Mbakolose 2 - ICIGHAN BIBILO

¹ Gadia sarem pe ma ne fe mnenge u m lu nôngon tsung sha ci wen kua mba ken Laodishia man mba ve lu a nenge ishigh yagh ki ken iyol ne ga la cii,

² sha u ma i taver ve asema ma i zough ve ken dooshima ma ve fe kwaghmyer u Aôndo, ka Kristu je la.

³ Ka ken a Na man i yer akaa a injaa cii a sha kwaghfan man mkav kpaa ye.

⁴ M ngu ôron nahan sha u ma or nana̱ de kera tsughun ne sha kwaghôron u sha msendegh ga.

⁵ Gadia aluer ken iyol m ngu ga kpaa ken jijingi yô, m ngu a ven, m ngu ember m ngu nengen a mlu wen u tsembelee man mtil u jighjigh wen u nan a til ken Kristu taveraa la.

⁶ Nahan er ne rumun Kristu Yesu ner ka Ter yô, shi zenden nen ken a Na nahan vough,

⁷ er ne we amise ken a Na shi i maa ne ken a Na kpaa, man i taver jighjigh wen u nan er i tese ne nahan vough, shi lu nen a iwuese wuee.

⁸ Ver nen ishima, or nana̱ de ker ne yemen a ven sha kwaghfan shin sha atseregh a gbilinigh ga. Akaa ne ka sha inja i ukaaer mba ior la, shi ka sha inja i ujijingi mba taregh mba hiihii, kera ka sha inja i Kristu a lu ga.

⁹ Gadia ka ken a Na man m-iv u Aôndo cii a tem ken iyol je ye.

¹⁰ Man ne mba a m-iv la ken a Na, Un u A lu ityough sha mbatarev man tahav cii la.

¹¹ Ka ken a Na man i tsôngo ne ye. Ka sha icôngo i sha ave la ga, kpa ka u eren iyol i inyam ne kera ken icôngo i Kristu la,

¹² gadia i ii ne a Na imôngo ken batisema. Ka sha mi kpaa man i nder ne a Na imôngo sha ci u ne ne agee a Aôndo u A nder Un shin ku la jighjigh yô.

¹³ Man ne mba ne lu kpenegh ken aferakaa man ken ipusu i iyolough yen yô, A na ne uma a na imôngo, A de se atindi a se per la cii.

¹⁴ Mnger u anzô ase a atindi a na, u a lu nan se ibo la yô, A ese un kera, A bunde un A gema A mande un sha terankon.

¹⁵ A ngohol mbatarev man mbautahav mba sha kwavaôndo la ikav mbi utyav kera, A due a ve ken igbar hingir ikav i tesen, A hemba ve gbulugh gbulugh sha terankon.

¹⁶ Nahan yô, ma or nana̱ de kera ôron ne ijir sha kwagh u kwaghyan man kwaghman shin sha kwagh u iniongo shin uwer u he shin iyange i memen kpaa ga.

¹⁷ Akaa angan yô, ka di mure u akaa a a lu van la tsô, kpa kwagh jim jim yô, ka u Kristu.

¹⁸ Ma or nana̱ de bundu ne injar ga, ka injaor i i doo nan u hiden a iyol i nan ijime man shi u civir mbatyomov mba Shaav, man u ôron akaa a i pase nan sha mpase u sha mnenge la vighe vighe, man u gban gengese iyol i nan sha kwaghfan u iyolough gbilin tsô,

¹⁹ kpa nan kera kôr sha ityo ga. Ka sha ki man iyol cii i lu vesen sha mseer u Aôndo, sha msuur man mzough u igbila man uijuan mba i ye.

²⁰ Aluer ne kpe a Kristu imôngo sha kwagh u ujijingi mba taregh mba hiihii yô, ka nyi man shi ne rumun ner, i̱ wa ne atindi bee er shi ne mba uma ken tar nahana?

²¹ er: de ker ave ga, de benden sha nombor ga, de benden ave ga,

²² ka akaa a i eren kwagh a mi kpa a saan ishe la, nga sha inja i atindi man ityesen i ior tsô.

²³ Akaa ne bee a bee kwaghfan tsô, ka adini u i dugh sha mfe u or la, man u hiden a iyol ijime man u eren iyol ican, kpa nga a ma inja sha u yangen hua u iyolough ga.