Mika 1 - ICIGHAN BIBILO

¹ Kwaghôron u TER u a va hen Mika Ormoresheti sha ayange a Yotam man Ahashi man Hesekia, utor mba Yuda, u a nenge sha kwagh u Samaria man Yerusalem yô.

² Ungwa nen, ne ior cii; ver ato, we tar man akaa a a lu ken u cii; Ter AÔNDO A̱ lu shiada u hendan a ven, Ter ken icighantempel Na je.

³ Gadia, nenge, TER ngu duen hen ijiir Na, Una hungwa, Una ndyar sha ajiir a taven sha a tar la.

⁴ Iwo ia sough shin angahar a Na, apev kpaa aa pav ikwe, er ikpayough ka i sough sha usu nahan, man er mngerem ma i ur shin ijiir i tingir nahan.

⁵ Ka sha ci u atindi a peren a Yakob man akaa ne cii a lu nahan ye, man sha ci u asorabo a ya u Iserael kpaa. Ka nyi i lu atindi a peren a Yakobo? Kera ka Samaria gaa? Man ajiir a taven sha a Yuda yee? Kera ka Yerusalem gaa?

⁶ Nahan yô, Me gema Samaria una hingir tihialôgh ken ikôngo, ijiir i kahan sule u ikon i wain; Me menger awen a na a̱ haa shin pev; Me er amagh a na a̱ due sha.

⁷ Ieev nav mbi gban a gba cii, á hembe mbi avur avur, man injar na i sha idya la cii á nande i sha usu, Me gema ieev nav cii, mbia hingir ice; gadia ka sha injar i agbaga a kohol mbi ye, man shi mbia hide hen injar i agbaga kpaa.

⁸ Sha ci u kwagh ne yô, me gber kwelegh me vaa, me zende angahar gbilin man idyelegh; me vaa, me er ikenge er ugbaseela nahan, me er imo er ukonkofi nahan.

⁹ Gadia avav a na ka a been ga, man a ar hen Yuda je, a ar hen hunda u ior av, ka hen Yerusalem je la.

¹⁰ De er kwagh ne ken Gati ga, de vaan ciôn kpaa ga; vingir nen iyol shin vuulevu hen Betele-afera.

¹¹ Kar yem nen, ne mba ne tem ken Shafir, yem nen idyelegh man a kunya; mba ve tem ken Saanan la, ve due ga; mliam ma Bete-esel maa ngohol ijiir yen i tilen her la kera.

¹² Gadia mba ve tem ken Maroti mba keghen abaver a dedoo tsung, gadia kwagh u bo sen sha TER va hen hunda u Yerusalem.

¹³ Zer nen anyinya a yevese tsung la ikyekye i utya, ne mba ne tem ken Lakishi; ka un a lu ityôkwagh i mhii u isholibo i wankwase u Shion ye; gadia ka ken a we i zough a atindi a peren a Iserael ye.

¹⁴ Nahan yô, ú na Morasheti-gati iwua i paven a na; uya mba Akishibi vea hingir utor mba Iserael icughkwagh.

¹⁵ Van Yam we a or u nana ngohol we, we u u tem ken Maresha; icivir i Iserael ia va hen Adulam je.

¹⁶ Kpur nen ityough, tôndo nen ice sha ci u mbayev ou mba ishima ishima la; kpur ityough i̱ gbanger er apu nahan, gadia ve due hen a we, á yem a ve uikangen.