Mbakolose 3 - ICIGHAN BIBILO

¹ Nahan yô, aluer i nder ne a Kristu imôngo yô, ker nen akaa a Sha henpe Kristu A lu A tem ken uwegh ku yanegh ku Aôndo la.

² Ver nen ishima sha akaa a Sha, i̱ de lu akaa a shin tar ga.

³ Gadia ne kpe, uma wen yô i yer un a Kristu imôngo ken Aôndo.

⁴ Zum u Kristu u A lu uma wase la Una va ande yô, ne kpaa á ande a ven a Na imôngo ken iengem.

⁵ Nahan yô, wua nen alegh a en a shin tar la kera, ka idya man hôngor man ityoronshima man isharen i bo man hua u eren, ka akombo a civir je la.

⁶ Ka sha akaa ne man iyugh i Aôndo i lu van ye.

⁷ Ka ken a man ne kpaa ngise ne zenden ye, zum u ne lu uma ken a la.

⁸ Kpa hegen yô, dugh nen akaa ne kera: iyugh man ishima i nyoon man ifer man ityuhwanev man kwaghôron u dang ken zwa wen.

⁹ De eren nen aie hen ayol a en ga gadia ne dugh tseor kua aeren a na la kera,

¹⁰ ne haa orhe iyol u ka i sôr un hegh sha u una lu a kwaghfan u sha inja i ibeen i Un u A gbe un la.

¹¹ Heera yô, or u Grika man or u Yuda kera ngu ga, shin icôngo man ipusu kpaa ga, ortyôtyev shin Sekuti shin kpan man wan kpaa ga, kpa Kristu gema hoghom cii ken ior cii.

¹² Nahan yô, haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan er uicuwan mba Aôndo mba ve lu uicighanmbaiorov mba doon ishima nahan.

¹³ Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la.

¹⁴ Kwagh u a hembe cii yô, haa nen dooshima iyol, ka kwagh u maghen mlu u vough je la.

¹⁵ Man bem u Kristu a̱ lu orhemen ken asema a en gadia ka sha ci u kwagh ne man i yila ne ken iyol i môm ye. Shi lu nen a ishughun.

¹⁶ Kwaghôron u Kristu a̱ tema ken a ven gbing, tesen nen ayol a en kwagh shi waan nen ayol a en kwagh sha kwaghfan cii, shi waan nen upasalmi man atsam man gberen nen amo a ken jijingi, sughun nen Aôndo ken asema a en.

¹⁷ Man hanma kwagh u ne eren cii shin a lu kwagh u ôron a ôr shin kwagh u eren a er, eren nen hanma kwagh ken iti i Ter Yesu man sughun nen Aôndo Ter sha a Na.

¹⁸ Ne kasev, ungwan nen imo i noov enev er i doo ken Ter yô.

¹⁹ Ne noov kpaa, kasev enev ve̱ doo ne asema, de yuwen nen ve ga.

²⁰ Ne ônov kpaa ungwan nen imo i mbamaren enev ken akaa cii, gadia ka kwagh u doon Ter je ne.

²¹ Ne uter, de kumbur nen a ônov enev ga sha er asema a̱ de yen ve ga yô.

²² Ne mbashirentom kpaa, ungwan nen imo i uter enev mba ken iyol ken akaa cii, i̱ de luun tom u sha ashe a ior er mbadoon ityough a ior nahan ga, kpa i̱ lu sha ishima i môm man sha u cian Ter.

²³ Hanma kwagh u ne eren cii yô, eren nen un, i̱ lu sha ishima i môm er ka sha ci u Ter nahan, i̱ de kera lu sha ci u ior ga,

²⁴ gadia ne fa ka hen Ter man né va zua a injar i sha dyako ye. Ka Ter Kristu ne eren Un tom ye.

²⁵ Gadia or u nan eren ifer yô, nana ngohol di injar ifer msange u sha dooshima ngu je ga.