Mbaromanu 7 - ICIGHAN BIBILO

¹ Shin ne fa kwagh ne ga ase anmgbianev, m ngu ôron kwagh a ven, ne mba ne lu mbafanatindi ne mer, tindi ngu a tahav sha or sha shighe u nan lu uma la tseegh.

² Gadia kwase u nan er nom yô, i kange nan sha tindi vea nom zum u a lu uma la, kpa aluer nom la una kpe yô, i sagh nan ken tindi u nom la kera.

³ Nahan aluer nom u nan ngu uma her kpa nana gba eren nom ugen yô, á yila nan er idyakwase. Kpa aluer nom u nan una kpe yô, i sagh nan ken tindi la kera ve. Aluer nana er nom ugen kpaa, nana kera lu idyakwase ga.

⁴ Anmgbianev av, kape ne kpaa, ne kpe sha kwagh u atindigh sha iyol i Kristu, sha u né hingir kwagh u orgen, ka Un u i nder Un shin ku sha u se se̱ ume atam sha ci u Aôndo la.

⁵ Zum u se lu uma ken iyol la yô, asaren a bo a atindi lu kpoghol a la, a lu eren tom ken alegh a ase sha u umen atam sha ci u kuugh.

⁶ Kpa hegen er i sagh se ken atindi kera, se kpe sha kwagh u a lu kangen se la yô, ka sha u se̱ eren tom sha ikev i mlu u he u jijingi la i̱ de lu sha mlu u tse u kwaghngeren la ga.

⁷ Nahan sé kaa nana? Atindi gema ka isholiboo? Mayange ga. Luun sha atindi ga yô, ma m fe isholibo ga, gadia aluer tindi una kaa er, de tem ga, ga yô, ma m fe mtôm ga.

⁸ Kpa isholibo gema zua a ian sha tindi, i nder mbamtôm ken mo kposo kposo. Gadia atindi aa lu ga yô, isholibo ma i lu kpenegh.

⁹ Tsuaa la m lu uma kpa m lu sha ikev i atindi ga. Kpa zum u tindi za va yô, isholibo i nder,

¹⁰ man mo yô, m gema m kpe. Tindi u a lu u zan ken uma la gema ka un je a hingir u zan a mo ken ku ye.

¹¹ Gadia er isholibo i zough a ian sha tindi yô, i tsume a mo i wuam sha mi kpaa.

¹² Nahan yô, atindi ka icighankwagh, tindi kpaa ka icighankwagh shi kwagh u jighjigh man u doon kpaa.

¹³ Nahan yô, kwagh u doon la gema hingir ku wam shinii? Mayange ga. Kpa lu isholibo je i gema kwagh u dedoo la hingir ku wam ye, lu sha u i̱ pase isholibo ken igbar er ka isholibo je man sha u tindi a̱ gema isholibo i̱ hingir kwagh u bo yum yô.

¹⁴ Gadia se fa atindi ka kwagh u ken jijingi, kpa mo yô, ka ken iyol m lu ye, i teem, isholibo i yamem.

¹⁵ Kwagh u m eren kpaa m fa un ga, gadia kwagh u a sarem yô, m eren un ga, ka kwagh u a sarem ga la je m eren ye.

¹⁶ Aluer ka kwagh u a sarem ga la je m eren yô, m ngu rumun er tindi a lu kwagh u doon yô.

¹⁷ Nahan yô, kera ka mo m lu eren un ga, kpa gema ka isholibo i i tem ken mo la.

¹⁸ Gadia m fa ma kwagh u doon tem ken mo ga, inja na yô, ka ken iyol yam je la, gadia kwagh yô, saren mo kpa u eren a er kwagh u doon yô, ka ga.

¹⁹ Gadia ka kwagh u doon u a saren mo la, m eren ga, kpa ka kwagh u bo u a sarem ga la je m gem m eren ye.

²⁰ Kpa aluer a lu kwagh u a sarem ga la je m eren yô, kera ka mo m lu eren un ga, kpa ka isholibo i i tem ya ken mo la.

²¹ Nahan m mase zuan a tindi ne ken a mo: Ka a saren mo u eren kwagh u dedoo yô, kwaghbo kpaa a lu a mo her.

²² Or u ken a mo u ker atô la ngu rumun atindi a Aôndo saan saan je.

²³ Kpa m ngu nengen a tindi ugen ken alegh a am kpaa, ngu nôngon num a tindi u ken mhen wam, ngu kôron mo yemen a mo uikangen sha ikev i tindi u isholibo u a lu ken alegh a am la.

²⁴ Kpe ahii, mo or u gban kera ne! Ka an nana shi yimam sha ikev i iyol i kuugh nee?

²⁵ I̱ wuese Aôndo sha Yesu Kristu Ter wase! Nahan mo iyol yam sha ishima yam yô, m ngu eren atindi a Aôndo tom, kpa sha iyol yam yô, m ngu eren tindi u isholibo tom.