Mbaromanu 11 - ICIGHAN BIBILO

¹ Nahan m ngu pinen mer, Aôndo gbihi nongoior Na kera shinii? Mayange ga. Mo iyol yam kpaa m ngu or u Iserael ken tsombor u Aberaham ken kwe u Benyamin.

² Aôndo gbihi nongoior Na mba A vande fan ve la kera ga. Shin ne kera fa kwagh u icighanruamabera kaa sha kwagh u Elia zum u A ôr Aôndo kwagh u Iserael la, ga ase?

³ A kaa er: Tere, ve wua uprofeti Ou kera, atse a Ou a nanden nagh sha mi la kpaa, ve hembe. Ka mo tseegh m mase shin her ye, kpa mba keren mo a ku.

⁴ Kpa Aôndo gema kaa er nana? A kaa er: Ior shi mbam her dubu utaankaruhar mba ve gur anu inya hen Bala ga yô.

⁵ Kape hen shighe u ainge ne kpaa asande a shi her a i tsough a sha mrumun u sha mhôôn la.

⁶ Aluer ka sha mrumun u sha mhôôn yô, kera ka sha aerenakaa ga, a lu nahan yô, mrumun u sha mhôôn ma a kera lu mrumun u sha mhôôn ga.

⁷ Tsô ka nana? Kwagh u Iserael lu keren la ve zua a mi ga. Kpa asande a ve a i tsough a la yô, a zua a mi; mbagenev yô, ve cighir asema.

⁸ Kape i nger kpaa la er: Aôndo na ve jijingi u yaven mem mem man shi ashe a vea nenge kwagh a mi ga man shi ato a vea ungwa kwagh a mi kpaa ga yô, zan zan nyian je.

⁹ Davidi kpaa kaa er: Iwer ve i yan la i̱ hingir hwar man shi kper kpaa, shi i̱ hingir ve ityôikaa i nôngon gbev man iyev i oron kpaa.

¹⁰ Ashe a ve a̱ wa ime sha u ve̱ de nengen ga yô, nurun ve igundu gbem kpaa.

¹¹ Nahan m ngu pinen mer, ve nôngo gbev nahan ve gba ve saa heregh jee? Mayange ga. Mper u ve per tindi la gema na myom va hen atôatyev sha u nan ve iwuhe i gban.

¹² Nahan aluer mper u ve per tindi la va tar a akaa kpishi man mpande u iyenge ve i pande la va atôatyev a akaa kpishi yô, man hire shighe u iyenge ve ia ivi?

¹³ M ngu ôron kwagh a ven, ne atôatyev. Er mo m lu apostoli u atôatyev yô, m ngu nan tom wam icivir,

¹⁴ ka sha u nan ityô yam iwuhe i gban sha kwagh ne, i̱ yima mbagenev ken ve.

¹⁵ Aluer mgbihi u i gbihi ve la hingir u himen tar yô, mrumun u á va rumun ve la una kera lu mnder u shin mbakpenev gaa?

¹⁶ Aluer ijenmwe i iyiagh ki tsutswagh ia lu icighankwagh yô, ijen jimin cii kpaa kape i lu la. Aluer mise ua lu icighankwagh yô, agbaa cii kpaa kape a lu la.

¹⁷ Aluer i asegh agbaa a gen man we u u lu angbaa u kon u olev u ken toho ne i va zor u sha ijiir i a, u zua ken mise u zaregh u kon u olev la yô,

¹⁸ de te ihagh a agbaa la ga. Aluer u ta ihagh yô, ka we u tee mise ga, ka mise u tee u ye.

¹⁹ Tsô u kaa wer, i asegh agbaa kera sha u i̱ zuam sha mi.

²⁰ Kape i lu je la. Ka sha jighjigh ve u nan ga la i asegh ve kera ye. We yô, ka sha jighjigh u nan u til ye. Yô, de gengese iyol ga, cian kwagh.

²¹ Aluer Aôndo de agbaa jim jim la ga yô, we kpaa Una de u ga.

²² Nahan nenge mhôônom ma zungwen man shi ipila i Aôndo. Mba ve gbe yô, ka ipila, kpa we yô, ka mhôônom ma zungwen ma Aôndo aluer wea tile sha mhôônom ma zungwen yô. Gayô, we kpaa á tôndo u kera.

²³ Mbala kpaa aluer vea taver sha mban u jighjigh ga yô ve kpaa á zua ve ker, gadia Aôndo ngu a tahav ú shi zuan ve ker.

²⁴ Gadia aluer we, i tôndo u ken kon u u lu olev u ken toho sha gbaaôndo u u, i va zor u ken itine olev u ken ya, i lu sha gbaaôndo wou ga yô, man hire agbaa a sha gbaaôndo la á kera shi zua a ken itine i a la ga yee?

²⁵ Anmgbianev, sarem ka ma ne lan kwaghmyer ne ga, de nengen nen ayol a en er ne mba mbafankwagh yum ga. I cighir vegher ugen u Iserael ishima zan zan atôatyev aa kar nyôron, iyenge i a ia kar ivin vough ve.

²⁶ Kape Iserael cii vea war la. Kape i nger kpaa la er: Ka ken Shion man Oryiman Una due ye, Una kar a mvende u i lu vendan Aôndo la ken Yakob kera.

²⁷ Kwagh ne una lu ikuryan Yam a ve zum u Me tôô asorabo a ve kera yô.

²⁸ Sha kwagh u Loho u Dedoo yô ve mba mbaihomov, ka sha ci wen je, kpa sha kwagh u mtsough yô, ve mba mbadoonshima sha ci u uter vev mbala.

²⁹ Gadia uiwua mba sha mrumun u sha mhôôn man shi myer u Aôndo la afanyô a vaan nga sha mi je ga.

³⁰ Er ne kpaa ngise ne hemba Aôndo ato kpa ainge i zungu ne mhôônom sha ci u ihembeato ve la yô,

³¹ kape ve kpaa, hegen ve lu hemban ato sha u i̱ zungwe ve mhôônom sha mhôônom ma i zungu ne la.

³² Gadia Aôndo wa ior cii ken ihembeato sha u Una zungwe ve mhôônom cii yô.

³³ Kpash! Mze u ikpelaakaa man mfe man kwaghfan u Aôndo ve za kweng ne! Ajir a ôron a Na gande u timen sha mi, igbenda Na kpaa i gande u tôvon tsôô!

³⁴ Gadia ka an nan fe mhen u Tere? Shin ka an nan lu or u wasen Un kwaghhenene?

³⁵ Shin ka an nan lu vande nan Un kwagh sha u i̱ shi i̱ hide i̱ na nan kwagha?

³⁶ Gadia akaa cii ka her a Na a dugh, man ka sha a Na a lu her, shi ka sha a Na a lu veren ishigh kpaa ye. Un yô, icivir i̱ lu i Na gbem sha won. Amen.