Mika 7 - ICIGHAN BIBILO

¹ Kpe ahii! Gadia m hingir er shighe u i vande kohol atam a ikon a fam kera, er twar u yaren sha atam a ikon i wain nahan; sumegh ku atam a wain ku yan, kera ku ga, shin ityamegh ki tur ki tsutswa ki ki sarem yum la kpaa ki ga.

² Ormimi saa ishe hen tar kera, man orperapera kera ngu ken ior ga; ve cii mba yeren, keghen u haan awambe inya; hanma or nan ngu nôngon u kôron anngô u nan ken kper.

³ Ave ve wa iyol u eren kwagh u ifer a ishima i môm; ortaregh ka a sôn, man orjirigh kpaa ka a wa iyol sha u zuan a inyaregh ki ken myer; zegeor ka a due a isharen i dang i ken ishima na la; kape ve cingi kwagh ayol a ve la.

⁴ U hemban doon ken a ve la ngu er ka saa yô; u hemban perapera hen a ve la, hemba vihin a igyar i sha usaa; iyange i mbakuran ou, i mtsaha wou la, i va ve; hegen yô, kwagh á tser ve.

⁵ De gbe nan or u nan we ndor a we jighjigh ga, man shi de kera suur nen sha ijende ga; kura gbemzwa wou hen wen u a yav sha ikum you la.

⁶ Gadia wannomso gema laha ter na, wankwase kpaa mough, hendan a ngô na, man kwase kpaa a ngô u nom na; mbaihomov mba or ka mba hen ya u nan je.

⁷ Kpa mo yô, me ver ashe hen TER, me kegh Aôndo u myom wam; Aôndo wam kpaa Una ungwam.

⁸ De kera ember sha a mo ga, we orihom wam, mea gba kpaa, shi me mough; mea tema ken ime kpaa, TER Una lum iwanger.

⁹ Me tôô iyugh i TER, gadia m er Un kwaghbo— zan zan Una ôr ishô yam man Una kure ijir yam; Una va a mo ken iwanger, me nenge perapera Na.

¹⁰ Tsô orihom wam una nenge, kunya ua kôr un; un u a kaa a mo er: TER, Aôndo wou, ngu hana? la. Ashe am aa kenger un; hegen á ndyar un er angbiôr a sha igbenda yô.

¹¹ Iyange i maan ukpekpe ou ngi van; sha iyange la á kpela a ikighirtar ken hemen ca.

¹² Sha iyange la vea va her a we, vea due ken Ashiria man ken agar a Igipiti, hii hen Igipiti zan zan za ar hen ifi u Uferati, man hii hen zegemnger zan zan za ar hen zegemnger, man hii sha uwo zan zan za ar sha uwo.

¹³ Nahan kpaa tar ua hingir ice sha ci u mba ve tem ker la, sha ci u mlu u aeren a ve la.

¹⁴ Kura ior Ou sha gbough Ough, ikumuile i dyako Wou, mba ve tem tseke ve, ken ikô ker atô u Karmel; de, ve̱ yaan toho ken Bashan man Gileadi er sha ayange a tsuaa la nahan.

¹⁵ Er sha ayange a ne due ken tar u Igipiti la nahan, kape Me tese ve akaa a kpilighyol la.

¹⁶ Akuraior aa nenge aa va ahenge sha agee a ve cii; vea wa ave ijô, ato a ve aa kondo.

¹⁷ Vea ndiar vuulevu er iyô yô; vea due ken ajiir a ve a taver la a akarkase iyol, er akaa a kpelan inya nahan; vea va a mciem iyol hen TER, Aôndo wase, vea cia U kpaa.

¹⁸ Ka an nan lu Aôndo er We nahan, u U deen iferkwagh man U deen atindi a peren a asande a dyako Wou a a shi her laa? Ishima i nyoon We gbem ga, sha ci u erdoo doo U.

¹⁹ Shi Una zungwe se mhôônom; Una ndyar afer a ase shin angahar man Ú haa asorabo ase cii shin aiv a zegemnger.

²⁰ Ú tese Yakob mimi man Aberaham di erdoo, u U vande bumun a uter asev hii sha ayange a tsuaa la je yô.