Mbaromanu 5 - ICIGHAN BIBILO

¹ Nahan yô, er i ne se ishô sha jighjigh u nan yô, se mba bem bem a Aôndo sha Ter wase Yesu Kristu.

² Ka sha a Na kpaa man se zough a ian i nyôron [sha jighjigh u nan] ken mrumun u sha mhôôn u se til sha mi ne ye, shi se mba wuese ser, se mba a ishimaverenkeghen iengem i Aôndo la.

³ Man ka nahan tseegh ga, shi se mba wuese ken atsan ase a yan kpaa, gadia se fa ican i yan i ne ishimataver,

⁴ ishimataver di gem ne mkom, mkom gem ne ishimaverenkeghen.

⁵ Man ishimaverenkeghen yô, i ve ahenge ga, gadia i haa dooshima u Aôndo ken asema ase sha Icighan Jijingi u i ne se la.

⁶ Gadia er se lu aseeraior her la je Kristu kpe er shighe va kuma vough yô, sha ci u mba ve fe Aôndo ga la.

⁷ Gadia orperapera je kpaa ka ican u orgen nana kpe sha ci u nan yô, nahan kpaa or u mimi yô, alaghga orgen nana cihi á rumun u kpen sha ci u nan.

⁸ Kpa Aôndo tese se dooshima Na sha ku u Kristu A kpe sha ci wase er se lu mbaasorabo her la.

⁹ Nahan hegen yô, er i ne se ishô sha awambe Na yô, Una hemba yiman se sha iyugh cii.

¹⁰ Aluer i hime se a Aôndo sha ku u Wan Na zum u se lu mbaihomov la yô, nahan hegen er i him se kera yô, á va hemba yiman se sha uma Na cii.

¹¹ Ka nahan tseegh kpaa ga, shi se mba wuese ser, se mba a Aôndo, sha Ter wase Yesu Kristu u se zough a mhim sha a Na hegen yô.

¹² Nahan yô, er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.

¹³ Er atindi lu a lu ga je kpaa isholibo lu shin tar, kpa ape atindi a lu ga yô, mba we isholibo ker ga.

¹⁴ Nahan kpaa ku tema tor hii sha Adam zan zan ar sha Mose, kua sha mba ve er isholibo sha inja i mper i Adam per tindi la ga kpaa; un yô, gema lu ikav i tesen sha Un u Una va la.

¹⁵ Kpa iwua i sha mrumun u sha mhôôn la ngi inja i môm a mper u i per tindi la ga, gadia aluer sha tindi u peren u or môm la ior kpishi gema kpe yô, nahan mrumun u sha mhôôn u Aôndo man iwua i sha mrumun u sha mhôôn u Or môm, ka Yesu Kristu je la, ve hemba heera ica je, dumbur sha ior kpishi.

¹⁶ Iwua la ngi er kwagh u a dugh sha isholibo i or môm la nahan ga. Gadia ijirôron i i dondo sha isholibo i môm la hingir ijir i nan ibo, kpa iwua i sha mrumun u sha mhôôn i i dondo sha mbamper mba ngeen mbala gema hingir ishô i nan.

¹⁷ Aluer ka sha tindi u peren u or môm la man ku u tem tor, i lu sha or môm la yô, ve mba ve ngohol mrumun u sha mhôôn u ngeen yum la man iwua i ishô i nan i ngeen yum la yô, vea hemba lun uma shi vea hemba yan tor sha Or môm, ka Yesu Kristu je la.

¹⁸ Nahan er i lu sha tindi u peren u or môm man i za a ior cii ken ijir i nan ibo yô, kape ieren i perapera i Or môm di kpaa i ze a ior cii ken ishô i nan man uma ne.

¹⁹ Gadia er ior kpishi ve hingir mbaasorabo sha ihembeato i or môm yô, kape ior kpishi di ve hingir mbaperapera sha iko i wan i Or môm kpaa la.

²⁰ Atindi yô, gema nyôr sha mi sha u tindi u peren a̱ ngee. Kpa her ape isholibo i ngee yô, mrumun u sha mhôôn hemba ngeen cii.

²¹ Ka sha u, er isholibo i tema tor sha ku yô, kape mrumun u sha mhôôn di kpaa a̱ tema tor sha perapera u zan ken uma u tsôron sha Yesu Kristu Ter wase la.