Mbaromanu 15 - ICIGHAN BIBILO

¹ Se mba se lu a agee ne yô, ka u se̱ waan ishima a mbamyina mba mba ve taver ga la, se̱ keren kwagh u doon se ayol a ase la tsô ga.

² Hanmô wase nana̱ nôngo u eren kwagh u doon or u nan we ndor a nan la i̱ lu sha gbenda u doon, man shi u maan nan a maa kpaa.

³ Gadia Kristu kpaa ker kwagh u doon sha ci Na ga, kpa lu er i vande ngeren nahan la er: Aheen a ior ve lu heen We la gema haa sha a Mo.

⁴ Gadia akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la.

⁵ Aôndo u ishimawan man ishimasurun A̱ na ne, lu nen ishima i môm ayol a en sha inja i Kristu Yesu la,

⁶ sha u né civir Aôndo Ter u Ter wase Yesu Kristu sha ishima i môm man sha imo i môm kpaa.

⁷ Nahan yô, rumun nen ayol a en er Kristu kpaa A rumun ne sha ci u iengem i Aôndo nahan.

⁸ Inja na yô, er, Kristu hingir ortom u icôngo u tesen mimi u Aôndo sha u taver uityendezwa mba i tôndo a uter la,

⁹ sha u atôatyev a̱ civir Aôndo sha ci u mhôônom nam. Kape i nger kpaa la er: Ka nahan man me wuese we ken atôatyev, Me wa icam i civir iti You kpaa ye.

¹⁰ Shi i kaa er: Ember nen ne atôatyev a nongoior Na imôngo.

¹¹ Man shi: Wuese nen Ter, ne atôatyev cii, ior ci ca cii, ve̱ wuese Un.

¹² Man shi Yesaia kpaa kaa er, Mise u Yese Una va, ka Un u Una mough Una ya tor sha atôatyev la, ka sha a Na man atôatyev aa veren ishima aa keghen ye.

¹³ Aôndo u ishimaverenkeghen A̱ iv ne a iember gbing kua bem kpaa sha jighjigh u ne ne la, sha u né ngee a ishimaverenkeghen sha agee a Icighan Jijingi yô.

¹⁴ Anmgbianev av, sha kwagh wen yô, m fa dedoo mer ne mgbough a mdoom shi ne iv a mfe gbing gbing kpaa, ne kuma u wan ayol a en kwagh kpaa.

¹⁵ Kpa sha akaa agen yô, m wa cihin m nger ne kwagh sha u umbur ne, lu sha mrumun u sha mhôôn u Aôndo A nem la er

¹⁶ m̱ lu ortom u Yesu Kristu hen atôatyev ken icighantom u Loho u Dedoo u Aôndo, sha u nagh ku atôatyev ku̱ doo, ku̱ lu kwagh u i tsegh sha Icighan Jijingi yô.

¹⁷ M ngu a ityôikaa i tan ihagh ken Kristu Yesu sha akaa a Aôndo.

¹⁸ Gadia me cihi me ôr ma kwagh ugen ga saa kwagh u Kristu A er sha ikev yam sha u atôatyev a̱ ungwan kwagh yô, lu sha kwaghôron man sha ieren

¹⁹ man sha agee a uivande man akaa a kpilighyol man sha agee a Icighan Jijingi kpaa. Nahan hii ken Yerusalem ningir zan zan ar ken Ilirikum m ôr Loho u Dedoo u Kristu m tser.

²⁰ M ver ishima mer me kera ôr Loho u Dedoo ape i vande teren Kristu la ga, sha u m̱ de maan sha imagh ki orgen ga yô.

²¹ Kape i vande ngeren kpaa la er: Ve mba i pase ve kwagh Na ga la, vea nenge a Na je, mba ve ungwa kwagh ga la kpaa, vea kav.

²² Ka nahan man acin imôngo je i bundum u van hen ven ye.

²³ Kpa hegen yô, er ian i tom i kera shim ken avegher angan ga shi er anyom imôngo je m lu veren ishima u van ken ven,

²⁴ zum u mea karen me zaan ken tar u Ishpania la yô, m ver ishima mer me zua ishigh a ven, me tema imôngo anyangem kpeghee, imôngo ia hômon yô, né wam ikav mbi zan keela.

²⁵ Kpa hegen yô, m ngu zan sha Yerusalem sha kwagh u iwasen i sha ci u uicighanmbaiorov la,

²⁶ gadia doo Masedonia man Akaya u nan iwasen sha ci u mbaatsanev mba ken uicighanmbaiorov mba ken Yerusalem la.

²⁷ Doo ve man ka u ve̱ er a ve nahan kpee je, gadia aluer atôatyev zua a kwar a ve imôngo sha akaa a jijingi yô, ka u a kpaa a̱ wase ve sha akaa a iyolough kpee.

²⁸ Nahan zum u me kure kwagh ne me za na ve kwagh u i kohol la yô, me kar ken ven man me za ken Ishpania ye.

²⁹ M fa, zum u me va hen ven yô, me va a iveren i Kristu ia iv gbing.

³⁰ Anmgbianev, m ngu zamber a ven sha Ter wase Yesu Kristu man sha dooshima u Jijingi mer, nôngon nen tsung a mo imôngo ken mbamsen mba ne lu sônon Aôndo sha ci wam yô,

³¹ sha u i̱ yimam sha ikev i mbanan jighjigh ga mba ken Yudia man sha u iwasen yam i sha ci u Yerusalem la i̱ doo uicighanmbaiorov,

³² sha u m̱ va hen ven sha ishima i Aôndo a iember, i̱ yôhôl mo iyol a ven imôngo yô.

³³ Aôndo u bem A̱ lu a ven cii. Amen.