Mika 4 - ICIGHAN BIBILO

¹ Kpa sha ayange a masetyô la, á ver uwo u ya u TER sha ityough ki iwoov, á kende a u sha, ua kar agungu; akuraior aa ur yemen her;

² akuraior kpishi aa za aa kaa er: Va nen, sé za nen sha uwo u TER, hen ya u Aôndo u Yakob, sha u Una tese se igbenda Na man sha u sea zenden sha igbenda Na kpaa; gadia ka ken Shion tindi una due ye, kua kwaghôron u TER kpaa, ken Yerusalem.

³ Una ôr ijir hen atô u ior kpishi, Una kure ijir i akuraior a taver a ken ica, aa gema usanker mba a, aa var indyuhar a mi, man awange a ve kpaa aa hingir ahô a sôron ikon a min; ma ikurior ia kera tsuwa sanker a ikur igen ga, man shi aa kera hen ityav kpaa ga.

⁴ Kpa hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga; gadia ka zwa u TER u akum a Sha je, u kaa nahan ye.

⁵ Gadia ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.

⁶ Sha iyange la, kape TER A kaa ne, Me kohol mbakeer man Me kohol mba i zende ve la, man mba m er ve ican kpaa la.

⁷ Mbakeer la, Me de ve vea lu asande a ior her, man mba i yem a ve kera ca la kpaa, vea hingir ikurior i ageegh; man TER Una tema tor sha a ve sha uwo u Shion, hii hegen je zan zan gbem sha won.

⁸ Uwe, gôgôyou u taven u ikumuile, igungu u wankwase u Shion, ka her a we ua va ye, een, tartor u tsuaa la ua va, ka tartor u wankwase u Yerusalem je la.

⁹ Hegen yô, ka sha ci u nyi u vaan taver taver nahana? Tor kera ngu ken a we je gaa? Orwasen we mhen kpe shinii, nahan ican tser u je er kwase u toghor mar yôô?

¹⁰ Lu ken ican, toghor, we wankwase u Shion, er kwase u toghol mar nahan; gadia hegen duen you ken gar kera, ú yem zan zan hen Babilon je, ka ker á yima u, ka ker kpaa TER Una paa u sha ikev i mbaihomov ou ye.

¹¹ Hegen yô, akuraior kpishi kohol num sha a we, mba kaan er: I̱ hôngor a na, ashe ase a̱ kenger Shion.

¹² Kpa ve kera fa mhen u TER ga, man shi ve kav awashima Na kpaa ga; gadia A kohol ve er aile a uyia hen vande u gbiren iyiav nahan.

¹³ Mough sha, shoghol iyiav, we wankwase u Shion; gadia Me gema korough ough kua hingir iyôgh man apande a ou kpaa aa hingir togula; wea hembe ior kpishi avur avur, wea tsegha mtsera ve sha ci u TER man inyaregh vegh kpaa kia lu sha ci u TER u sha won cii.