Mbaromanu 14 - ICIGHAN BIBILO

¹ Or u nan taver sha jighjigh u nan ga la kpaa, rumun nen nan, kpa i̱ de lu sha u hendan kwagh sha anyimanakaa ga.

² Orgen ka nan na jighjigh er nan ngu a ian i yan akaa cii, kpa u nan taver ga la yô, ka ikaiue nan ye ye.

³ Or u nan ye la nana̱ de lahan or u nan ye ga la ze, man shi or u nan ye ga la nana̱ de ne or u nan ye la ibo ga, gadia Aôndo rumun nan.

⁴ We, u ngu nyi man u ne wanye u orgen ibo? Shin una tile, shin una gba kpaa ka kwagh u Ter na je.

⁵ Orgen ka nan nenge er iyange igen i hemba igen yô. Orgen di yô nan nenge er ayange cii nga kwagh môm yô. Hanma or yô, i̱ wanger nan ken ishima i nan doo doo je.

⁶ Or u nan ver ishima sha iyange kpaa ka sha ci u Ter nan veren ishima ye, or u nan ye kpaa ka sha ci u Ter nan lu yan ye, gadia nan sughun Aôndo. Or u nan ye ga la kpaa, ka ken Ter nan ye ga ye, nan sughun Aôndo kpaa.

⁷ Ma or môm ken vese nan gbe lun uma sha ci u nan iyol i nan ga, man shi ma or gbe kpen sha ci u iyol i nan kpaa ga.

⁸ Gadia shin sea lu uma, kpa ka sha ci u Ter se lu uma ye, shin sea kpe kpaa, ka sha ci u Ter se kpe ye, nahan yô, shin sea lu uma shin sea kpe kpaa se mba kwagh u Ter.

⁹ Ka sha ci u nahan man Kristu kpaa A kpe shi A lu uma ye, ka sha u Una lu Ter u mbakpenev man mbaumav kpaa.

¹⁰ Kpa we yô, ka nyi u ne anmgbian ibo? Shin ka nyi u laha anmgbian wouwe? Gadia se cii sé va tile sha ikônough ki ijirigh ki Aôndo.

¹¹ Gadia i nger er: Ter ngu kaan er: Er Mo M lu u uma ne, ka sha ishigh Yagh hanma inyu ia gure ye, hanma nombor kpaa ua wuese Aôndo.

¹² Kape hanmô wase nana va ôr [Aôndo] kwagh u nan iyol i nan je la.

¹³ Nahan yô, se kera gbaa nan ayol ase ibo tsô ga, kpa guda yô, se wa nen ken ishima ser, sé kera na anmgbian anzughul ga shin ityôikaa i nôngon gbev kpaa ga.

¹⁴ Wanger mo, m fa dedoo ken Ter Yesu mer, ma kwagh gbe lun wang ga iyol na tsô ga, saa or u nan nenge er kwagh a lu wang ga la a lu nan kwagh u wang ga ye.

¹⁵ Aluer ka sha kwaghyan wou man ishima ia vihi anmgbian wou yô, kera ka sha dooshima u lu zenden ga. Kwaghyan u u ye la, a̱ de hingir kwagh u vihin uma u un u Kristu A kpe sha ci na la kera ga.

¹⁶ I̱ de lamen dang sha kwagh wen u a lu u dedoo la ga.

¹⁷ Gadia tartor u Aôndo yô, ka sha kwaghyan man kwaghman u lu ga, kpa ka sha perapera man bem man iember ken Icighan Jijingi u lu ye.

¹⁸ Or u nan eren Kristu tom sha gbenda ne yô, á doo Aôndo a nan, ior kpaa vea rumun nan.

¹⁹ Nahan yô, se keren nen kwagh u nan bem man shi kwagh u se maan a maa ayol a ase sha mi.

²⁰ De vihin tom u Aôndo kera sha ci u kwaghyan ga. Akaa cii nga wang, kpa or u nan ye kwaghyan man nan ne orgen anzughul yô, hingir kwaghbo hen nan ve.

²¹ Doo u yan inyam ga, shin u man msôrom kpaa ga, shin u eren nyityô kwagh i nan anmgbian wou anzughul la kpaa ga.

²² Jighjigh u nan u u lu a mi la yô, a̱ lu kwagh wou iyol you vea Aôndo. Or u nan gbe nan iyol i nan ibo ga sha kwagh u nan nenge er ka kwagh u dedoo yô, saan nan iyol.

²³ Kpa or u nan te akpelan ken ishima sha kwagh u nan ye la yô, i na nan ibo kera je ve gadia nan ngu eren sha jighjigh u nan ga. Hanma kwagh u a dugh ken jighjigh u nan ga yô, ka isholibo je.