Mika 3 - ICIGHAN BIBILO

¹ Shi m kaa mer: Shi ungwa nen, ne mbahemenev mba Yakob, man mbatarev mba hen ya u Iserael kpaa! Kera ka u ne̱ fa ijirôron i mimi gaa?—

² ne mba ne ker kwagh u dedoo ihom man kwagh u bo a gem a doo ne, ne mba ka ne hua ior kwavyolough kera, kua inyam ve kpaa sha akuhe a ve kera;

³ ne mba ne ye inyam i ior Av, man ne hoo ve kwavyolough kera, man ne hembe ve akuhe, man ne tende ve avur avur er ka inyam shin itye nahan, man er inyam i shin kwese nahan.

⁴ Zum la vea vaa a TER, kpa Una wa ve iko ga; Una yer ve ishigh Nagh hen shighe la, sha ci u aferakaa a ve er la.

⁵ Kape TER A ôr sha kwagh u uprofeti mba ve ne ior Av icumen la, mba zum u ka vea nyuma kwagh sha anyi a ve, ve genger imo er: Bem; kpa u nan we ve kwaghyan ken zwa ga la, ve gema ve suwe ityav a nan.

⁶ Nahan yô, á hingir tugh her a ven, né kera lu a mpase ga, á hingir ime her a ven, né kera tsengafan kwagh ga; iyange ia mire uprofeti, sev kpaa mbua hingir ve ime.

⁷ Mbanengen mbampase vea va ahenge, man mbatsenganôron akaa kpaa, kunya á kôr ve; vea cir mbaakuzwa vev, gadia mrumun kera va sha Aôndo ga.

⁸ Kpa Mo yô, m iv a agee, sha Jijingi u TER kua mimi man tahav kpaa, sha u pasen Yakob atindi a peren a na man Iserael kpaa isholibo na ye.

⁹ Shi ungwa nen kwagh ne, ne mbahemenev mba hen ya u Yakob man mbatarev mba hen ya u Iserael, ne mba ijirôron i mimi i ndôhôr ne ishima, man ne gem ne vihin hanma kwagh u a lu jighilii,

¹⁰ ne mba ne maan Shion sha awambe, man Yerusalem di sha ifer.

¹¹ Mbahemenev nav mba ôron ijir sha inyaregh ki ken myer, upristi nav kpaa mba tesen sha tôndo, man uprofeti nav mba ôron kwaghôron u profeti sha inyar; nahan kpaa mba suur sha TER, mba kaan er: TER ngu ken vese gaa? Ma kwagh u bo una tser se ga.

¹² Nahan yô, á tsôghol Shion sha ci wen er sule nahan; Yerusalem una hingir atihi a alôgh, man uwo u ya u Aôndo ua hingir er agungu shin ikô nahan.