Mika 6 - ICIGHAN BIBILO

¹ Yô, ungwa kwagh u TER A kaa hegen ne, er: Mough sha, yila ijir sha ishigh ki iwoogh, agungu kpaa a̱ ungwa imo you!

² Ungwa nen ijir i TER A yer yô, ne iwo, man ne amagh a taregh a tsan sha won, gadia TER ngu yilan ior Nav ijir, Una ôr Iserael ijir.

³ Ior Av, ka nyi M er ne? M za ne iyol sha nyi? Kaam nen.

⁴ Gadia ka Mo M dugh a ven ken tar u Igipiti ye, M paa ne ken ya u ikpan; M tindi Mose mer a̱ hemen ne, kua Aron man Miriam kpaa.

⁵ Ne ior Av, umbur nen ase kwagh u Balaki tor u Moabi ngise hen la, man kwagh u Balaam wan u Beor gema kaa a na la; shi kwagh u a er hii hen Shitim zan zan ar hen Gilgal la, sha u ne̱ fa aeren a perapera a TER yô.

⁶ Ka nyi me va a mi sha ishigh ki TERE, me va gure sha ishigh ki Aôndo u Sha? M̱ va sha ishigh Nagh a iniav mbi nanden, agumabua a a kom inyom i mômôô?

⁷ Á doo TER a anomaiyôngo udubuu? Shin uifi mba mkurev udubu puee? M̱ na waniunda wam sha ci u tindi wam u peren, tsombor wam sha ci u isholibo i uma wama?

⁸ Yô, A tese u, kwagh u dedoo, we or; tsô ka nyi TER A keren her a we, saa u eren kwagh u mimi man u soon u zungwen mhôônom, man u hiden a iyol ijime er u zenden vea Aôndo wou la gaa?

⁹ Imo i TER ngi yilan gar, u cian iti You ka mfe u mimi; wa nen gbidiv iko kua Un u A ver mbu la.

¹⁰ Inyaregh ki iferegh shi ki ken iyou i mbaaferev kua ikaren u yinan u a lu a ifan iyol la kpaa gaa?

¹¹ Aluer Mea rumun uikaren mba aiev, man iba u a iv a uikaren mba icughugh kpaa yô, shi Me lu wang je kpa?

¹² Gadia mbanyarev mba ve lu keregh la ve mgbough a ipila, man mba ve tem ker kpaa ve er mbaaie, nombor u ken zwa ve iv a icugh.

¹³ Nahan yô, Mo kpaa M tsaha u sha uange; M gema u u hingir ice sha ci u asorabo a ou.

¹⁴ Ú ya, kpa á kuma u ga, ijen ia lu u ken atô; ú kura kwagh, kpa ú war a mi ga; man kwagh u ú yem a mi la kpaa, Me gema Me na sanker.

¹⁵ Ú lôô, kpa ú sunda ga; ú shoghol atam a olev, kpa ú ishi mkurem nam ga; ú shoghol atam a wain, kpa ú ma zar na ga.

¹⁶ Gadia mba eren sha atindi a Omri kua sha aeren a hen ya u Ahaba cii, man ne mba zenden sha mbamhen vev; sha u Me gema u u̱ hingir ice, man mba ve tem ker kpaa ve̱ hingir kwagh u̱ gbiren iwer a min; nea tôô iheen i ior Av kpaa.