Mbaromanu 8 - ICIGHAN BIBILO

¹ Nahan hegen yô, ma ijirôron i nan mba ve lu ken Kristu Yesu la ibo kera ngi ga.

² Gadia tindi u Jijingi u uma u a lu ken Kristu Yesu la pase u tuhwa sha ikev i tindi u isholibo man u kuugh la.

³ Gadia Aôndo er kwagh u atindi a fatyô u eren ga la, sha ci u lu isheer sha ci u iyol yô; A tindi Wan Na iyol Na ken mlu u iyol i isholibo man lu sha kwagh u isholibo kpaa, A ôr isholibo ijir ken iyol A na i ibo;

⁴ sha u i̱ er sha imo i tindi la ken vese vough, se mba se zenden i lu sha iyol ga kpa i lu sha Jijingi ne.

⁵ Gadia mba ve lu ken iyol yô, mba veren ishima sha akaa a iyolough; kpa mba ve lu ken jijingi yô, gema ka akaa a jijingi ve veren ishima sha mi ye.

⁶ Ishimaveren i iyolough yô, ka ku, kpa ishimaveren i jijingi ka uma man bem.

⁷ Gadia ishimaveren i iyolough la ngi ihom a Aôndo. I we iko sha tindi u Aôndo ga, ia fatyô kpaa ga.

⁸ Mba ve lu ken iyol la, kwagh ve una fatyô u doon Aôndo kpaa ga.

⁹ Kpa ne yô, ne mba ken iyol ga, ka ken jijingi ne lu ye aluer Jijingi u Aôndo tema ken a ven yô. Kpa aluer or nana lu a Jijingi u Kristu ga yô, nan ngu u Na ga.

¹⁰ Kpa aluer Kristu Una lu ken ven yô, iyol ia lu kpenegh sha isholibo kpa jijingi yô una lu uma sha perapera.

¹¹ Kpa aluer Jijingi u Wen u A nder Yesu shin mbakpenev la Una tema ken ven yô, Wen u A nder Yesu shin ku la Una na ayol a en a á va kpen la uma sha Jijingi Na u A tem ken ven la.

¹² Nahan yô, anmgbianev se mba mbayananzô kpa ka sha kwagh u iyolough er shi sé lu uma sha inja i iyolough nahan ga.

¹³ Gadia aluer nea lu uma sha inja i iyolough yô né kpe, kpa aluer nea wua aeren a iyolough sha Jijingi yô, né lu uma.

¹⁴ Ve mba Jijingi u Aôndo A hemen ve la cii, ka ônov mba Aôndo je la.

¹⁵ Gadia ne ngohol jijingi u kpan u né shi né cia kwagh ga kpa ne ngohol jijingi u mlu u wan, ka sha mi je se yer ser Aba, Tere ye.

¹⁶ Ka Jijingi iyol Na A lu eren shiada vea jijingi wase imôngo er, se mba ônov mba Aôndo ye.

¹⁷ Aluer se mba ônov yô, se mba mbayandyako kpaa, ka mbayandyako u Aôndo man mbayandyako a Kristu imôngo kpaa, aluer sea ya ican a na imôngo sha u shi á na se iengem a Na imôngo kpaa yô.

¹⁸ M fa, atsan a se ye shighe u ainge ne a kuma sha iengem i á va pase se la ga.

¹⁹ Gadia akaa a i gbe a sha won cii nga veren ashe keghen mpase u á va pase ônov mba Aôndo ken igbar la tsung je.

²⁰ Gadia i gbihi akaa a i gbe a cii ken dang, lu sha ishima i a nahan ga, kpa lu sha ishima i Un u A gbihi a ker la. Kpa lu sha ishimaverenkeghen,

²¹ gadia akaa a i gbe a la kpaa á va pase a sha ikev i mlu u hôôn la á tuhwa, á za a mi ken mlu u engem u lun a ikangenev ga u ônov mba Aôndo la.

²² Gadia se fa akaa a i gbe a sha won cii la nga kinen imôngo nga toghor zan zan hegen.

²³ Man ka a tseegh ga, se mba se lu a iyiagh ki tsutswagh ki Jijingi ne kpaa se mba kinen ken avanger a ase se mba keghen mrumun u á va rumun se sé lu ônov la, ka mpaa u ayol a ase je la.

²⁴ Ka sha ishimaveren ne i yima se ye. Kpa ishimaverenkeghen i i nenge a mi yô kera ka ishimaverenkeghen la ga. Gadia kwagh u or nan nenge a mi kera yô, á er nan man shi nana lu a ishimaverenkeghen sha mini?

²⁵ Kpa aluer se mba a ishimaverenkeghen sha kwagh u se nenge a mi ga la yô, ka sha ishima i wan je se kegh un ye.

²⁶ Kape Jijingi kpaa A wese se ken aseer a ase je ne, gadia se fa u eren msen er i doo u ma se er la ga, kpa Jijingi iyol Na ngu eren msen sha ci wase sha mbamkin gande u pasen.

²⁷ Kpa Un u A tim asema la A fa er ishimaveren i Jijingi i lu yô, gadia ka sha ishima i Aôndo A lu eren msen sha ci u uicighanmbaiorov ye.

²⁸ Shi se fa mba Aôndo A doo ve ishima yô, akaa cii nga eren sha u i̱ lu ve a inja yô, ka ve mba i yer ve sha awashima Na la.

²⁹ Gadia mba A vande fan ve la, A vande veren ve er ve̱ lu inja i môm a mlu u Wan Na sha u Una lu Waniunda ken anmgbianev kpishi yô;

³⁰ mba A vande veren ve yô, A yila ve kpaa; mba A yila ve yô, A na ve ishô kpaa; mba A na ve ishô yô, A na ve iengem kpaa.

³¹ Nahan sé kaa nana sha akaa ne? Aluer Aôndo ta ikaa ken vese yô, ka an je shi nana hendan kwagh a vese?

³² Un u Wan Na iyol Na je kpaa A tange ga kpa A gema Un A na sha ci wase cii yô, Una kera na se akaa cii a Na imôngo wuee ga yee?

³³ Ka an je nana yôô ityôkwagh sha mba Aôndo A tsough ve laa? Ka Aôndo A ne ishô ye.

³⁴ Ka an nana ôr ijir nana na ibo? Ka Kristu Yesu A kpe ye, kpa shi i nder Un je, ngu ken uwegh ku yanegh ku Aôndo, ngu sônon sha ci wase kpaa.

³⁵ Ka an nana pav se a dooshima u Kristu? Ican shin ishima i nyian shin mtev u sha ican shin ijen shin idyelegh shin kwaghbo u cier iyol shin sankere?

³⁶ Kape i nger kpaa la er: Ka sha ci Wou i shi wuan se didi ye, mba nengen se er ka iyôngo i sôngon nahan.

³⁷ Kpa ken akaa ne cii se hemba tser tser sha ci u Un u se doo Un ishima la.

³⁸ Gadia m fa dedoo mer, ku shin uma, shin mbatyomov mba Shaav, shin tahav, shin akaa a hegen ne, shin akaa a lu van ken hemen, shin mbaageev,

³⁹ shin mtav, shin mze, shin ma kwagh ugen u i gbe un a gba kpaa, una fatyô u paven se a dooshima u Aôndo u a lu ken Kristu Yesu Ter wase la je ga.