ki torough la,

⁵ man shi hen Yesu Kristu, Orshiada u jighjigh, ka Waniunda u ken mbakpenev man ka Tor u tamen sha utor mba sha won kpaa. Un u se doo Un ishima man A sagh se A due a vese ken asorabo ase kera sha awambe a Na

⁶ man A gema se er se̱ hingir tartor, se̱ hingir upristi sha ci u Aôndo Na man Ter Na her kpaa. Un yô, iengem i̱ lu i Na kua tahav kpaa gbem sha won. Amen.

⁷ Nenge, ngu van sha abeen man hanma ashe aa nenge a Na, kua ve mba ve kuma Un la kpaa. Akuraior a sha won cii aa vaa sha ci Na. Kape i lu je la. Amen.

⁸ Mo M ngu Alefa man Omega, kape Ter Aôndo A kaa la, Un u A lu hegen, ngise kpaa lu, shi A lu van kpaa la, Uhembanagee.

⁹ Mo Yohane, anmgbian wen u m lu a kwar a ven imôngo sha atsan a yan man sha tartor man sha ishima i taver ken Yesu, m lu ken icile i i yer er Patemo la, sha ci u mkaanem ma Aôndo man sha ci u shiada u Yesu.

¹⁰ M lu ken Jijingi sha iyange i Ter, tsô m ungwa zegeimo ken ijime yam er ka ikpamkor nahan,

¹¹ i lu kaan er: Kwagh u u nenge a mi yô, nger ken takerada, tindi a mi hen iniongo i Kristu i itiankarihiar, hen Efese man Semurna man Peregamu man Tiatire man Sardisu man Filadelfia man Laodishia.

¹² Tsô m gema sha u me nenge imo i i lu ôron kwagh a mo la. M gem yô, m nenge udaarmbaamengerev mba zenaria utaankaruhar,

¹³ man ker atô u udaarmbaamengerev mbala yô, m nenge a Or er ka Wan u or nahan, haa riga gba shin angahar gema kange kwange u zenaria sha vanger.

¹⁴ Ityough Nagh man ice Na kungu segh segh er aiveiyôngo nahan, kungu er senou nahan; ashe a Na lu er nomborusu nahan,

¹⁵ angahar a Na lu er dela u engem u i ser un ken usuiwaagh nahan. Imo Na lu er imo i mngerem ma vesen nahan,

¹⁶ lu a asan ataankarahar ken uwegh Nagh ku yanegh, sanker u esen akur ahar tsor tsor lu duen ken zwa Na, ishigh Nagh yô, lu er iyange ka ia ta taveraa nahan.

¹⁷ M nengen a Na yô, m gba hen angahar a Na er orkpen nahan, kpa A penda uwegh Nagh ku yanegh sha mo, A kaa er: De cie ga. Mo M ngu u hiihii man u masetyô kpaa,

¹⁸ shi M ngu uma; lu M kpe, kpa nenge, shi M ngu uma gbem sha won, man M ngu a ishindan i kuugh man i Hade kpaa.

¹⁹ Nahan nger akaa a u nenge a mi yô, a a lu hegen man a aa va er ken hemen la kpaa.

²⁰ Kwaghmyer u asan a ataankarahar a u nenge a mi ken uwegh Agh ku yanegh man udaarmbaamengerev mba utaankaruhar mba zenaria la yô, ka nahan asan a ataankarahar la, ka mbaityomov mba iniongo i Kristu: itiankarihiar la man udaarmbaamengerev mba utaankaruhar la ka iniongo i Kristu i itiankarihiar je la.